Ninh Thuận lac sa dalam dom tỉnh gaok tapak bruk biến đổi khí hậu, ngak kan kandah trak tal bruk ngak nong. Piah pacang caga biến đổi khí hậu, tukvak tapa, gam saong bruk ba jalan di gah chức năng, bhap bini dom puk palei dalam tỉnh hu salih janih phun pala ba mai kein laba kinh tế glaong. Abih di nyu nan lac, bruk pilih ruah janih phun pala hu darak pasar takre blei lac jalan pilih ruah siam di abih, daong ka bhap bini dalam tỉnh pala drak khang kajap.

Bruk pala drak di huyện Thuận Bắc, tỉnh Ninh Thuận tuk halei jeng dang anak bruk bhang pandiak. Kayua yau nan ye, salih janih phun pala lagaih haong biến đổi khí hậu lac bruk oh ngak karei hu, daong ka huyện pamaong tal bruk ngak nong khang kajap.

Tukvak tapa, tui jalan ba di gah ngak nong tỉnh, taneh ngak padai di huyện Thuận Bắc daok takik nao piah cakrok patagok dom janih phun livik thun. Dalam nan, kruac bung kanduh hijao lac phun pala daok hu rilo urang ngak nong huyện Thuận Bắc pilih ruah, kayua nyu lagaih haong lingik tasik, taneh riya di huyện, saong hu yaom pablei glaong. Urak ini, huyện Thuận Bắc hu jaik 8 ha kruac bung kanduh hijao, saong daok hu rilo jang dalam tukvak anak tal. Ong Đặng Đình Tiến, urang ngak nong daok di xã Công Hải, huyện Thuận Bắc, tỉnh Ninh Thuận brei thau:“Bhum taneh di drei pala phun hagait jeng hu, dalam nan hu phun kruac bung kanduh hijao ini. Vil val labik ini jeng hu menuac pala bloh, mboh phun tamuh siam”

Xã Lương Sơn, huyện Ninh Sơn hu taneh ngak nong labaih 2.500 ha. Kayua daok di gah angaok thủy lợi kênh Đông nan ye padai ia hu maong lac janih phun pala praong di xã, saong padai hu ngak labaih 1.300 ha, min dom thun jaik di ini, phun padai ia dak harei dak lihik nao labik dang di nyu kayua yaom kaom oh tani tanat, hu rilo ruak kik halak halin. Urak ini, UB bhap bini xã Lương Sơn daok jak ba bhap bini salih tapa pala dom janih njam patam baoh kraoh di angaok taneh ngak padai hu takik. Dalam nan, phun kiệu hu bhap bini xã ini pilih ruah lac phun pala praong piah salih tapa. Ini lac janih phun hu yaom kinh tế glaong jang 2 mbang duk saong phun padai. Ong Huỳnh Quang Trúc daok di xã Lương Sơn, huyện Ninh Sơn, tinh Ninh Thuận brei thau: “Tui kuhria mboh, 1 sào kiệu hu laba jang dom mbang 1 sào padai, bo padai urak ini jeng kan ngak lô saong bhian hu halak halin, padai pablei jeng oh hu yaom. Daok phun kiệu pak ini biak hu yaom”

Dalam bilan Hè - Thu meng bloh, Ninh Thuận  hu salih tapa pala phun karei labaih 700 ha, mek hu 80% bruk ba tabiak; dalam nan phun yaok thun hu 640 ha, phun livik thun 62 ha. Bruk salih tapa pala phun angaok thu di taneh ngak padai hu takik tuk camereip mboh hu kein laba. Lingiu di bruk abih takik ia pruh, daok lac jalan ngak lagaih haong bruk bhang pandiak, ba jien tame tani tanat ka urang ngak nong. Ong Nguyễn Tin, Giám đốc Pasak pachreih nong tỉnh Ninh Thuận ndom lac: “Dalam pandiak bhang ye kol drei salih tapa pala dom janih phun katut harei, takik pandar ia piah hu jien mek tame khik tani tanat rai diuk. Min dalam bruk salih phun pala khang kajap suai livik njauk sahneng kuhria ka nyu tantu. Njauk pamaong tame dom janih phun pala atah harei, khik hu tani tanat, saong brei pambuak bruk blei abih kaya nong piah ka urang ngak nong sahanang hatai pala drak hu siam lagaih”

Piah ka bruk salih phun pala ba mai kein laba, lingiu di bruk pathau khan ka bhap bini mboh cambaih kein laba, tỉnh Ninh Thuận brei hu sarak daong ka nyu lagaih, saong brei sami samar dalam bruk salih phun pala ini, pambuak doanh nghiệp gam saong bruk blei kaya nong piah bhap bini sahanang hatai salih phun pala hu khang kajap ./.

CTV Công Phong-Văn Cảnh/VOV-TPHCM