Pathau mikva urang ngak nong: Xã An Hải, huyện Ninh Phước, tỉnh Ninh Thuận thau pandar ilamu pruh ia patak pataom, ba jamriak tame bruk ngak nong, salih janih phun pala, pambak praong rilo mô hình ngak mbang hu kein laba. Kadha  “Urang ngak hamu caong thau“ harei ini, kol dahlak hu kadha vak yaih khan ka bruk pruh ia patak pataom di mikva urang ngak nong xã An Hải, huyện Ninh Phước, tỉnh Ninh Thuận 

  Anak bruk pandiak bhang dui atah, xã An Hải thau ba dom ilamu kỹ thuật bahrau tame bruk ngak nong, ngak siam ilamu pruh ia patak pataom di Israel kayua Dự án iDE Việt Nam ba brei ka baoh sang kathaot. Jien blei pandap ngak hệ thống pruh yau ia hajan meng 3-4 triệu đồng sa sào; pruh sit sit meng 1 triệu meteh tal 2 triệu đồng sa sào. Tal urak ini, Kapul urang ngak nong xã saong Dự án iDE Việt Nam hu ngak hệ thống pruh ia hajan, pruh sit sit ka 450 sang, ginup pruh ka 180 ha phun pala. Dự án iDE Việt Nam hu daong ka 60 sang, saong daong peih 15 tal pasram megru ilamu kỹ thuật, ginum biai ba ilamu khoa học tame bruk ngak mbang, pala drak.

         Ong Kiều Minh Tiến, urang ngak nong hu ilamu pala phun măng tây xanh di palei Tuấn Tú brei thau, sang pandar ia njar tui ilamu pruh ia patak pataom di Israel, pala 1,5 sào măng tây xanh. Yaom pablei meng 40.000-50.000 đồng sa kg. Kaoh bloh phun jien buh tame ngak, yaok bilan hu jien mek tame meng 4 tal 4 triệu meteh. Urak ini, bhap bini dalam palei pala hu 15ha măng tây xanh. Raidiuk bhap bini dak harei dak salih bahrau, hu jalan cakrok. Ong caong khin Karja sangka daong pajaih măng tây xanh  siam hu chất lượng, năng suất glaong, piah daong ka bhap bini patagok jien mek tame.

          Tui taong yaom, bruk pandar ilamu pruh ia patak pataom angaok bhum taneh cuah An Hải lac jalan ngak lagiah ka rilo janih phun pala brei năng suất glaong. Mikva khang hatai buh jien tame ngak, pabak kaya nong hacih, sa-at ka drak pasar yau măng tây xanh, ratak haluk, cà rốt..Saong hu daong cakrok bruk pala hareik brei ka athur raong. Ong Hồ Thanh Phong, akaok kapul urang ngak nong xã An Hải brei thau, anak tal, daok brei peih praong taneh pala dalam bhum tagok 364ha, kayua bruk pruh ia patak pataom lac sa dalam dom jalan ngak biak siam duk saong tưới tràn. Jalan ngak ini hu daong ka urang ngak nong abih takik jien blei jru khik caga phun pala, abih takik pren ngak, pandar takik điện. Năng suất phun pala tagok 30-40%. Mikva sahanang hatai, buh jien tame peih praong taneh pala, daong patagok jien mek tame, tani tanat raidiuk./.