Dalam bilan 5, urang ngak amaik ame njauk caik hatai sangka tal ruak tangin takai camboi saong ruak pandiak tabiak darah. Hadei di ini lac dom kadha brei thau ka ruak pandiak tabiak darah:

Ruak bhian rah tabiak dalam tukvak halei?

Di gah Meraong, ruak pandiak tabiak darah bhian mboh luac thun min tabung glaong di nyu dalam bilan hajan meng bilan 5 tal bilan 11. Urak ini, langik daok tame bilan hajan nan ye mikva njauk caik hatai pacang caga ruak pandiak tabiak darah. Kayua oh ka hu vắc xin pacang caga ruak nan ye jalan pacang caga siam di abih nan lac pametai anek lăng quăng saong ngak dom bruk piah patrun patakik jamaok kaik yau ndih dalam mùng, pandar nhang pametai jamaok atau kem luk pacang caga jamaok ka uranaih.

Ranaih pandiak hadom harei meng ba nao dut iek darah?

Pandiak bhian ngak ka dom urang ngak amaik ngak me duh hatai. Piah thau ka ruak pandiak tabiak darah, dom bác sĩ bhian brei dut iek darah ngan haong dom uranaih ruak pandiak glaong dalam klau harei tagok bo oh ka duah mboh makna ba tal pandiak. Yau nan min, ngan haong dom kamuan ruak trak ye dom bác sĩ meda brei nao dut iek darah aval jang di harei camereip atau harei ka dua tuk mboh ruak piah duah dom janih ruak nhiễm trùng karei.

Iek glang saong tui iek yau habar pak sang?

Tuk iek glang dom ranaih njauk ruak pandiak tabiak darah, dom amaik ame njauk caik hatai tal dom kadha yau ini:

- Brei ka ranaih ndih padeih padei.

- Brei ka ranaih mbang pandap mbrang, mbuan ralai, menyum ralo aia (yau ia krauc, ia riak jru caik li-an). Jhui brei mbang atau menyum dom janih pandap mbang, ia menyum hu sambo màu yau xá xị, chocolate … kayau tuk uraniah glaoh ta-ok nyu meluk haong darah jhuk.

- Brei ka ranaih menyum jru pandiak tuk ranaih pandiak glaong labaih 38,50C. Dom amaik ame njauk pandar paracetamol, liều 10-15mg ka yaok kg teik trak dalam yaok 6 tuk mbiah tal tuk abih pandiak. Juai pandar jru aspirin kayua nyu mbuan ngak brei sraiy darah dạ dày.

- Tui iek dom dấu hiệu jeng trak: amaik ame njauk tui iek dom kamuan piah mboh dom dấu trak yau: (1) glaih, tangin takai la-ar; (2) pandik hatian, glong ta-aok; (3) sraiy darah idung atau sraiy darah di tagei; (4) taglaoh ta-aok tabiak darah atau nao aih mboh khak jhuk. Tok mboh sa dalam dom kadha angaok nan, njauk ba anek naih tane sang iek ruak chip.