Dalam kadha manuac gheih bruk siam harei ini, kol dahlak hulin likau khan brei thau ka saai Đỗ Văn Sơn, lac urang peih radaih công nghệ di TP.HCM ngan haong dom mbang nduac radaih oh mek jien daong ka urang kumei metain, uranaih nao taong ruak, urang jaoh jo, urang oh hu jien. Nan lac asal kadha vak di Vũ Phượng hu ba tagok mbao Thanh niên.

Saai Sơn  umo 24 thun, palei daok di Phú Yên, klak meteh dhi bruk bac đại học meng thun ka 2, saai tame TP.HCM nao ngak ka sa hãng điện tử praong. Meng jien patak pataom hu hadei di 3 thun, Sơn saong sa ayut saabat peih bruk ngak mbang meng bruk pablei pandap online. Tuk camriep, pablei hu rilo, sa-ai hu jien payua nao palei daong ka amaik ame. 5 bilan dahlau, bruk ngak mbang, duah jien njauk padeih veik hadei di sa tukvak suai lavik oh hu pandap piah pablei, Sơn haong ayut saabat ba gauk nao nduac radaih công nghệ. 

Nduac melam rilo, urang peih radaih công nghệ ini mboh rilo menuac glaih glar ngak mbang duah jien tuk melam, jang yau dom urang ndih di langiu jalan. Gaok urang halei kan kandah, saai halain hatain pajeng oh mek jien, blaoh buh jien kadung tabiak pabak tame kadung jien ứng dụng. Mboh rilo urang jaoh jo, urang gaok kan kandah suh sah tuk saai oh mek jien pajeng, urang peih radaih công nghệ Đỗ Văn Sơn hu tauk ba-ar brei thau ka bruk ngak ini di baoh tamo bảo hiểm piah ka urang hu saai pajeng oh mek jien oh daok suh sah hatai. Langiu di  bruk ieu radaih tapa ứng dụng,  tuk hu menuac ieu daong pajeng, saai jeng halain hatain pajeng brei saoh.  

Tuk blah thaot tamo di saai Sơn hu ba tagok mạng, hu menuac pachreih tui, jeng hu menuac lac saai ngak bruk yau Yuan lac “bao đồng”, min saai sahaneng nan lac bruk siam makre. Yaok harei, saai Sơn nduac radaih meng maong 7 dah page tal jala pandiak, hadei di nan padeih padei blaoh nduac veik meng bier harei sup tal kreih melam, ngan haong jien mek tame lac labaih 500.000 đồng saong pajeng meng 2 tal 3 mbang radaih oh mek jien. Saai Sơn khan lac: “Tuk nduac radaih 0 đồng di langiu ye njauk padam ứng dụng piah plaih ngak kan kandah tal bruk ngak. Min, saai jeng mboh bui sambai, melam mai sang ndih mboh bingi". 

Saai Sơn brei thau: Dahlau daih ngak hu jien, saai bhian payua nao daong ka amaik ame. Urak ini saai Sơn oh payua hu, min tuk ngak dom bruk siam, saai caong caik veik dom siam makre ka amaik ame hu salamat. Jien mek tame oh glaong, raidiuk oh labaih min nan lac bruk bui sambai yaok harei. Mayah hu jien, saai Sơn meda daong ka rilo urang jang. Saai Nguyễn Thị Ái Lam (saai kumei di Sơn) brei thau lac: langiu di dom mbang nduac radaih oh mek jien, Sơn jeng hu pataom jien bo di tuai brei saong pataom haong dom ayut sahabat blei lisei nao alin ka dom urang oh hu sang danaok atau dom urang ngak gaok kan kandah. Dalam cốp radaih di Sơn tuk halei jeng hu klaok xăng sit piah nao di mangaok jalan mayah gaok thei abih xăng ye alin chip. Daok saai Đông (ngak bảo vệ di Quận 1)  drut druai tuk khan veik mbang nduac radaih oh mek jien di urang likei palei daok di Phú Yên ini atah di ini 3 adit yau ini: “dahlak daok di sang trọ pak Quận 12, iek glang ame ruak ung thư, yaok harei nao ngak meng radaih buýt. Harei nan dahlak mgak melam, ngak blaoh ye abih radaih buýt, bo dalam rup oh ginup jien nan ye ieu iek saai Sơn bhian mboh di mangaok mạng. Yau nan bo saai Sơn mai, pajeng dahlak meng Quận 1 mai sang tuk maong 12 melam, dahlak oh sahaneng mboh lac sa urang bo drei oh krein randap bo halain hatain daong drei yau nan"./.