Palei Luống Nọi, xã Phù Ngọc, huyện Hà Quảng (Cao Bằng) lac palei daok khik hu bruk menyim jih dalah meng tangin. Amuk Hoàng Thị Bường, umo 80 thun, palei Luống Nọi, khan lac: “Bruk menyim jih dalah hu meng yaok rituh thun ini mai saong hu labik dang biak prong dalam rai diuk di urang Tày pak ini.

Dom thun 80 di abap dahlau, sang halei jeng hu 2 – 3 kik menyim. Jih dalah menyim tabiak hu mikva ba nao pablei pak dom mbang darak  dalam tỉnh. Dahlak jang yau ralo urang kamei karei dalam palei jeng nao megru saong thau menyim. Anek kumei di palei karei mai ini ngak metau jeng hu megru bruk menyim. Dahlau diah, urang Tày menyim piah pandar dalam sang, ngak pandap hồi môn ka anek kumei tuk mai sang pasang, piah salih tui jalan pandap salih pandap, daong pabak ka kinh tế sang saong piah pandar dalam sang yau: khan ao, phui, kamo, ao patal, kadung bak...”.

Meng kan mai, thaik binguk urang kamei daok la menyim jih dalah mboh biak bhian randap dalam rai diuk di urang Tày. Mai meng ralo makna, bruk menyim jih dalah meng tangin jeng daok hu khik veik, min oh daok cakrok patagok khang saong hu dom salih bahrau dalam nguyên liệu menyim. Dahlau diah, dom sang rilo meng pala  phun kapah, katung marai, menyim khan bai. Urak ini, marai hu salih meng sợi công nghiệp yau len, tơ tằm kayua nyu mbuan menyim jang, yaom kaok oh glaong, jeng oh abih ralo tukvak, urang kamei jeng takik glaih glar jang.

Piah brei ka khaol dahlak thau cambaih jang ka bruk menyim jih dahlah, amuk Chu Thị Thược, nghệ nhân palei ngak di palei, ba khaol dahlak nao mong iek daneng menyim anak pabah mbang sang bloh daok la tame menyim. Dua palak tangin samar drah pan haluak ba nao ba mai dalam sa tukvak katut panak hu ngak jeng dom bingu la biak mekre, saong gheh meta. Gam ngak, amuk Thược gam brei thau: “Menyim jih dalah tapa ralo công đoạn, yau: katung marai, tame khung, ngak bingu la, menyim. Pandap menyim urak ini jeng mboh ralo lac ao patal, phui, kamo, kadung bak... hu yaom meng yaok pluh ribau tal yaok rituh ribau đồng sa janih pandap. Dom bingu la hu urang Tày ba tame menyim ngak jih dalah biak ralo janih, min ralo meng lac thaik binguk di dom phun kayau, bingu la, anek athur pambuak pagam haong rai diuk yaok harei. Piah khik ramik bruk menyim jih dahlak di bangsa, dahlak padang tagok sa tổ menyim jih dahlah dalam palei, hu jaik 10 adei sa-ai saong blei veik taong abih dom pandap ngak tabiak. Tukvak jaik Tết, tuai damuai duah blei ralo pandap jang, min kol dahlak ngak tabiak oh samu kayua daok tavak bilan pala pakao hala. Dom janih pandap ngak tabiak meng jih dalah urak ini rilo meng hu pablei ka tuai damuai mai rivang ma-in dalam tỉnh. Yaok thun, dahlak jeng hu ba pandap panda nao pataom mbaok dalam ralo nyaom darak, parang iek, Festival Tea pak Thái Nguyên, Muyim ilamo dom bangsa Việt Nam... hu ralo tuai damuai blei, taong yaom glaong”.

Ong Hoàng Văn Tín, akaok palei Luống Nọi brei thau: dalam palei urak ini daok hu jaik 20 baoh sang daok khik bruk menyim jih dahlah meng kan. Ralo thun tapa urang jakar palei jeng hu pathau khan ka mikva pataom tame ngak mbang patagok kinh tế, taphia di nan khik ramik bruk menyim jih dalah meng kan di palei. Caong khin tukvak anak tal, pakat ủy, karja saong dom jabat chức năng di palei sangka daong ba palei ngak, peih dom tal pato pathram bruk menyim jih dalah; kham merat pathau khan, meyaih khan dom janih pandap hu ngak meng jih dalah tal tuai damuai angaok dom jalan thông tin đại chúng, tapa dom mbang parang iek; patagok bruk pato pakai, paglaong akaok saneng ka yaom glaong ilamo meng kan di bruk menyim jih dalah meng tangin ka rai rah dam dara./.