Nho nan lac janih phun pala hu labik dang khang, ba mai kein laba kinh tế glaong ka ralo urang nông Ninh Thuận. Hu oh takik urang nông Ninh Thuận meng kham merat, tari tarieng saong naih gheih dalam bruk pandar dom ilamu kỹ thuật bahrau tame bruk ngak mbang hu jak jeng meng bruk pala nho saong dak harei dak kaya meda meng phun nho. Kadha vak di urang pambuak bruk Văn Cảnh saong Phan Thanh hu khan ka ong Lê Kim Anh daok di xã Thành Hải, ban sit Phan Rang – Tháp Chàm – sa urang nông ngak  mbang naih joi meng bruk pala nho:

Hu tuk, ong Lê Kim Anh klak phun nho piah salih tapa pala phun karei kayua yaom nho biar, jien mek tame oh tani tanat. Min kayua pambuak saong janih phun pala ini nan ye hadei di dom thun, ong talap mai pala veik phun nho. Urak ini, ong hu dua bein nho hijao NH-0148 tabiak baoh luac thun saong ba jien tame biak rilo ka baoh sang. Ong Lê Kim Anh daok buh jien tame saong peih praong taneh pala nho, kham merat ngak kaya meda meng phun nho hacih:

“Phun nho jeng hu tuk nyu glaong, hu tuk nyu biar, hu tuk ngak hu, hu tuk ngak oh hu, tapa dom thun drei ngak, drei jeng bac hu ilamu, kham merat ngak ka nyu hu jang, meng bruk nho ngak hu kein laba, tapa thun drei pala gilac nho bahrau tra”.

Pambuak saong phun nho labaih 15 thun ini mai, ong Lê Kim Anh thau hu bruk oh mbuan di phun nho – sa janih phun pala “Pandiak oh takre, hajan oh khin”, bhian hu dom janih halak palai kaik. Min meng tari taring duah thau, bac megru ilamu meng tapuk, harak mbao saong meng dom urang pala nho lavik thun, bein nho di baoh sang ong tuk halei jeng tamuh siam saong brei năng suất glaong. Meng labaih 3 sào nho, meyah hajan siam ngin lagaih saong yaom kaom tani tanat, yaok vụ, baoh sang ong mek tame hu 175 triệu đồng. Tui bruk pala nho meng lavik thun, ong Lê Kim Anh mboh lac: pala nho oh lac sa bruk trak damak, meyah tari taring duah thau, bac megru saong pandar ilamu kỹ thuật tame bruk pala nho ye kein laba kinh tế ba mai meng phun nho biak glaong. Bruk bo urang iek praong ong nan lac abih hatai jai saong nao dahlau dalam bruk hu mbaok tame dom tal bac megru saong hadei di nan tacei veik ka ralo urang karei piah ba gauk pala nho hacih hu siam jang. Ong Huỳnh Thái Liêm, akaok kapul urang nông xã Thành Hải – ban sit Phan Rang – Tháp Chàm – tỉnh Ninh Thuật  khan lac:

“Saai biak abih hatai jai, yaok tal bac megru saai jeng hu vak veik ginup piah mai sang saai ba tame pandar angaok phun nho di saai, meng nan bodom thun jaik di ini saai ngak biak hu kein laba, tui jalan ba tabiak di xã”

Meng hatai sahneng: “phun nho oh klaak drei nan ye drei oh klaak nyu” yaom lac hu tuk tagok, hu tuk trun, ong Lê Kim Anh jeng khang hatai tui bruk pala nho. Taneh oh phụ hatai menuac – phun nho hu daong ka baoh sang ong patagok jien mek tame, salih barau rai diuk saong hu jien raong anek mbang bac jeng menuac jeng urang./.