Urang Si La caik tang urang metai tui jalan lac : anek likei kak hasit mbuk di kreh akaok. Anek kumei taoh abih kaong tangin, kaong takoi. Saong hu sa bruk biak karei nan lac dalam ndam metai urang Si La urang meda chat, tamia, daoh.

Yau rilo bangsa karei, urang Si La iek praong bruk menaiy hacih ka urang metai, dahlau si ba urang nan nao tui mukkei. Amuk Hù Cố Xuân, daok di palei Seo Hai, xã Can Hồ, huyện Mường Tè, tỉnh Lai Châu khan lac, urang Si La daok pandar sa janih hareik traok nao dom hagait jhak di dunya: “Rao takai tangin oh njauk mek shoek rao, hu sa janih hareik bhian pandar ieu lac a hé. Rao tapa nao, hu makna lac rao dom bruk jhak di lot ini, piah oh ba dom kanjah jhak tapa lot thiah, anek taco jeng hu sron mbon”.

Bruk njauk biai nan lac, dalam ndam metai urang Si La hu bui mein, daoh tamia chreih chrai. Urang hu dua kadha mein : tamia vil tam dhar quan tài saong mein plaong sạp. Tuk tamia, abih menuac dalam sang ba gauk nao vil val quan tài. Urang likei tangin payin tabiak gah anak, veih tagok palao trun yau urang daok loi ala ia. Urang kumei payin tangin tapak saong yar tagok plaik trun, salih tangin hamit. Amuk Xuân khan lac, tamia yau nan piah ba urang metai nao haong amuk kei saong caong amuk kei thau lac urang dalam but pajaih. Tuk tamia, urang cuk akhan ao di urang Si La.

Gam tamia, urang gam daoh dom panuac kakei, ndom sit haong urang metai “Daoh lac urak ini ong amuk atau lac anek taco nao paje, jhui mai lua di ala ini piah dom urang daok veik hu khang kadang. Dom urang nao  di gah thiah jeng hu ong amuk, muk kei, anek taco. Dom urang daok veik hu khang kadang, ngak mbang hu jang…pagap yau nan”. Amuk Xuan ndom lac yau nan.

Yau nan urang Sila daoh tamia meng tuk halei? Tui amuk Hù Cố Xuân, tuk melam, hadei di tuk ba urang metai tame quan tài, gru ieu yang ngak adat blaoh, urang meng tamia saong brei ndom klao bui sambai, meyah oh yau nan njauk puk paga klao hia. Amuk Hù Cố Xuân langyah lac : “Thei jeng tame plaong hu, thei takre  ye tame plaong. Makna lac nao paje njauk ngak bui sambai ka urang nao. Pagap ye, sang saai bo hu urang metai bo oh nao plaong ye urang klao lac sang nan oh hu ayut, urang nan oh hu thei sangka. Dak rilo menuac dak takre, dak hu urang meyaom lac ong amuk nao biak siam. Meyah gindang jua, tok hu 1, dua urang hu mbaok ye urang klao lac urang metai nan tuk daok diuk oh hu ayut, metai nao jeng gindang jua yau nan, oh hu bui”

Dalam tuk plaong tamia, thei thei jeng ndom klao bui sambai. Urang daok hu ndom pandaih haong gauk. “ Jo klao bui sambai thoai mai. Di tuk ini thei takre ndom pandaih jeng hu bo langiu di nan oh ndom hu. Bangsa Si La, anek metau likei saong metau kumei pakauk oh brei daok di kik havei ia, tuk ini daok hu, oh pakauk hagait. Ngan haong dom urang taha, dunya bui sambai ye ala cõi âm duh hatai. Anek taco daok hia, dom ong  muk daok ala ndom lac drei daok duh hatai. Daok meyah di dunya bo hia, bo drut drui ye dom ong muk sahaneng lac anek taco oh pandik harao ka drei. Drei dak bui sambai, dom ong muk nao dak hu siam mekre.

Oh lac daoh, tamia, urang Sila daok mein dom kadha mein tuk sang hu urang metai. Hadei di var huak melam, tuk sang ngak blaoh sang cuh, gar chieng, lác…hu taong tagok, chreih chrai bui sambai piah dalam palei gam mein plaong sạp haong po sang. Nan lac bruk ba palao urang metai, bo dom rai ini mai bhapbini Si La jeng daok ngak, haong hatai caong khin ka urang metai hu tabiak nao dalam siam mekre./.

                                                                             Thúy Linh