Meng livik mai, Phan Rang hu angan lac palei di lasun lô. Lasun lô Phan Rang nyu hu tép sit, sambo mbong patih, hăng pahe, hàm lượng tinh dầu Phytolxit dalam lasun lô biak glaong. Urak ini lasun lô Phan Rang hu dom gah chức năng tacei pato pala ngak tui tiêu chuẩn VietGap. Tapa nan hu daong ka lasun lô Phan Rang hu angan, hu menuac dalam saong lingiu tỉnh takre blei.

   Ong Trương Khắc Thiện daok di xã Nhơn Hải, huyện Ninh Hải, tỉnh Ninh Thuận kak kajap haong phun lasun lô jiak50 thun. Bruk pala lasun lô hu daong ka ong saong rilo menuac labik ini tabiak truh kan kathaot saong hu tani tanat raidiuk. Urak ini, sang ong Thiện daok pala 5 sào lasun lô tui danak dak an toàn Viet Gap. Lingiu di nan, ong Thiện daok pandar mô hình pruh ia patak pataom ka phun lasun lô, meng nan vụ lasun lô jeng hu năng suất biak glaong: “Sang pala tui danak dak Viet Gap meng thun 2012, tal urak ini kol dahlak pala meng 3 tal 5 sào, thun halei hajan siam ngin lagaih, 1 sào hu 5 tấn, meyah gaok pandiak bhang yaok sào hu 3 tạ min". 

  Urak ini abih tih taneh pala lasun lô di tỉnh Ninh Thuận lac 216 ha, hu pala rilo di dom huyện Ninh Hải, Thuận Bắc saong ban sit Phan Rang-Tháp Chàm. Sản lượng lasun lô that lac 1.600 tấn sa thun. Daok lasun lô Phan Rang hu urang nong pala tui  tiêu chuẩn VietGAP di angaok taneh praong 51 ha di 248 sang. Tuk ngak tui mô hình ini, urang nong hu tacei pato ruah taneh, palih pajaih, iek glang, buh khak, buac mek. Lasun lô Phan Rang pala 1 vụ sa thun, pala meng bilan 10 tal bilan 3 thun hadei, meng  tuk pala tal tuk buac mek lac 5-6 bilan tui lingik tasik.

Ong Nguyễn Tấn, Giám đốc Công ty Đỉnh Lợi- Ninh Thuận, lac labik pablei salih dom janih kaya nong di Ninh Thuận brei thau, lasun lô Phan Rang urak ini oh ginup pablei: “Dom thun bloh kayua lingik oh siam nan ye lasun lô pala hu biak takik saong kayua lingik oh lagaih, pala drak kan kandah ngak ka yaom phun di lasun lô biak glaong, kayua yau nan ye yaom pablei lasun lô Ninh Thuận urak ini biak glaong, meng 150 tal 180 ribau đồng sa kg". 

Thun 2013, Cục Sở hữu trí tuệ hu brei harak chứng nhận đăng ký “Nhãn hiệu tập thể” ka lasun lô Phan Rang kayua Kapul urang nong khik iek. Tapa nan, daong ka rilo urang blei thau tal saong takre blei. Ini lac jalan lagaih ka urang nong dalam tỉnh peih praong pala drak, paglaong chất lượng saong paglaong yaom kinh tế, khik caga kein laba di urang blei, tapa nan yaih khan lasun lô Phan Rang di darak pasar. Ong Đỗ Hồng Kỳ, Phó akaok kapul urang ngak nong tỉnh Ninh Thuận brei thau, anak tal, daok daong pajaih, ilamu ka urang nong pala lasun lô VietGap saong dom janih kaya nong karei di tỉnh Ninh Thuận:“Kol dahlak daok pok panuac tagok UB bhap bini tỉnh Ninh Thuận brei padang Hiệp hội meng Hiệp hội Nho táo urak ini meda salih angan Hiệp hội dom kaya pandap di Ninh Thuận piah cakrok patagok siam jang"

Phun lasun lô lac phun pala praong, ba mai kein laba glaong ka urang nong Ninh Thuận.  Ini lac janih phun tamuh hu dalam lingik pandiak, lagaih haongdom bhum taneh thu lagu, rilo pandiak. Lasun lô Phan Rang pambu thu, oh pandar janih jru hóa chất halei min khik piah hu meng 3 - 6 bilan. Ini lac dom siam lagaih piah ka lasun lô Phan Rang paglaong bruk meriak gauk di darak pasar./. 

        CTV A Sơn- /VOV -TPHCM