Umo bahrau 26 thun, min urang likei bangsa Dao Lý Văn Minh daok di palei  Tà San, xã Lùng Vai, huyện Mường Khương, tỉnh Lào Cai hu ngak po sa trang trại rong pabe rilo di abih dalam bhum. Bruk rong pabe hu ba jien tame yaok thun dom rituh triệu  đồng. Saai Minh jeng lac  urang đoàn ba akaok nao dahlau dalam bruk  “Umo ranaih patagok  kinh tế joi” ditỉnh Lào Cai. Kadha vak di  Thanh Thủy, urang vak di rayo sap ndom VN dok di bhum Tây Bắc.

Thun 2011 hadei di tuk nao nghĩa vụ quân sự bloh mai veik palei , saai Lý Văn Minh caik dalam tung hatai kham merat yam tagok ngak kaya meda. Dahlau deih, yaom lac hu tal labaih 5 hécta taneh, min sang saai rilo meng pala phun glai, kein liba takik, tok ginup mbang. Thun 2015, tapa ayut sahabah saai Minh bac megru ilamu rong pabe. Mboh bhum taneh drei dok lac bhum ceik, hareik tamuh rilo, nan ye saai khang hatai blei jiak 40 drei pabe mai rong . Urak ni tapon pabe caih menek siam tagok tal 70 drei. Tui saai Minh dut song rong kabau, limo ye rong pabe samar hu laba jang, kayua tuk vak pabe anek prong song menek meng 7 tal  12 bilan min, var rol oh caong hu taneh praong,  pabe mbuan mbang nan ye oh buh jien tabiak rilo. Yaok thun saai mek hu labaih 200 triệu đồng meng bruk pablei rilaow pabe. Saai  Lý Văn Minh lac: Camereip iek glang ye biak kan, kayua oh hu rilo ilamu, kỹ thuật, pagap yau  pabe aik chraoh, tian bak ngin. Hadei di nan dahlak nao taom gaok  urang jakar thú y, bloh urang brei menyum jru song  pato bruk klauk jru di sang . Urak ni tapon pabe praong siam.

  Langiu di bruk ngak kinh tế  joi meng rong pabe, urang đoàn  Lý Văn Minh dok buh jien tabiak rong kabau, menuk , pabui, pala te song dok pamong tal bruk kuac  danao rong ikan. Sa-ai Minh jeng bhian klah rabha ilamu rong pabe ka mik va dalam bhum piah ba gauk ngak kaya meda song buh jien tabiak blei pabe pajaih ka dom sang kan kandah di palei Tà San,  dong ka mikva hu jalan ngak mbang di tuk camereip, yam tagok tabiak truh kathoat . Dom pakat bộ đoàn di huyện dok pambak prong dom jalan  ngak siam piah dong ka urang  đoàn dam dara yam tapa kan kandah, yam tagok ngak kaya meda yau saai  Minh. Saai  Lý Văn Dũng, Phó bí thư đoàn xã Lùng Vai brei thau. Ini jeng lac bruk ngak piah ka tong abih urang đoàn dam dara dalam xã mai rivang iek song bac megru piah ngak tui. Kayua lac ngan song bhum taneh  Lùng Vai jeng lac sa xã ngak nong. Hulin cong khin dalam tuk vak anak tal hu rilo bruk ngak yau nan, tapa  bac megru saai Minh ye  kinh tế di  sang  urang  đoàn hu khang kajap jang)

        Meng dom kham merat, thau sahaneng, thau ngak, saai Lý Văn Minh njauk lac  urang đoàn naih gheih, kreih camin hadah piah urang đoàn dam dara bac megru song ngak tui./.