Pathau mikva saong taong abih gauk. Mbang akaok meti pak Bình Thuận, bruk “ngak padai tui jalan SRI” ngan haong pajaih tok meng 8 kg sa sào (pajaih ML48) min ba mai kein laba kinh tế glaong bahrau hu ba tabiak ngak di mblang hamu Mương Chang, xã Phú Lạc, huyện Tuy Phong.

    Meng lavik mai, urang nong dalam  tỉnh ngak padai bhian drak kapan, abih rilo padai pajaih, meng 18 tal 25 kg sa sào, pandar ralo khak, ralo ia… 

Ngak tui danak kayua Mentri ngak nong saong patagok palei pala ba tabiak lac patrun asar pajaih piah patak pataom phun jien saong salih janih phun pala, pandar ilamu kỹ thuật pala drak patak pataom aia, dalam bilan đông xuân 2016-2017, hu bruk daong ba di SNV (lac kapul patagok Hà Lan), Pasak pachreih nong – pachreih ngư tỉnh Bình Thuận hu padang ngak mô hình “Tui jalan pruh aia patak pataom” (pruh pasah thu meblak gauk) saong mô hình “Ngak padai tui jalan SRI” di HTX Long Hương, huyện Tuy Phong. Yau nan, SRI lac hagait? Nan lac jalan ngak padai sinh thái saong kein laba, patagok năng suất min trun jien buh tame yau pajaih, khak drak, jru pametai halak, daong paglaong jien mek tame ka urang pala padai. Dom ilamu cơ bản di jalan ngak ini  nan lac: tam padai , tam sa dảnh, tam lapih, khik iek ia, ngak hareik, kuac gluh saong buh khak hữu cơ…

      Bilan đông xuân 2016-2017, ong Nguyễn Văn Di (đội 3, HTX Long Hương) hu 8 sào padai hu mbaok tame mô hình jeng oh ka yuak. Ong Di khan lac: “dahlau diah dahlak drak kapan pajaih abih 18 kg sa sào (samu 1.000 m2). Thun ini, yaom lac daok suh sah min dahlak jeng khang hatai ngak iek pala drak tok abih 8 kg pajaih sa sào kayua hu bruk daong ba di Karja saong jia tame năng suất lý thuyết di mô hình”. Ong Di kuhira lac, năng suất padai đông xuân thun ini di sang ong mek hu jaik 7,5 tấn sa ha, glaong jang dom thun, tok hu 7 tấn sa ha. Langiu di nan, ngak tui jalan SRI patrun hu 2 mbang pruh jru, patak pataom pajaih, khak drak, pren iek glang.

       Saai Lương Thị Anh Đào – urang jakar iek gah mô hình (Pasak pachreih nong – pachreih ngư tỉnh) brei thau: “Mô hình “Ngak padai tui jalan SRI”, hu peih ngak tui 4 công thức ngak iek, brei mbohlac tam drak 8kg sa sào hu dhal biak siam saong mek hu năng suất glaong abih. Cagar veik, tam drak 16 kg sa sào ye dhal tabiak takik”.

Tui taong yaom di Pasak pachreih nong – Pachreih ngư tỉnh Bình Thuận, dom labik peih ngak mô hình brei mboh bruk ngak tui jalan SRI trun hu jaik 40 - 50% pajaih. Langiu di nan, tapa  ngak bloh saong duk iek haong hamu pala drak tui jalan klak ye aia pruh tui SRI, urang nong pandar aia hu kein jang (meng 30-35% dut haong pala drak tui jalan meng kan). Taphia di nan, pruh aia tui jalan SRI, phun padai cakrok patagok siam, takik jaleih tuk gaok lingik oh siam. Pandar SRI meda ba jien tame ralo ka dom urang ngak padai.

      Kadha “Urang ngak hamu caong thau” adit ini tal ini likau padeih. Kadha ini kayua Rayo sap ndom VN pambuak haong Pasak pachreih nong Negar peih ngak./.