Yaom lac tame bilan diem di bilan thu lagu, tanut ia di dom danao ceik peih ia daok trun takik, min kayua hu dom jalan ngak njauk dalam bruk pandar ia pabak ka pala drak di gah ngak nong tinh Ninh Thuan yau nan ye, dom taneh pala padai pak ini cakrok tani tanat. Kadha vak “ Ninh Thuan khik caga ia pruh ka pala drak bilan đông-xuân” di Aí Nghiêm, urang vak di Rayo sap ndom Biet Nam daok di ban raya HCm brei thau ka bruk ini, da mikva saong grauk yut tui pang :

Kayua daok di labik luac kraong, yau nan ye, taneh pala padai di xã Xuân Hải – labik hu rilo bhapbini Cam daok ngak mbang di huyen Ninh Hai bian kurang ia di bilan thu. Piah daong caga bruk ini, meng akaok bilan dong xuan thun ini, Balai khik ramik ia huyen Ninh Hai hu pilih ruah urang jakar glang iek co so, njauk gauk lich parabha ia tui danakdak pruh luan phien siam. Yaom lac hu mbang meng he thong ia Nha Trinh, Lâm Cấm saong hồ Thành Sơn, bilan đông xuân 2013-2014, mikva xã Xuân Hải trun pajaih hu 920 ha padai, tagok 60ha duk saong bruk ba tabiak. Tal tukvak ini, dom taneh pala padai di mikva Cam pak ini cakrok siam abih. Amuk

       Tui Sở ngak nong saong cakrok palei pala tỉnh Ninh Thuận, bilan đông xuân thun ini, urang nong dalam tỉnh trun pajaih labaih 24.400 ha, tagok jaik 1.500 ha duk saong dom bilan ini thun dahlau. Karei huyện Ninh Phước, dalam bilan đông xuân 2013-2014, urang nong dalam huyen pala drak labaih 7.000 hecta, tagok 30% duk saong bruk ba tabiak, dalam nan hu labaih 5.400 hecta padai . Kayua bruk parabha ia siam, yau nan ye, oh ka hu labik hamu halei dalam huyen rah tabiak tua raya kayua kurang ia. Di jalan khik tani tanat tanut ia di dom danao, khik caga ginup ia pruh ka taneh pala drak bilan dong xuan, ong Thạch Ngọc Quân, phaok Trạm khik ia Ninh Phước, tỉnh Ninh Thuận brei thau : "Meng ini tal akaok bilan 4, dahlau di abih nan lac dom labik pandar ia njauk patak pataom, njauk dak padang dom nyaom parabha ia, mban pacang caga tua raya di puk palei pambuak bruk Tram khik ia Ninh Phuoc parabha ia pruh lien hồ, lien kraong plaih di khat lahik ia saong jak ba bhapbini tak pataom ia."

Dom harei tapa, di tinh Ninh Thuan, tukvak pariak thu, oh hu hajan yau nan ye dom tanut ia dalam dom danao padang pieih Sông Sắt, Tân Giang, Sông Trâu tok daok di tanut trung bình, karei hồ Lanh Ra tanut ia jaik si yau dung tích thiết kế. Anak bruk ini, langiu dua danakdak lac parabha pruh luan phien saong taduan mek tanut ia dom kraong, ribaong noi dong piah tak pataom halau ia di danao padang pieih, gah ngak nong tinh jeng dak padang dom danakdak pacang caga tua di tukvak tal. Ong Nguyễn Văn Năm, akaok Phòng khik ramik ia saong công trình, Công ty trách nhiệm hữu hạn một thành viên Khai thác công trình thủy lợi tỉnh Ninh Thuận brei thau :"Urak ini, Công ty jeng hu ba tabiak bruk parabha ia lien thong meng hồ Sông Biêu ka hệ thống pruh Tân Giang, kroic kraong Bắc saong kraong Nam saong dak padang glaong dom canah bờ kênh, piah caik pieih halau ia pruh ka bilan đông xuân 2013-2014 khik caga oh caik kurang ia. Karei, Công ty jeng hu danakdak parabha ia tak pataom caik pieih ia pruh ka bilan hè thu tal saong ia ngak mbang ka bhapbini ". 

          Dalam tuk pariak catang dui atah yau urak ini, pandar ia tak pataom, ngak njuak lich trun pajaih di dom gah chức năng, sahaneng lac, bilan đông xuân thun ini, mikva ngak nong, dalam nan hu bhapbini Cam pak tinh Ninh Thuan yuak hu kein laba glaong./.