Tal urak ini, gah y tế tỉnh Ninh Thuận hu labaih 390 urang jakar bangsa Cam, meblah 19,4% dom urang jakar y tế di tỉnh. Dalam tỉnh hu 65 balai y tế xã, phường. Ta-eng bhum urang Cam hu 6 pasak y tế saong 13 balai y tế, dalam nan hu 7 xã mek hu chuẩn pakat negar gah y tế, pabak bruk iek glang pren yava tuk akaok mereip ka bhap bani.

     Bahrau page mesup min bhap bani mai tal Balai y tế xã Bắc Sơn, huyện Thuận Bắc, tỉnh Ninh Thuận piah khám, piah iek ruak tagok tal yaok pluh urang. Langik pandiak, uranaih, urang taha bhian njauk dom ruak gah jalan suak java, tung pruac, huyết áp… mboh ralo ngak ka dom urang jakar y tế njauk patagok tukvak ngak bruk pak balai.

     Amuk Đạo Thị Na, quyền Akaok Balai y tế xã Bắc Sơn khan lac: Yaok harei, balai taduan raok labaih pluh urang mai khám saong iek ruak. Hadei di tuk Balai y tế xã hu padang ngak bahrau talei sang pakat 4 khang kajap, hacih sa-at ngan haong 8 phòng chức năng, dom công trình phụ trợ ginup abih yau ghing cuh hareik thải y tế, sang caik radaih, mblang bein.. Dự án Daong bruk y tế kayua Quỹ Toàn cầu daong hu pabak brei jamriak pandap panda y tế  ka balai yau: bàn ndih tapui, pandap cakak jik tầng sinh môn, hồi sức sơ sinh, jamriak dut darah, tủ caik jru… Kapul urang jakar y tế hu ginup menuac saong gheih bruk nan ye mbuan laghaih jang dalam bruk iek glang pren yava ka bhap bani. 

      Balai Y tế xã Phước Ninh, huyện Thuận Nam lac labik iek glang pren yava ka labaih 3.000 bhap bani Cam. Meng akaok thun tal ini, Balai hu khám, iek ruak ka labaih 1.200 mbang urang, kết quả mek hu 50%; danak dak klauk jru caga ruak peih prong mek hu 51,5%; klauk jru pacang uốn ván ka urang kamei metian mũi 1: mek hu 51,8%.

     Dahlau diah, kayua balai taik tahak, jamriak iek ruak oh ka hu ralo, urang jakar y tế oh joi saong kurang menuac nan ye bruk iek ruak di dom balai y tế xã dalam tỉnh Ninh Thuận oh siam lagaih. Piah pabak bruk iek glang pren yava akaok mereip ka bhap bani, kuhria meng thun 2014, Ninh Thuận hu padang ngak bahrau, pasiam veik cơ sở vật chất, blei trang thiết bị y tế ka Sang iek ruak đa khoa huyện Ninh Phước abih 99 ribau đôla  Mỹ. Padang ngak bahrau dom duk di balai Y tế xã Phước Thái abih 46 ribau đôla Mỹ…Tal urak ini, taong abih 13 xã bhum urang Cam dalam tỉnh Ninh Thuận hu balai y tế, dalam nan hu 7 xã mek hu chuẩn pakat negar gah y tế. Taong abih dom balai y tế hu peih bruk khám, iek ruak bảo hiểm y tế. Dom chỉ số iek glang pren yava ka bhap bani mek hu ralo siam mekre. Jaik abih uranaih umo ala 1 thun hu klauk jru pacang caga ruak ginup abih, khik hu bruk palahik ruak bại liệt saong uốn ván anek kamar; dom danak dak y tế pakat negar: pacang cakak ruak pandiak dom, ruak pandiak tabiak darah, phong, lao, bướu cổ... hu peih ngak prong tabiak saong hu siam lagaih. Bác sĩ, Thầy thuốc ưu tú Lê Minh Định, Akaok Sở Y tế tỉnh Ninh Thuận brei thau:“Jalan ngak suai livik, tỉnh daok kuhria patagok gah y tế tal thun 2020 piah paglaong jang bruk iek ruak saong iek glang pren yava bhap bani dalam tỉnh, dalam nan hu bhap bani Cam.”

      Dom labik y tế cơ sở  lac dom labik daok jaik bhap bani di baih. Dom labik y tế cơ sở siam hu daong ka bhap bini iek glang pren yav asiam saong abih takik jien ndo, daong ngak brei công bằng xã hội./.