Tabiak rai di thun 2010, Mban lambaok urang Cam Islam tỉnh Tây Ninh hu ngak siam bruk pambuak talei rohim di bhap bini Cam Islam saong Karja palei, sangka iek glang raidiuk mbnag ngui daok dang ka mikva. SaPhiGiah-urang vak di rayo sap ndem Viet Nam  daok ngak bruk di Ban raya Ho Chi Minh hu vak kadha ndem ka bruk ngak nan di Mban lambaok urang Cam Islam tỉnh Tây Ninh.

Bhap bini Cam daok di tỉnh Tây Ninh hu labaih 3.918 urang tui agama Islam, daok ralo di 7 xã dalam 3 huyện:  Tân Châu, Tân Biên saong ban Tây Ninh. Piah tacei pato mikva dalam tỉnh ngak njauk tui agama gam njauk tui hukum karja, Mban lambaok urang Cam Islam tỉnh Tây Ninh hu padang tagok. Lime thun tapa, Mban lambaok hu ngak siam bruk pambuak talei rohim di bhap bini Cam saong Đảng, karja palei dalam dom bruk pagam tal hukum agama; tacei pato bhap bini ngak njauk tui hukum Islam jeng yau Hukum karja. Piah iek glang raidiuk ka mikva kan kathaot, Mban lambaok  kham merat jak ba dom gah, dom kapul nyaom, urang ngak pahala dalam saong langiu negar daong hu labaih 5 tỷ đồng. Meng yaom jien nan, Mban lambaok buh tame padang ngak Sang megik praong, siam brei ka mikva hu labik sambahyang, pasiam veik 94 baoh sang daong ka mikva Cam kathaot, brei 25 sruh radaih juak ka dom anek saih kan kathaot bac da-a naih joi, daong kuac rok 320 baoh bingun ia hacih… Meng nan, raidiuk di mikva dak harei dak hu salih birau. Ong Chàm Sá, Akok Mban lambaok urang Cam Islam tỉnh Tây Ninh brei thau: Meng tuk hu Mban Đại diện mbiah tal ini mikva Cam mboh uan tabuan. Mban Đại diện bhian ginum gauk duah thau blaoh khan veik brei ka mikva thau…

Piah ka bruk ngak di Mban lambaok hu siam jang dalam bruk iek glang rai diuk mbang ngui, daok dang di mikva, khik ramik saong cak rok patagok ilamu di bangsa Cam, lagaih saong sarak di Đảng, Hukum di Karja, ong Trần Lưu Quang, Phó Akok Ủy ban bhap bini tỉnh Tây Ninh lac: Dahlak sahaneng lac, Mban lambaok njauk pambuak bruk khang kajap saong karja piah karja thau saong klah rabha dom kan kandah di mikva. Meng nan, meda cak rok khang jang dalam tukvak anak tal. Bruk njauk biai nan lac,  mikva Islam  di Tay Ninh daok rilo kan kandah,   nan ye brei ngak habar piah paglaong hu raidiuk mikva saong khol dahlak brei pablak tame danak dak ini dalam danak dak cakrok patagok palei pala birau piah padang ngak cơ sở hạ tầng saong dom bruk karei karei…

Anak tal, Mban lambaok urang Cam Islam tỉnh Tây Ninh daok patui bruk jak ba mikva diukrai tui jalan “ Siam ka dunya, mekre ka agama”, jum pataom, daong gauk ngak mbang, jak gauk ngak bruk xa hoi di puk palei, rik pren yava tame dak padang bhum palei Tay Ninh siam mekre, ginup meda./.