Pathau mikva urang ngak nong: Angaok bhum taneh thu lagu dalam palei Thọ Lộc 2, xã Nhơn Thọ, ban sit An Nhơn, tỉnh Bình Định, urang ngak nong angan Lê Xuân Quang, 53 thun, hadei di 10 thun mesraiy jien, pah taneh peih trang trại raong glang. Urak ini, ong Quang hu jien mek tame yaok thun labaih 1 tỷ 500 triệu đồng. Kol drei duah thau bruk raong glang di urang ngak nong ini, tapa kadha “urang ngak hamu caong thaut” harei ini.

    Thun 2005, meng yaom jien 300 triệu đồng patak pataom hu saong mesraiy di gilang pariak, ong pah 1 ha taneh thu lagu klak saoh piah padang 3 trang trại raong glang. Tuk akaok mereip, kayua takik phun jien, takik ilamu, ong raong yaok janih hasit, dalam nan hu dom pluh drei pabui ralo, 2 drei limo binai, 1.000 drei ada mebaoh… tui jalan mek katut raong atah. Tuk hu laba, ong raong rilo jang saong pah menuac mai ngak ka trang trại.

     Urak ini, trang trại di ong hu 1.500 drei pabui ralo, yaok thun pablei 2 mbang, 600 drei menuk, 6 drei limo binai. Lingiu di nan, ong daok pala labaih 1 ha keo lai. Meng nan, yaom jien mek hu meng trang trại yaok thun labaih 1 tỉ 500 triệu đồng, kaoh bloh yaom jien buh tame ngak, ong daok laba hu jaik 500 triệu yaok thun. 

      Tui ong Quang, lingiu di bruk klauk jru pacang caga ruak ka athur raong tui định kỳ, trang trại daok hu sa duk sát trùng (dalam nan hu jru sát trùng, pandap bảo hộ…) piah ka ong saong dom urang halei khin tame labik raong, jeng njauk tapa duk sát trùng ini. Nan lac jalan ba tal jak jeng ka bruk raong glang di ong. Meng peih praong bruk raong glang bo trang trại ong Quang hu ba bruk ngak ka rilo menuac dalam palei, hu jien mek tame tani tanat.

       Ong Phan Hữu Vinh – akaok kapul urang ngak nong xã Nhơn Thọ, brei thau: Yaok thun, trang trại di ong Quang laba hu labaih 500 triệu đồng. Ong Quang lac hội viên ba akaok nao dahlau dalam bruk padang ngak palei pala bahrau saong rilo thun ong mek hu angan urang nong ngak mbang naih joi pakat tỉnh. Lingiu di nan, yaok thun ong hu daong ka 1 baoh sang dalam palei tabiak truh kathaot saong hu ba bruk ngak gam gam di bhum palei pala./.