Meng sit ong Thạch Ka Ri No biak takre doh tamia song parang main dom tuồng tích cổ di bangsa drei. Tuk thau dom boh baha dalam huyện atau dalam xã hu parang main nghệ thuật ye ong mai iek brei hu. Meng nan, umo 14 thun ong Ka Ri No kham merat roh duah song hu ame  tacei pato, ong ngak hu alat ragam song mặt nạ meng kan.. Dak ngak ong dak mboh biak takre, dalam dom thun ong ngak hu abih dom janih alat ragam meng kan di urang Khmer yau capi Ta-Kê, capi Cò, capi Gáo, gar Chầu, gar Sa Dăm, mão, mặt nạ dom nhân vật dalam sử thi Ramayana, dom bức phù điều, bingu la pandar dalam kiến trúc baha, tháp…Abih di nyu nan lac lagu phleing ngũ âm, sa janih oh kurang hu dalam tuk ngak adat meng kan di urang Khmer.

Angan siam dane atah, jiak 20 thun ni mai dom janih kayua ong Ka Ri No ngak tabiak oh lac brei ka dom kapul doh tamia song dom kapul nghệ thuật, dom baha Khmer dalam tỉnh bo daok hu mbaok di dom tỉnh, ban gah merong. Yaom lac yau nan, min kan kandah di abih urak ni lac pandap piah ngak dak harei dak kurang, takik, oh siam, oh kajap nan ye njauk blei meng negar langui mai ngak. Ong  Ka Ri No khan lac:

 “Bộ chiêng vòng njauk blei meng negar langui kayua bộ chế tác di drei oh siam. Dok kayau brei hu kayau lavik thun.

 “Meng hatai khin khik ramik bruk ngak meng kan, dong khik ramik ilamu meng kan, meng rilo thun tapa ong Ka Ri No hu tacei  ba dom urang anek di drei tui bruk di ong. Hatai takre nghệ thuật hu samar pambak tapa rai ka 3 di boh sang. Ong hu 4 urang anek likei, 2 urang dok tui bruk ngak alat ragam, mặt nạ, hình nộm, 2 urang tui bruk padang ngak, bhian ngak dom bingu la, phù điêu, tượng phật dalam kiến trúc baha Khmer. Ong Ak Ka Ra urang anek ka 3 di ong Ka Ri No khan lac:

            Drei hu bruk ngak dalam sang je,  drei tui bruk nan. Urak ni dom baha jeng dok khin. Jien duah hu oh hadom,  min kayua drei takre.

Abih gauk dalam sang duik meng bruk ni, min ong Ka Ri No song dom urang anek di ong tuk halei jeng halan hatain klak rabha song cong khin khik ramik, patagok ilamu meng kan di bangsa drei. Kayua yau nan ye ong oh lac pato ka anek taco di drei bo dok kham pato ka dom dam dara urang Khmer karei karei. Tui ong urak ni hu dom janih nghệ thuật yau Kịch tamia Yeak Rom daok lihik nao, min nhân vật chằn Krông Riếp, kara Hanuman, lac 2 nhân vật lambaok ka bruk siam song bruk kanyah daok patagok khang. Tong abih dom puk palei hu urang Khmer daok jeng hu kapul tamia chằn, tamia neak tà, dalam tuk di baha hu dàn nhạc ngũ âm song kapul tong gar sa dăm. Urak ni di Trà Vinh dalam 142 boh baha Khmer hu 125 boh baha hu nhạc ngũ âm – gar sa dăm, nan oh ka ndom tal yaok pluh kapul kayua boh sang, menuac urang padang tabiak. Ong Ka Ri No brei thau:

 “Labaih 10 thun ini mai dom mão, mặt nạ, lagu lagam meng kan dak hu rilo urang takre. Oh lac di Trà Vinh bo tỉnh halei hu urang Khmer jeng hu mai tal labik ni duah blei.

Piah khik ramik song patagok bruk ngak meng kan di bangsa, thun bloh Sở Ilamu - Thể thao song Du lịch tỉnh Trà Vinh peih tal pato brei saoh ka dam dara Khmer. Tui nan ong  Ka Ri No lac sa urang gru pato hu daa pato. Bruk ni oh lac dong ka ong duah hu jien ndua bo dok pachrei ong kham merat jang, piah pandap ong ngak tabiak hu rilo urang takre bo dok khik hu nghệ thuật meng kan, dong khik ramik ilamu meng kan song patagok ilamu nghệ thuật Khmer Nam bộ./.