Adat cầu mùa lac ilamu hadah mekre di urang bangsa Dao. Ini lac adat hu urang Dao khik ramik meng dom saman ini mai saong nyu jeng ilamu di drei, cầu mùa saong hatai caong hu dom bilan pala drak siam mekre, ba mai rilo pandap panda kaya mbang, daong ka raidiuk di urang hu tani tanat saong patagok. Da-a mikva saong taong abih gauk duah thau ka adat  ini tapa kadha “dom bangsa adei sa-ai” harei ini.

Adat cầu mùa di urang Dao tỉnh Hà Giang bhian hu peih ngak di akaok thun, tuk urang bharau mbang tết bloh saong daok caga ka bilan pala drak bahrau. Urang bangsa Dao bhian mek harei Tỵ di bilan 1 tui saka ia bulan yaok thun piah peih ngak, urang ba gauk ngak adat cầu mùa piah caong hu sa thun bahrau hajan siam, ngin lagaih, pala drak njauk.

Yaok baoh sang urang Dao brei sa urang lambaok tame ngak adat cầu mùa piah ba patuah jamo mai ka baoh sang. Pandap piah paling tagok Yang ceik, Yang glai saong Pô lingik lac phun tabau tượng trưng ka phun padai praong abih dalam palei, dom bingu padai tasak dahlau daok di dom labik siam di abih dalam hamu, puh saong dom pandap panda bhian randap nao gam haong mikva dalam luac tuk pala drak. Dom pandap paling yang yau ndiuk, menuk, alak… hu dom baoh sang ba mai meng dahlau. Gaok lisei bahrau hu jao ka dom urang kumei gheih tangin di abih tahanek ka nyu pahe, bingi. Bloh ba tal sa baoh sang ngak hu rilo padai, rilo tangei di abih dalam thun bloh hu pilih ruah meng dahlau.

Meng saboh mesup, gru ieu yang lac urang camereip di abih hu mikva dalam palei pok ngak chủ lễ. Hadei di nan, rilo dam dara, urang dalam palei ba gauk mai ngak adat cầu mùa. Tal tuk ngak adat, 4 urang likei cuk ngui siam mekre ndua pandap paling yang meng 4 gah nao tal labik hu pilih ruah ngak adat. Dom urang likei hu mbaok lac urang bangsa Dao saong bhian lac dom urang dam khang kadang.

Pandap piah ngak adat cầu mùa di urang Dao brei hu menuk tuk, bánh chưng, bánh mật saong tiền vàng mã, nan jeng lac dom janih pandap pambuak pagam haong bruk mbang huak, daok dang yaok harei di urang. Saong bruk pilih ruah drei menuk angaok talam cúng jeng lac bruk praong, brei hu menuk tano saong menuk binai, ruah drei siam di abih piah tượng trưng ka bruk hài hòa likei, kumei. Tuk pandap paling yang hu caga ginup bloh, gru ieu yang di palei pok panuac likau pô lingik, pô tasik brei hajan siam, ngin lagaih, pala drak njauk, oh hu halak halin, anek taco bac da-a tal labik tal dhua, sang halei jeng trei sir, jeng hu salamat. Sa kadha praong dalam panuac likau hu panuac sanya di bhap bini dalam palei haong yang ceik, yang glai, yang taneh saong pô lingik ka bruk taong abih menuac dalam palei ba gauk khik caga glai, patagok bruk pala drak, dak padang raidiuk trei sir, siam mekre, klaak nao dom adat cambat klak oh daok lagaih, nyu ngak ka urang Dao eik lipa, kathaot rambah.

Urang bangsa Dao tuk halei jeng abih hatai jia lac pô lingik saong yang mebhang meda ba mai ka urang dom bilan pala drak njauk, hajan siam, ngin lagaih. Ngan saong urang, hatai jia tuk halei jeng caik tame yang mebhang, yang glai saong pô lingik, meyah urang abih hatai jia, tuk halei jeng pok pandap paling tagok saong pok panuac likau ye taong abih janih jeng hu biak.

Dalam adat cầu mùa di urang Dao jeng hu dom bruk daoh tamia pablak tame piah ngak brei bui sambai, chreih chrai jang. Dom kadha me-in meng kan yau kéo co, jhul brak, glum còn. Tuk dom gru ieu yang daok ngak bruk di drei ye abih menuac brei ăn chay. Hadei di tuk dom gru ieu yang ngak adat bloh meng hu ăn mặn.

Adat cầu mùa ngiu di bruk hu makna lac likau patuah jamo, likau hajan siam, ngin lagaih ka bilan pala drak tal, nyu daok lac tuk piah ka mikva dalam palei brei mboh bruk jum pataom, anit ranam gauk./.