Mblang hamu prong palei Hiếu Lễ, xã Phước Hậu, huyện Ninh Phước, tỉnh Ninh Thuận daok yuak piah caga trun vụ Đông- Xuân njauk tukvak. Meng thau pandar ilamu  kỹ thuật bahrau tame bruk pala drak nan ye vụ Mùa yaom lac langik tasik oh siam laghaih gaok hajan ralo min năng suất padai jeng hu grap tanat 7 tạ/ha. Tui yaom pablei ka doanh nghiệp glaong jang 200 đồng dut haong urang pablei salih nan ye jien mek tame di urang nong hu tagok jang. Ong  Hán Ánh, akaok palei Hiếu Lễ, xã Phước Hậu, huyện Ninh Phước, tỉnh Ninh Thuận, lac: “Urak ini mikva mikva mboh bruk yuak kuak biak mbuan laghaih jang. Kadua tra lac năng suất hu  70 tạ, yuak blaoh mikva caga trun vụ Đông Xuân avan njauk tui tukvak di gah ngak nong”

Jak jeng di mô hình mblang hamu prong di xã Phước Hậu brei mboh bruk gul pataom di bhap bani gam haong bruk tacei pato di tỉnh saong bruk pambuak gauksiam mekre haong doanh nghiệp. Ini lac ilamo piah ka dom puk palei bac megru, pambak prong mô hình mblang hamu prong pambuak haong doanh nghiệp dalam bruk blei kaya nong. Thun 2018, xã Phước Hậu daok patui veik bruk pala drak angaok mblang hamu prong labaih 300ha di 647 baoh sang hu mbaok tame ngak. Dalam nan, HTX dịch vụ ngak nong Phước Hậu ngak 172 ha ngan haong 410 baoh sang, HTX Trường Thọ pambuak haong palei Chất Thường ngak 150ha ngan saong 320 baoh sang hu mbaok tame ngak. Ong Nguyễn Như Hùng Triết, phaok akaok UB bhap bani xã Phước Hậu, huyện Ninh Phước brei thau: “UB bhap bani tỉnh saong huyện hu brei bruk ka UB bhap bani xã Phước Hậu peih prong mblang hamu prong thun 2018, cambaih laih lac vụ Đông Xuân 2017-2018 ngan haong mblang taneh 300 ha hu 647 baoh sang hu mbaok tame ngak”.

Dom harei ini, angaok mblang tangeiy xã Phước Vinh, mblang padai di Phước Hậu, Phước Thái, mblang măng tây xanh An Hải, huyện Ninh Phước mikva daok chreih chai bui sambai dak padang mblang hamu prong. Dom doanh nghiệp jeng abih hatai nao gam haong mikva piah pambuak bruk khang kajap, daong ngak brei patagok giá trị, chất lượng kaya nong dalam thun 2018. Paralo kaya nong angaok taneran prong nan lac jalan nao bahrau di huyện Ninh Phước dalam thun 2018 ngan haong labaih 700 ha taneh pala drak tui mô hình taneran prong angaok phun padai, phun tangeiy saong măng tây xanh.

Thun bahrau, ba tui chreih chrai bahrau di dom labik ngak nong di huyện Ninh Phước. Meng dom jak jeng  akaok mereip di mô hình mblang hamu prong thun 2017 lac jalan peih tabiak piah ka thun 2018 meda hu dom jak jeng bahrau dalam gah ngak nong./.

Jasi lang tapa sap Cam