Pathau mikva saong taong abih gauk! Saai Đạo Thanh Thích, palei Phước Nhơn (xã Xuân Hải, huyen Ninh Hải, tinh Ninh Thuận) hu duah ka drei jalan ngak kaya meda karei. Kadha urang ngak hamu caong thau harei ini, daa mikva saong taong abih gauk gam bac megru ilamu di saai Thích. 

Thun 1988, mboh mikva ngak taneh meng jamriah ngak nông dak harei dak ralo. Saai ginum saong diuk mesraiy 15 triệu đồng blei mac li-ua MTZ piah mbang pah ngak taneh ka urang nông dalam palei. Pak meng vụ trun hamu akaok meti, mac li-ua di saai Thích nduac abih công suất ngak taneh ka urang nong dalam palei trun pajaih njauk tukvak. Piah pabak ginup ka mikva, sang saai buh jien blei sruh mac li-ua MTZ ka dua.  

Meng jak jeng di dua sruh mac li-ua MTZ tuk camereip, saai patak pataom jien blei jamriah ka bruk ngak nông. Tal urak ini, sang saai hu 3 mac li-au, 2 mac yuak - jan liên hợp, 1 mac cuộn pon yaom 1,7 tỷ đồng piah pabak ka bruk ngak nong di sang, saong ngak mbang pah ka mikva urang nông dalam palei. 

Oh padeih di nan, ngan saong 18 ha taneh hamu, tỷ phú urang Chăm khang hatai buh jien ngak kinh tế trang trại tổng hợp. Piah caga dahlau ka bruk sản xuất, saai brei rok mương ba ia meng hệ thống thủy lợi kênh Bắc, khik mepiah dalam danao pandar mô-tơ điện bơm pruh, ngak 3 vụ sa thun.  Angaok taneh praong 18 ha, saai pala 8 ha padai pandar mô hình“1 njauk, 5 patrun”, drak dom pajaih TH 6 mek hu sản lượng 180 tấn/thun. Daok 8 ha pala njam patam saong 1 ha pala hareik pabak pandap mbang ka 150 drei pabo saong  65 drei limo.

 Oh caik ka pon klaak saoh, saai blei mepiah ngak pandap mbang ka tapon athur raong saong pablei ka urang mai blei, yaok thun sang saai laba jaik 100 triệu đồng meng pablei pon. Bruk ngak trang trại sản xuất, pablei salih di saai Đạo Thanh Thích ba jien tame  sang labaih 900 triệu đồng/thun; ba bruk ngak gam gam ka 8 urang ngak, ngan saong yaom jien bilan 4 triệu đồng/urang/bilan.

Tukval tal, saai kuhria salih 5 sào padai tapa pala njam hacih piah pablei dalam palei; tui jalan raong limo thâm canh piah khik kajap năng suất raong glang.

Kadha “Urang ngak hamu caong thau” tal ini likau padeih. Kadha kayua rayo sap ndom VN pambuak saong pasak pachreih nông pakat negar peih ngak.