Ngak Yang Koi atau yang padai nan lac bruk paling yang praong abih dalam thun di bangsa Mạ, huyện Đạ Tẻ, tỉnh Lâm Đồng. Ini lac bruk ngak yang hu bhap bini Mạ peih ngak praong prang piah hadar dhar phol dom po yang hu chraong daong mikva palei pala ngak hamu hu padai, ngak apuh hu tangei, raidiuk trei sir. Bắc Yến, urang vak di Rayo sap ndem Viet Nam hu kadha vak brei thau ka adat cambat siam gheih ini tapa bruk padang ngak veik di mikva labik ini pak Palei Ilamu- dulich dom bangsa Viet Nam, da-a mikva saong grauk ayut tui pang:

Bruk ngak Yang Koi di urang bangsa Mạ, huyen Đạ Tẻ, tỉnh Lâm Đồng hu peih ngak di bilan 2, bilan 3 tui saka ia bulan yaok thun, tuk hamu apuh yuak paik blaoh. Urang Mạ bhian ngak yang di sang ilamu bangsa drei, di mblang hamu jaik palei atau di sa mblang taneh praong samu siam. Piah caga ka bruk ngak Yang Koi, dom ong taha bangsa Mạ palih ruah phun nêu siam, glaong, tapak padang kreh labik ngak Yang, kreh phun nêu hu pagam mong daruai mây salih ka bingu padai. Pandap paling yang jeng iek tui mbuon palai, po sang sik rilo manuk, ada, pabe, atau kubao piah paling tagok yang padai. Ong Ka Vị daok di palei 8, xã Mỹ Đức, huyện Đạ Tẻ, tỉnh Lâm Đồng brei thau: “Pandap paling Yang Koi nan hu: ada, manuk, ikan, ahar hala, bei bhong…dom janih kaya nong hu ba mai piah likau ngak hamu hu padai, hu jien tame sang piah harei hadei klah iek lipa. Paling Yang piah thun hadei hu rilo padai birau piah hu trei  sir, raong pato anek bik.”

Adat ngak yang, ong taha palei dang anak phun nêu yuk 3 mbang talak tù-và da-a po yang saong mikva dalam palei mai pataom mbaok. Raklaiy khèn bầu, kong chieng 6 baoh gam yuk, gam taong tame tapak labik ngak yang. Hadei di nan, bhap bini palei bak yot dom manuk, ada, alak tapai, padai, ahar hala…caik labik phun nêu ka ong taha palei da-a yang. Panuac da-a langkan Yang Koi likau brei ngak hamu hu padai, ngak apuh hu tangei, ngak halei hu nan. Hadei di tuk da-a yang blaoh, ong taha palei  mek darah athur ba mai paling cih tagok dhei mikva dalam palei. Sa-ai  Bờ Rệt bangsa Mạ, huyện Đạ Tẻ brei thau: Ini lac adat meng kan mai hu makna praong, taha palei mek darah cih tame chieng  caong khin chieng daok miat miat dalam ilamu urang Mạ. Dom dam dara dalam palei hu taha mek darah ngak adat di dhei likau ka kumei dara samar duah hu pasang, likei dam duah hu diuk, prein yawa khang kajap, raidiuk haniem phol. “ Tuk ngak yang, taha palei kakei uranaih, kumei dara dalam mbuon palei. Habar brei kakei dom uranaih dahlau kayua dom uranaih ini harei hadei salih ka ong taha. Dahlau di tuk mek darah ngak adat  ye taha palei hu likau yang brei ka dom kumei dara dauh hu urang likei anit ranam di drei, pasang abih hatai saong diuk luac rai…dom panuac tadhau ayuh nan caong khin siam mekre mai abih saong kumai dara.”

Hadei di tukngak yang blaoh, urang mbang menyum bui sambai saong gauk. Tal melam, mikva cuh apui, daoh tamia, saong main dom kadha main di bhap bini. Sap kong sap chieng  taong tui kadha daoh, tui takai yam, tangin tamia, mbaik rup thaik di likei dam kumei dara dalam palei. “ Chieng nyu mekre lo, urang taha thau taong chieng nan lac sap iew, jak ayut drei nao ma-in. Pang sap chieng urang duah mai taom gauk, jeng ayut sahabat gauk. Sap chieng salih ka panuac that saong gauk. Tok pang sap chieng nan ngak tui sap chieng , dalam rup mboh sambai dalam hatai, thei thei jeng mboh anit ranam, klah rabah ka gauk oh lac urang taha  atau anek naih. Nan lac adat siam gheih di uarng bangsa Mạ.”

Ong Nguyễn Đức Thọ, Akok Jabat Nghiệp vụ, Pasak ilamu tỉnh Lâm Đồng kahn brei thau; Yang Koi nan lac sa adat meng kan, ndung bak ilamu di bangsa Mạ. “ Ini lac bruk paling yang meng kan mai, hadei bilan yuak kuak blaoh mikva, yaok but pajaih dalam palei jak gauk mai ngak yang piah hadar dhar phol po yang padai hu brei ka mikva lisei huak, padai tame bak sang. Ngak yang piah bayar dhar phol jeng yau caong khin bilan pala drak anak tal hu rilo siam lagaih”.

Meng kan, ngak Yang Koi di bangsa Mạ, tỉnh Lâm Đồng dui atah dalam 3 harei melam, atau dalam sa adit. Min urak ini, daok rah tabiak dalam sa harei melam min. Yaom lac adat ngak yang hu peih ngak dalam patak pataom rilo jang min adat ngak Yang Koi jeng daok lac ilamu siam mekre meng kan hu urang bangsa Mạ di labik ini khik ramik./.