Di Sang iek ruak Đa khoa huyện Ninh Phước, urang njauk ruak pandiak tabiak darak dak harei dak mboh rilo. Yaok harei, sang iek ruak taduan meng 10 tal 15 urang ruak pandiak tabiak darak. Dalam nan, hu sa urang ruak trak brei ba tagok sang iek ruak Đa khoa tỉnh Ninh Thuận. Dom urang ruak ralo meng daok di dua xã bhum urang bangsa Cam nan lac: Phước Hữu saong Phước Dân. Bác sĩ Lâm Văn Trạch, akok khoa nhi – Sang iek ruak đa khoa huyện Ninh Phước, tỉnh Ninh Thuận brei thau:

 “ Bilan ini bilan hajan bo ruak pandiak tabiak darak oh ka hu vaccin caga jeng yau jru đặc hiệu, nan ye drei brei caga ruak saong samar thau ruak. Mboh ruak ye pandiak meng 2 tal 7 harei, pandik talang, pandik akaok ta-uk. Hu dom uranaih pandiak meng 2 tal 3 harei min amaik ame oh thau meyah mboh uranaih glaoh ta-ok  rilo, pandik hatian, rup laman lamuac brei ba uranaih tame sang iek ruak.

Kuhria tal urak ini, xã Phước Hữu hu tal 30 urang ruak pandiak tabiak darak, urang ruak mboh rilo jang dalam 2 bilan jiak ini. Sang sa-ai Kiều Thị Thuyền daok di palei Thol Hậu Sanh hu dua urang ruak pandiak tabiak darah,  min tuk tangi sua sa-ai oh thau hagait tal ruak pandiak tabiak darak. Mbiah tal tuk ba tame sang iek ruak Đa khoa huyện Ninh Phước iek ruak, hu dom bac si tacei khan, sa-ai Thuyền meng thau ruak pandiak tabiak darak nyu mbuan ba tal metai. Sa-ai Kiều Thị Thuyền, Phước Hữu, Ninh Phước, tỉnh Ninh Thuận brei thau:

“Harei nan amaik pandiak, pandik akok, nao blei jru brei menyum min oh dhit yau nan ye ba tame sang iek ruak, bac sĩ dut iek darak mboh ruak pandiak tabiak darak. Kapul urang jakar mai pasang iek mboh sanmg dahlak hu labik padang ia hu anek raok, bo dahlak oh thau anek raok jeng jamaoh pambak ruak.”

Anak bruk kan kandah di ruak pandiak tabiak darak, huyện Ninh Phước hu peih ngak rilo jalan piah pacang caga, kham merat oh brei jit ruak tamuh tabiak. Kapul y te caga ruak huyện daok jhul pakhang dom bruk pathau khan piah paglaong akaok sahneng di bhap bini, daong ngak brei salih jalan pacang ruak di bhap bini. Urang jakar y tế caga ruak jak ba mikva puh ramik pametai lang quang anek raok di dom xã , ban sit dalam huyện; tacei pato mikva puh ramik ngak hacih labik daok, pataom hareik harom, kuac jalan tathuak ia kandong…Sa-ai Lưu Thị Bích Yến, xã Phước Hữu, huyen Ninh Phước, tỉnh Ninh Thuận lac:

 “ Urak ini, ruak pandiak tabiak darak mboh rilo, labik daok nerak tachrauk, ia njuh daok kandong, raong palao limo, pabui oh kareih dalam var”.

Bác sĩ Lâm Văn Khôi, akok Kapul y tế caga ruak huyện Ninh Phước, tỉnh Ninh Thuận khan lac:

“ Kan di abih dalam bilan hajan nan lac mikva urang bangsa di xã Phước Hữu,  abih di nyu lac palei Hậu Sanh bhian kurang ia pandar, hu hajan trun mikva  pandok ia padang piah pandar, ia kandaong biak rilo. Yau nan ye pametai lang quang biak kan, jak ba mikva urang blei ikan cảnh buh tame raong dalam cuang padang ia ka nyu mbang lang quang. Kan kandah abih di khol dahlak nan lac pathau khan tal dom puk palei di dom xã nan, daong mikva pametai lang quang dalam bilan hajan di labik vin sang daok, abih lang quang meng abih jamaoh kaik ba tal ruak pandiak tabiak darak”.

Piah pacang caga ruak pandaik tabiak darak hu siam, jaln ngak praong di abih nan lac brei jhul pakhang bruk pathau khan, tacei pato pagalong akaok sahaneng pacang caga jit ruak ka yaok bhap bini. Langiu bruk ngak di dom gah chức năng, mikva njauk kham pametai abih lang quang piah pacang jamaok caih, tapa nan yau rik tame bruk khik iek jit ruak pandaik tabiak darak dalam bhum palei./.