DOM ANAI GRU DAOK VEIK PALEI DI BHUM GLAONG
Thứ năm, 06:30, 04/05/2023 Urang lang: Mousa Phương Urang lang: Mousa Phương
VOV4.VOV.VN - Di dom labik sang bac di mangaok dom puk palei bhum glaong tỉnh Quảng Nam, rilo anai gru caik abih umo thun ranaih di drei brei ka anek saih bhum ceik. Raidiuk di bhum glaong bak kan kandah, glaih glar, atah di palei, atah di sang, min dom anai gru jeng daok abih drei haong bruk ngak.

Ini lac mon bac puac adit di dom adei anek saih tal pagam 1/1 haong 2/1, labik sang bac Tắk Pổ, xã Trà Tập, huyện Nam Trà My tỉnh Quảng Nam. Anai gru Trương Thị Hiền hu caga ahar, kẹo ngak pandap thưởng brei ka anek saih hadei di 1 adit bac da-a tari taring. Labik sang bac Tắk Pổ, xã Trà Tập, huyện Nam Trà My daok di mangaok tabung ceik glaong. Biar harei sup, ia harei daok tame talei ceik Ngọc Linh, yaok pluh anek saih jeng daok vil val anai gru oh khin nao sang.

Anai gru Hiền hu mbaok di bhum taneh ini labaih 10 thun. Harei camereip, anai gru daok ranaih, bahrau bac tamat chreih chrai bak ba lô tagok bhum glaong Măng Ổi, palei 3, xã Trà Tập, huyện Nam Trà My haong hatai bui sambai tui bruk pato bac bo anai caong khin meng sit.

Takai yam di anai gru ranaih umo thun hu tuk yau khin dang veik, sahneng lac oh yam tapa hu kayua rilo kan kandah. Dom anai kham bac sap bangsa piah ndom biai haong anek saih saong jak ba amaik ame ba anek nao bac. Anai gru Trương Thị Hiền khan lac:“Tuk nan, rilo labik sang bac oh hu riyak phone tangin. Phone di kol dahlak tuk nan tok pang, ieu saong tải nhạc min, nan ye kol dahlak tải nhạc tame phone saong ba tagok ini peih ka anek saih pang saong pato anek saih. Dom anek saih pak ini takre daoh lo, meng jalan ngak nan bo dom adei mai bac dak harei dak rilo jang.”

Piah pabam akhar haroh di dom puk, palei bhum glaong, urak ini, dom cei gru, anai gru oh daok lac “3 gam” tra, bo brei ngak “4 gam”, nan lac: gam mbang, gam daok, gam ngak saong gam pandar sap bangsa haong dom adei.

Nóc Tắk Pổ, xã Trà Tập, huyện Nam Trà My hu 35 sang bangsa Ca Dong diukrai meng hamu, puh. Adei Hồ Mai Vy, anek saih tal 2/3, labik sang bac Tắk Pổ lac anek di sang kan kandah, tuk tal bilan paik, yuak, amaik ame ba adei tame daok veik di hamu, atah di sang meteh harei nao takai. Bilan paik, yuak dui atah rilo adit ngak ka bruk bac di adei Hồ Mai Vy rilo mbang klaih klaoh Dom anai gru kham merat trun tagok jalan atah duah tal labik hamu piah jak ba, likau amaik ame ba Hồ Mai Vy mai daok di labik sang bac Tắk Pổ piah lagaih ka bruk bac. Langiu di mon bac, dom anai ngak mbang huak, iek glang Vy saong dom ayut sahabat yau dom urang anek dalam sang. Kol anek naih bhum glaong meda lac kayua yau nan bo nyu iek dom anai gru yau amaik di drei. Adei Hồ Mai Vy brei thau:“Anek takre nao bac lo kayua nao bac bui sambai lo. Dom anai gru gam pato akhar haroh, gam sangka daong dom adei, pachreih dom adei kham merat bac da-a.”

Haniem phul praong abih di anai gru bhum glaong lac anek saih tari taring, oh klaak bac. Tuk lễ, tết atau Harei gru pato Việt Nam 20/11, pandap bo anek saih bhum ceik alin brei dom anai gru lac dom pok bingu glai, rabung glai, dom pok njam, phun tabau… Maong tame mbaok meta slut mbut di dom anek saih bhum glaong, rilo anai gru klaak tapa hatai khin mai pato di bhum gah ala hu mbuan lagaih jang.

Tal urak ini, jalan mbak nao mai di bhum ceik tỉnh Quảng Nam jeng daok dom kan kandah. Piah khik ka bruk bac oh njauk klaih klaoh, amaik ame saong dom cei gru, anai gru di bhum ceik njauk cõng anek saih caluai tapa kraong, tapa craoh, tapa dom labik kan kandah piah nao tal labik bac. Ong Thái Viết Tường, Yam ndok Sở Pato Megru tỉnh Quảng Nam brei thau, kan kandah yau nan min dom thun tapa, bruk anek saih klaak bac di bhum glaong Quảng Nam dak harei dak trun, dom anek saih bac tamat pakat 3, tame Đại học dak harei dak tagok. Dom jak jeng nan, hu bruk rik daong oh sit di dom cei gru, anai gru rilo thun pato bac di bhum ceik.“Dalam kan kandah di bruk pato bac bhum ceik , kol dahlak taong yaom biak glaong dom rik daong di dom gru pato bhum ceik. Hu biak rilo anai gru pato bac di bhum ceik yaok pluh thun, var klaak umo thun ranaih di drei brei ka anek saih bhum ceik. Hu rilo anai caik abih umo ranaih di drei piah pato bac di bhum glaong, tal urak ini jeng oh ka khin likei. Dahlak biak iek praong saong likau ndua dhar phor dom rik daong di dom cei gru, anai gru, abih di nyu lac dom anai gru.”

Angaok ceik glaong, sap daoh di dom uranaih bangsa takik hu raong ba dom caong khin ka dom anai gru daok veik di puk palei bhum ceik glaong angaok jalan pabam akhar haroh. Blaoh harei hadei, dom uranaih nan praong tagok saong nao tal takai langik bahrau. Bhum glaong kan kandah meda salih karei meng hu dom tal bac di tabung ceik glaong harei ini./.

Urang lang: Mousa Phương

Viết bình luận

TIN CÙNG CHUYÊN MỤC