Njam patam, baoh karaoh lac sa dalam dom janih pandap hu urang mbang ralo dalam dom van mbang huak yaok harei. Min kayua oh hu ngak tasak, njam metah bhian ba tal ruak kik.  

Jalan ngak piah pametai dom ký sinh trùng saong patrun jru mek di njam patam baoh karaoh

Dahlau di abih njauk palih njam hacih. Njam metah meda hu ký sinh trùng, tapa roh duah di Viện sốt rét - Ký sinh trùng, dalam 8 janih njam hu urang mbang ralo, mboh lac nyu njaom ký sinh trùng meng 92,3 -100%. Kayua yau nan ye, yaom lac njam hacih saong hu rao meng aia jru ye tỷ lệ njaom kí sinh trùng jeng daok di tanut 51,9-82,6%. Nan ye, njauk palih klak dom hala hu halak mbang, hala oh siam. Njauk rao aia ralo mbang. Ralo urang saneng lac, njam hacih tok rao meng 2 tal 3 mbang. Min biak di nyu mboh lac, rao 2 tal 3 aia kan si abih hu dom neriak tachauk, dom ký sinh trùng... bo meda drei oh mong mboh hu. Njam hala njauk rao ralo mbang. Dom chuyên gia brei thau, njam hala lac janih njam njom nerak ralo di abih saong mbuan ba tal ruak aih traoh ralo di abih. Dalam njam hala hu ralo vi khuẩn E.Coli saong Salmonella meng bruk pruh khak tapak angaok hala. Njam hala njauk palih ka nyu hacih, tram dalam aia blaoh ka meng rao yaok hala, rao ralo mbang, rao ala vòi aia. Bloh tuh njam tame chậu aia buh hasit sara tram dalam 5 minit. Njam mbang baoh juai njauk mbang chip. Njam mbang baoh lac janih njam takik ô nhiễm jang kayua nyu sro angaok mejam nan ye tuk pruh khak takik gaok khak tapak. Yau nan min, njam mbang baoh mbuan njaom jru khik caga phun pala kayua paik avar jang tuk oh ka abih tukvak cách ly jru. Kayua yau nan ye, tuk blei mai sang juai mbang chip bo ba rao hacih yaok baoh blaoh buh tame bọc nylon saong ba tame tu la-ar, hadei di nan dua harei mek tabiak mbang. Jalan ngak ini meda daong ka baoh karaoh that siam saong ginup tukvak piah ka jru nyu ralai lihik abih. Njam mbang bingu hu mong lac siam di abih kayua bingu bhian daok angaok glaong, oh gaok jru khik caga phun pala. Njam mbang bingu rao hacih ala vòi aia. Njam gia vị njauk rao ralo mbang ka nyu hacih. Dom janih njam gia vị jeng njauk rao hacih yau dom janih karei kayua dom janih gia vị yau akaok lasun, baoh amriak that… bhian hu pruh khak tapak nan ye mbuan njaom ký sinh trùng. Hadei di tuk rao hacih baoh kayau, mek khan ba-ar uak hacih piah tah klaak dom vi khuẩn daok kandaong veik hadei di tuk rao. Juai uak tapa njam. Ralo urang brei thau, uak tapa njam bloh mbang atau ba riak ye nyu siam, min sahneng yau nan oh njauk. Viện roh duah njam patam baoh karaoh Việt Nam brei thau, bruk bhian randap  rao saong uak tapa njam bahrau tuk nyu khik hu vệ sinh nan lac oh cần thiết, ngak yau nan meda patrun lượng vitamin gam ngak lahik dom chất pacang caga ung thư dalam njam./.