Pathau mikva saong grauk ayut!  

Urak ini, di Ban raya Ho Chi Minh urang Cam tui agama Islam hu labaih 6.000 urang daok di 17 Jamaah. Ngan saong mikva Cam Islam, bilan eik Ramadan nan lac 1 dalam 5 paka di rukun Islam, caik ka urang Islam umo meng 15 thun tagok brei eik dalam sa bilan. Abih di nyu nan lac dalam bilan eik Ramadan, urang bhian mai pataom gauk di sang saong yaok melam urang nao sang megik sabahyang  saong ngak pahala. Da-a mikva nao rivang dom jamaah Cam daok di ban raya HCM piah mboh bruk bui sambai chreih chrai uan raok harei Roya Aidil Fitri, tamat bilan eik Ramadan di mikva Cam daok pak ini tapa kadha vak di Hanipha, urang vak di rayo sap ndem Viet Nam daok di ban raya Ho Chi Minh.

Hadei di sa bilan eik Ramadan, harei ini 18/7, mikva Cam Islam daok chreih chrai uan raok harei Roya  Eidid Fitri. Ini lac harei roya praong jeng lac harei bo taong abih urang dalam sang pataom mbaok,  ma-ah am-puan brei ka gauk saong tadhau ayuh ka gauk hu rilo siam mekre, haniem phol. Biak uan tabuan mboh lac, thun ini, mikva Cam hu sa bilan eik bui sambai meng hu bruk sangka di Ndang saong Karja. Harei roya ini, rilo gah di Ban raya yau UB Mặt trận negar ban raya, Mban Bangsa, Mban Agama Ban raya HCM hu nao rivang saong alin hadiah pandap ka dom ong hakim, na-ep, mikva Cam di ban raya. Taduan Ramadan thun ini, mikva Cam di ban raya biak bui sambai kayua raidiuk dak harei dak hu ginup meda jang. Ong Haji Mach Dares Samael, akok Mban đại diện urang Islam di Ban raya Ho Chi Minh brei thau:

 “Khol dalak biak thau dhar phol Ndang saong Karja hu caik hatai sangka…”

Mikva Cam daok di Jumah Anwar phường 2, quận 8, ban raya Hồ Chí Minh hu labaih 60 baoh sang. Ini lac labik hu rilo mikva Cam daok yau nan ye bhian taduan raok rilo tuai damuai dalam saong langiu negar mai rivang saong dauh thau ka raidiuk di mikva Cam pak ini. Bilan Ramadan thun ini, dom kapul negar langiu mai rivang saong alin hadiah pandap ka dom baoh sang kan kandah,  urang taha, uranaih metui medhar…Dom harei dahlau, piah caga mbang roya  Eidid Fitri, sang halei jeng blei rilo limo, rilo manuk, tapung, saradang…piah ngak cari saong ngak dom janih ahar meng kan di bangsa piah payak tuai damuai. Ong Haji Mu sa, Na-ib jamaah Awar, quận 8 khan lac:

          “ Thun ini, mikva Cam tame bilan iek Ramadan rilo siam mekre….”

Daok mikva Cam phường 13, quận 3, ban raya Ho Chi Minh ye Ramadan thun ini sang halei jeng hu ginup pandap panda jang meng hu bruk sangka di Mặt trận negar Quận, dom urang ngak pahala saong pandap alin hadiah yau; menyek mbang, saradang, ia tasau, brah…, mikva Cam labik ini mbang sa bilan eik Ramadan dalam haniem phul. Amuk Salimah, akok tổ dân phố 20, phường 13, quận 3 brei thau:

 “ Sang halei jeng caga ginup pandap piah ngak ahar, ngak dom pandap mbang di muk kei drei…piah payah tuai damuai…Thei thei jeng bui sambai meah meah ka gauk.”

          Tamat bilan eik Ramadan siam mekre, mikva Cam Islam di ban Raya Ho Chi Minh  mboh biak uan tabuan kayua ngak hu ginup, ngak tui njauk hukum Islam di drei. Bruk bui sambai nan yau pabak jang rilo mbang tuk hu bruk sangka di Ndang saong Karja, bruk daong di dom gah, dom kapul di ban raya. Ini jeng lac bruk pachreih ba praong ka mikva Cam Islam patui jalan ngak siam dom sarak di Ndang, hukum di karja, rik daong  dak padang palei negar dak harei dak siam mekre jang./.