Thun 2005, likau la bhum taneh mbuan ceik Bắc Kạn, sang sa-ai Chu Chiều Hạ, urang bangsa Dao tame huyện Ia Grai, tỉnh Gia Lai padang mbang ngui. Meng dua palak tangin saoh, sang sa-ai padang hu sang danaok, hu drap ar mai meng tari tareng saong jalan ngak mbang bahrau di bhum taneh Tây Nguyên:

Takik thei sahneng lac piah hu yau harei ini, sang sa-ai Hạ - njauk ngak bruk glaih glar yau halei. Saneng veik dom harei kan kandah rambah rambup nan, sa-ai khan lac: “Tuk nan anek daok sit, diuk pasang biak glaih glar, yaok harei ngak bruk meng 13 tal 14 tuk. Jeng meng hu bhum taneh Gia Lai siam mekre nan ye pren yava di sa-ai buh tabiak jeng duah hu jien tame, rai diuk hu siam jang”. Tây Nguyên lac bhum taneh siam, thun 2005, diuk pasang sa-ai tame bhum taneh ini ngan haong phun jien takik, hu adei sa-ai gauk gar brei nyim jien, gam haong jien mesre di Gilang pariak, diuk pasang sa-ai blei hu 3 ha taneh mbuan ceik. Meng hatai kham merat ngak meda angaok bhum taneh bahrau, sa-ai ba abih pren yava tabiak pala hu 3 ha cà phê.

Tok dalam 10 thun tame bhum taneh bahrau, min rai diuk sang sa-ai Chu Chiều Hạ hu salih bahrau abih mbon. Meng cuang kandah, tal harei ini diuk pasang sa-ai hu 7 ha cà phê that hijao tapen hồ Ku Tong, biak mbuan laghaih ka bruk glang iek. Diuk pasang sa-ai blei hu sang daok pak bal sit Ia Kha saong padang sang glaong 2 tal pak di apuh yaom labaih 2 tỷ đồng saong hu ginup pandap pandar dalam sang. Mai rivang labik di diuk pasang sa-ai, thei jeng pok meyaom. Ong Rơ Châm Huynh – Akaok kapul urang nong xã Ia Pếch brei thau: “Diuk pasang sa-ai Chu Chiều Hạ tame ini ngak mbang hu, ralo mikva dalam xã bac megru ngak tui, bloh hu jak jeng”.

Urak ini, bruk haniem phul di diuk pasang sa-ai  oh lac hu labaih drap ar, bo dua urang anek thei jeng bac da-a naih gheih: anek kumei kacua jaik bac tamat Đại học Nông lâm Bal raya Hồ Chí Minh, anek likei taluac daok bac sang bac Đại học Y Tây Nguyên. Biak di nyu lac “taneh oh phụ công manuac”. Hu mboh di anak meta sang danaok drap ar di diuk pasang sa-ai Chu Chiều Hạ meng thau hu hatai kham merat yam tapa kan kandah di baoh sang bangsa Dao ini, meng dua palak tangin saoh diuk pasang sa-ai padang hu mbang ngui angaok bhum taneh bahrau Ia Grai meng phun cà phê./.