Daok dalam labik hu ia di binek Phước Trung, min mboh ngak padai oh hu kein laba dalam tuk tua riya pandiak bhang, bilan Đông – Xuân 2016, sa-ai Cao Vắc daok di palei Mĩ Hiệp, xã Mĩ Sơn, huyện Ninh Sơn pala 3 sào ratak naih tui jalan thâm canh. Tapa nan, mbang akaok meti sang sa-ai Vắc mek hu labaih 3 tạ asal ratak naih. Urak ini sang sa-ai daok paik mbang ka 2, tui kuhria hu jaik 60 kg sa sào. Tui yaom ratak naih meng 23.000-25.000 đồng sa kg, 3 sào ratak naih mek tame hu jaik 10 triệu đồng.

Pak xã Nhị Hà, huyện Thuận Nam, bruk salih labaih 40ha taneh padai tapa pala ratak naih dalam bilan Đông – Xuân hu ba jien tame biak glaong ka urang nong. Ini lac mbang akaok meti pala ratak naih nan ye mikva peih ngak tui jalan quảng canh, ka oh caik hatai tal bruk pandar khoa học kỹ thuật, min năng suất jeng mek hu labaih 1 tạ sa sào. 

       Amuk Võ Như Sơn, Akaok UB bhap bani xã Nhị Hà, brei thau: “Tal tukvak ini bhum salih janih phun pala năng suất oh ka glaong ralo min nyu langyah hu bruk ngak mbang di anak meta dalam tuk pandiak bhang. Jeng caong khin hadei ini jabat jeng daong ka puk palei gah ilamu piah ka mikva iek glang, pala phun ratak naih hu kein laba, piah pambak prong bruk pala phun ratak naih angaok taneh padai”.

       Tui ong Trần Quốc Nam, Phaok Akaok UB bhap bani tỉnh Ninh Thuận, tuk akaok mereip di bruk salih taneh padai tapa pala ratak naih di tỉnh ini brei mboh: ini lac janih phun pala tamuh siam dalam pandiak saong mbuan iek glang. Meyah ba ilamu kỹ thuật tame, phun ratak naih meda mek hu năng suất 2,8 tạ sa sào.

      Pak Ninh Thuận, janih phun pala laghaih haong pandiak bhang hu palih ruah nan lac phun ratak naih, tangeiy saong hareik brei ka athur mbang. Thun 2016, phun ratak naih hu mong yau phun pala praong dalam bruk salih phun pala, jaik 1.000 dalam1.377ha.

      Yau nan min, piah ka dom phun pala ini lac phun pala praong di bhum pandiak bhang ye bruk blei abih kaya nong saong jao brei ilamu ka mikva urang nong nan lac bruk biak praong. Ndom biai haong urang vak di Rayo Sap ndom Viet Nm, sa-ai Phan Đình Thịnh, akaok jabat Khoa học công nghệ-Sở Ngak nong saong patagok palei pala tỉnh Ninh Thuận brei thau:

-         Tuk pala phun ratak naih ye hu dom doanh nghiệp pabak brei pajaih. Hadei di nan, mboh tangin blei tame taong abih pandap panda. Urak ini, bruk  blei nan daok rah tabiak siam, tui yaom pablei 25.000đ sa kg ye urang nong hu jien mek tame meng 14-15 triệu đồng sa ha. Taphia di bruk ieu dom doanh nghiệp pambuak bruk, blei tame, gah ngak nong tacei pato, tư vấn ilamo, pacang caga halak halin, daong ka urang nong pambuak bruk, mboh tangin sanya blei abih pandap panda, janih halei laghaih haong taneh halei.

        Ong Thịnh brei thau dalam bilan hè thu anak tal saong dom thun patui di nan, gah ngak nong Ninh Thuận daok kuhri kuhria phun pala ka nyu laghaih. Công ty Hưng Long Phát pak Bình Thuận sanya blei abih lange juk nan ye bilan hè thu anak tal tỉnh meda pala iek phun lange juk. Ngành ngak nong pok sap iew ralo doanh nghiệp pak bal raya Hồ Chí Minh, dom tỉnh jaik taphia tame Ninh Thuận. Ralo  doanh nghiệp raong glang meda duah mai, likau padang trang trại raong glang saong blei pandap panda ka urang nong.

       Ong Thịnh taong yaom dalam bilan Đông xuân meng blaoh, bruk salih janih phun pala ralo meng lac di bhum urang bangsa Cam saong Raglai. Dom baoh sang bangsa Raglai ngak biak siam, min ilamu khoa học công nghệ daok biar. Kayua au nan ye, urang jakar gah ngak nong njauk tacei pato tapak angaok mblang hamu./.