Harei ini, Tal bac anit ranam Long Bửu di sa-ai Thắng hu gac sa anek saih bahrau. Adei Phùng Văn Tài, umo 9 thun, hu sa-ai Thắng taduan saong ba tame tal bac 1. Daok la vak yaok akhar haroh tame baoh siphau  bahrau hu alin brei, Tài bui sambai lo: “harei anek nao pablei, blaoh mai sang menei ia njuh, huak lisei ia, blaoh anek nao bac.”

Sa-ai Bảo Ngọc, amaik di adei Tài jeng oh padauk hu bui sambai kayua anek hu taduan tame tal bac anit ranam ini. Sa-ai Ngọc khan lac, anek di sa-ai oh ka hu nao bac kayua kurang harak gar. Harei harei, oh hu thei iek glang, sa-ai brei ba anek nao pablei vé số haong drei. Rilo menuac mboh adei sit kalik jhuk tui amaik luac harei bo oh hu bac da-a hagait, nan ye tacei sa-ai ba anek nao tal tal bac ini: “Melam drei ba anek tame tal bac, hu hagait tapa hè brei anek bac tal 1 di sang bac  Tiểu học Long Bình. Melam ba anek tabiak ini piah anek thau vak, thau bac, drei bui sambai lo. Urak ini anek umo 9 thun ye bo oh ka thau vak, oh ka thau bac hagait.”

Yaok adei mai haong tal bac di sa-ai Thắng hu sa thar vak karei di gauk min jeng hu sa bruk dreih gauk lac amaik ame oh hu jien brei ka anek nao bac, lac menuac meng atah mai daok harei labik ini, paguh labik daih.

 Sa-ai Thắng khan lac, 13 thun dahlau, sa-ai peih tal pato akhar haroh ka dom adei daok di labik lò ngak kiak klak di phường, piah ka dom adei thau bac, thau vak. Kayua hu mbang, tuk ngak bruk khik caga puk palei, sa-ai hu langayh kapul uranaih umo 15, 16 thun daok caga taong gauk. Tuk nan, dom adei hu ieu ngak harak kiểm điểm, min oh adei halei thau akhar haroh. Sa-ai Thắng hu pok panuac haong Đoàn phường brei padang tal bac anit ranam ini. Tuk nan, sa-ai jeng oh huac kan kandah piah nao gaoh pabah mbang yaok sang, jak ba brei dom adei nao bac di tuk melam.  

Meng tal bac tuk camereip praong 24m2 haong 30 anek saih, urak ini, labik ini hu peih praong jang haong 3 bilik bac, labaih 70 anek saih, adei sit di abih jeng hu umo 8 thun, praong abih lac umo labaih 20 thun. Yaok melam, meng mon 6 tal mon 8 meteh harei som tal harei suk, dalam luac 13 thun tapa, Tal bac anit ranam Long Bửu tuk halei jeng hu peih pato.

“Gru Thắng” hu jeng urang Gru di dom adei. Hu rilo rai SV, urang đoàn gam haong sa-ai Thắng halan hatian pato akhar haroh ka dom adei kan kathaot hu thau bac, thau vak.  Kiều Chinh, SV thun ka 1 sang bac Đại học FPT hu mbaok tame daong pato di tal bac anit ranam Long Bửu khan lac:“Adei khin rik daong hasit prein yava di drei saong dom hagait bo drei meda ngak hu ka dom adei sit, piah ka dom adei hu labik siam piah bac da-a saong jeng menuac siam mekre jang.”

Harei nao ngak bảo vệ Cty di Biên Hoà, melam mai juak radaih tapa tal bac, blaoh nao khik iek puk palei, jar var yau nan min sa-ai Thắng oh ka tuk halei mboh glaih glar. Hu mboh dom anek saih di drei thau bac, thau vak, sa-ai Thắng biak bui sambai saong hu pabak prein khang piah khik ramik tal bac ini: “Drei caong khin dom adei sit thei jeng hu nao bac, hu sangka rilo jang. Tuk nan mboh lac hatai caong di drei hu jeng biak, oh caong hagait praong jang. Hadei ini, dom adei nao ngak, buh prein rik daong veik ka rahra, puk paga nan lac hu paje.”

Ngan saong sa-ai Trần Lâm Thắng, tuk halei tal bac daok hu khik ramik, lac tuk nan jeng daok hu rilo adei caong hu daong. Sa-ai Thắng jeng yau rilo cei gru anai gru karei, jeng daok abih drei haong dom tal bac palahik bruk oh thau akhar haroh, daong ka dom uranaih kan kathaot di rilo labik dalam ban raya ini./.