Mikva bangsa Nùng daok di xã Pố Lồ, huyện Hoàng Su Phì, tỉnh Hà Giang saneng lac: glai lac amaik raong diuk anek menuac, ye anek menuac brei thau khik caga nyu. Nan jeng lac sa dalam dom makna mikva peih ngak adat paling yang glai yaok thun.

Dom urang taha dalam palei khan veik, meng kan dahlau dom but pajaih urang Nùng daok di Hoàng Su Phì diuk rai sron mbon di dom mbon ceik dua huyện Hoàng Su Phì saong Xín Mần, dalam nan hu xã Pố Lồ. Hu sa harei nan, patao gah brak brei lin mai meblah mek taneh riya drap ar di dom baoh sang urang Nùng. Hadei di rilo harei mesruh metak saong kol khamang, dom but pajaih urang Nùng lah nan ye njauk ba tui drap ar, pabui, menuk saong kabau limo nduac tame glai piah mesruh saong kol khamang. 

Kayua njauk kol khamang pacang cakak rilo harei, kurang ia menyum nan ye ralo menuac saong athur  metai. Njauk tuk nan, urang pan akaok dom but pajaih urang Nùng lac Hoàng Vần Thùng njauk ruak metai, piah brei mboh hatai pandik harao, dom dam dara sik kabau mek ralo, mek drah kabau salih ka ia tanek lisei ngak pandap paling saong likau Hạn Hung (po langik) daong ba.

Drut drui anak bruk jum pataom, ba gauk dang tagok mesruh di dom but pajaih urang Nùng, Hạn Hung (po lingik) brei lin trun mai daong bhap bini taong pateok kol khamang ba mai rai diuk sron mbon ka dom but pajaih urang Nùng. Piah hadar tal urang pan akaok hu buh pren yava daong ka bhap bini pacang kol khamang, dom but pajaih urang Nùng hu mek dom labik glai taha hijao mekre, lac labik gireih piah padang miếu thờ saong pok ngak Đồng Trứ (nan lac yang glai). Meng nan, tal bilan 1 yaok thun, dom palei urang Nùng di dom xã dalam huyện Hoàng Su Phì hu peih ngak adat paling Hoàng Vần Thùng di miếu thờ kayua hu buh pren yava daong ka bhap bini puk palei. Tapa rilo thun bilan, adat ini jeng daok hu khik kajap mbiah tal harei ini.

Piah caga ka adat paling yang glai, tuk mesup di harei rah tabiak adat paling, dom baoh sang dalam xã yaok sang brei sa urang likei ba tui pandap paling nao tal labik glai cấm, lac dom janih pandap kayua urang nan raong pala hu, yau: menuk, ada, ada kangar, njam patam baoh karaoh… piah rik tame ngak adat, bruk rik daong ini lac kayua dom baoh sang halan hatian. 

Pandap oh kurang hu dalam adat paling yang glai nan lac sa drei kabau, sa drei pabui praong meng 50 kg tagok, 4 drei menuk tano, alak kayua chủ tế ngak saong ướp meng brah duik tam dalam dom mblang hamu di palei, di xã. Taphia nan lac gilau, jien hu ngak meng baar pon atau ba-ar dó.

Di dom var paling yang glai, angaok đàn lễ tuk halei jeng hu 4 labik karei di gauk kayua langiu yang praong lac Hoàng Vần Thùng ye daok hu 3 yang nao tui nan lac ong Tí Táo, ong Bảo, ong Liều.    

Gru ieu yang  lac urang lambaok bhap bini palei pok panuac meroi da-a dom yang mai hu mbaok var lễ, likau dom po yang daong ka bhap bini puk palei pala drak njauk, khang kajap pren yava… Hadei di tuk hu yang Hoàng Vần Thùng taduan mek pandap kayua bhap bini pok paling, dom pandap nan hu ba nao ngak ralo. Akaok, iku, 4 takai kabau, pabui saong 4 drei menuk hu ba tabiak parang anak miếu kakuh piah gru ieu yang patui ngak adat. Taong abih ralo daok veik hu dom phụ lễ ba nao ngak tasak, piah paling min brei hu ginup dom bộ phận di drei kabau saong pabui yaok janih hasit piah gru ieu yang ngak adat mbang ka dua. 

Dalam labik gireih di glai cấm, taong abih urang hu mbaok ngak adat jeng halan hatian ngak tui sa quy định: oh ndom puac bar glai bar glo, oh khạc tacuac, phóng uế, dalam mbang huak, thei jeng khik rup, oh menyum alak ralo khik cambuai oh ndom puac gaok tal dom po yang.

Hadei di tuk ngak adat bloh, gru ieu yang saong dom urang taha praong thun, dom akaok palei dalam xã hu mbang dahlau dom pandap tasak piah ngak adat, daok veik taong abih ralo hu ba nao ngak jeng dom pandap mbang piah urang dalam palei gam mbang mek tuah. Daok akaok kabau saong akaok pabui hu alin brei gru ieu yang, piah brei mboh bruk iek praong di bhap bini palei.   

Hadei di tuk ngak adat paling yang bloh, mikva dalam palei peih bruk me-in sambai, tamia dom ragu ndung bak adat cambat di bhap bini bangsa Nùng. Dahlau di tuk mai sang, abih gauk nao kakuh anak bài vị Hoàng Vần Thùng piah brei mboh hatai iek praong dom bậc tiền nhân, saong tapa nan brei mboh ilamu hadah krah di bhap bini bangsa Nùng di Hà Giang./.