Pathau mikva saong taong abih gauk! Pandap mbang, menyum lac sa dalam dom janih pandap oh kurang hu dalam raidiuk yaok harei di anek menuac, nyu daong pabak pren yava saong khik ka rup pabhap hu khang kadang. Nan ye meyah drei mbang menyum pandap oh siam jeng mbuan ba tal ruak kik. Da-a mikva saong taong abih gauk duah thau bruk nan tapa kadha “urang iek ruak” harei ini:

        Mbang pandap oh siam mbuan ba tal ruak kik

        Camereip di abih, kol drei bhian sahneng lac, pandap mbang oh siam ka pren yava lac pandap khut, pandap me-ih. Dom pandap khut, pandap me-ih  lac dom janih pandap dalam nan hu rilo vi sinh meda ngak ka drei ruak, anak meta nyu ngak brei rối loạn tiêu hóa, njauk jru mek saong meda ngak ka kol drei njauk dom janih ruak nhiễm trùng kayua kol drei njom tame meng pandap mbang oh siam, pandap mbang me-ih. Lingiu di nan, meyah kol drei mbang pandap oh an toàn, oh khik njauk dom quy tắc ka bruk vệ sinh saong ngak ka pandap mbang njom njauk dom janih vi sinh vật  ye kol drei meda njauk dom janih ruak. Kol drei mboh lac dom janih ruak yau aih craoh, thương hàn lac dom ruak njom tapa jalan tung pruac kayua kol drei mbang njauk dom janih pandap mbang hu dom vi khuẩn ba tal ruak aih craoh, ruak thương hàn.

          Lingiu pandap mbang khut, pandap mbang me-ih, dom janih pandap mbang njom jru khik caga phun pala jeng mbuan ba tal ruak kik

         Dom janih pandap mbang karei jeng oh siam nan lac dom pandap njom dom janih jru khik caga phun pala rilo jang tanut brei adat. Kadha ini hu makna lac dom janih pandap ini nyu gam rilo jru hóa học, saong dom janih jru ini tuk kol drei mbang pandap, nyu kandaong veik dalam rup pabhap, ngak ka kol drei njauk dom janih ruak pambuak tal rối loạn chuyển hóa. Dom janih jru ini meda ngak tổn thương tế bào saong tapa nan meda ba tal ruak ung thư. Lingiu di nan, meda ngak ka urang patrun chức năng di dom cơ quan dalam tuk chuyển hóa saong đào thải dom janih chuyển hóa yau gan, thận. Kayua yau nan ye, meda ndom katut lac, meyah kol drei mbang pandap oh siam, mbuan ba tal ruak kik.  Dahlau di abih lac njauk dom ruak nhiễm trùng njom tapa jalan tung pruac. Ka dua lac njauk dom ruak rối loạn chuyển hóa kayua njom dom janih jru  hu dalam dom janih pandap ini. Lingiu di nan, nyu meda ngak ka kol drei livang livaih kayua mbang dom janih pandap oh siam.

         Jalan patrun patakik bruk mbang dom janih pandap oh siam  

          Piah patrun patakik bruk blei njauk saong mbang njauk dom janih pandap oh siam, kol drei brei caik hatai tuk pilih ruah dom janih pandap mbang. Kol drei pilih ruah dom janih pandap mbang hu khik piah siam, hu ngak siam saong hu chế biến siam. Ka dua lac kol drei njauk caik hatai tal dom labik pablei dom janih pandap ini. Kol drei jeng brei caik hatai tal bruk khik piah saong tukvak pandar di pandap mbang. Meyah pandap mbang daok hạn sử dụng min oh hu khik piah siam, mboh nyu khut ye kol drei brei klaak nao.. Ka dua lac, dom janih pandap mbang bhian hu hạn sử dụng katut panak harei nan ye kol drei njauk palih ruah dahlau dom janih pandap mbang daok that, dak that dak siam, saong kol drei jeng takik blei rilo pandap caik piah dalam sang mbuan ba tal ruak kik ka kol drei kayua labik khik piah oh ginup điều kiện an toàn. Lingiu di nan, bruk pilih ruah dom janih pandap mbang menyum jeng lac kadha biak praong kayua lac, biak di nyu urang blei mbang kan thau hu labik ngak pandap halei ngak njauk dom quy định ka an toàn, ka vệ sinh thực phẩm meng tuk canh tác, raong, pala, khik, piah, chế biến saong ba tabiak pablei tal tangin urang blei yau habar.