Pulao Phú Quý daok kreh biển Đông, atah baoh taneh 56 hải lý nao gah Đông Nam. Huyện hu klau xã lac: Tam Thanh, Ngũ Phụng saong Long Hải, hu abih tih labaih 27.400 menuac. Thun 2010, huyện pulao Phú Quý peih bruk padang ngak palei pala bahrau dalam tuk kadung jien karja palei biak takik. Nan ye, dom tiêu chí meda pambak tame pren di bhap bhap hu ngak dahlau.

 Ong Nguyễn Văn Nhé, urang daok di palei Tân Hải, xã Long Hải brei thau: Meng tuk danak dak palei pala bahrau hu peih ngak, ong jeng yau mikva dalam palei jeng pachreih tui. Sang ong rik daong 5 triệu đồng gam haong ralo harei ngak piah padang sang ilamo palei. Ong khan lac: Tuk halei khaol dahlak nao tasik ye oh ndom, meyah daok di sang  ye rik daong pren ngak ka puk palei hu siam jang. Urak ini hu sang palei yau ini, mikva khaol dahlak bui sambai chreih chrai lô, hu labik piah taom gauk, ginum biai, oh daok nao atah tra.)

Long Hải lac xã daok atah di pasak huyện, cơ sở hạ tầng daok kurang ralo. Meng tuk padang ngak palei pala bahrau, meng pren di bhap bani saong dom nguồn lực meng Trung ương tal puk plei, dom sang ilamo palei, balai y tế, sang bac, labik ngak bruk di mban chỉ huy quân sự xã, công an xã... hu buh jien tame padang ngak bahrau, rik daong khik caga grap tanat an ninh trật tự, patagok kinh tế, xã hội, ilamo di puk palei. Abih di nyu nan lac, bruk iek glang pren yava ka bhap bani hu peih ngak siam kayua xã hu balai y tế mek chuẩn pakat negar. Ong Đỗ Văn Hải, Bí thư Đảng ủy xã Long Hải lac: Xã Long Hải hu pataom tame ngak khang, taong abih hệ thống chính trị saong bhap bani. Kadha siam di abih nan lac bruk pachreih tui saong rik daong jien padai, pren ngak di bhap bani. Nan ye tapa 5 thun, xã Long Hải mek hu 19/19 tiêu chí padang ngak palei pala bahrau.)

Jeng yau Long Hải, dom xã Tam Thanh saong Ngũ Phụng jeng abih hatai pachreih tui bruk padang ngak palei pala bahrau. Bhap bani hu rik daong jien padai peih prong vỉa hè, tuh bê tông rah tui dom jalan di khu dân cư, oh daok gluh bok  di bilan hajan, dhul mul di bilan pandiak. Dalam 5 thun tapa, dalam huyện pala hu 50.000 phun hijao angaok dom jalan saong dom mblang taneh daok saoh, dom mbol ceik piah pacang khik alam môi trường. Jalan mbak nao mai dalam palei hu hijao, mekre. Ong Đỗ Kỳ daok di palei Quý Thạnh, xã Ngũ Phụng bui sambai khan lac: Puk palei hu hacih sa-at, rai diuk bhap banni hu paglaong, an ninh trật tự siam; urak ini khaol dahlak  yaom lac taha abih min jeng mboh bui sambai ka jalan ngak, ka sarak di Đảng saong Karja urak ini, nao njauk haong hatai caong khin di bhap bani khaol dahlak. Khaok dahlak bui sambai ralo.)

 Taong abih yaom jien ieu pataom padang ngak palei paka bahrau di huyện pulao Phú Quý tukvak tapa jaik 464 tỷ đồng, dalam nan hu: kadung jien Trung ương; kadung jien tỉnh, kadung jien huyện; kadung jien xã; jien mesre tín dụng, doanh nghiệp saong bhap bani. Dalam nan, bhap bani rik daong labaih 29,5 tỷ đồng, meblah 6,36%.

Meng bilan 7 thun 2014, angaok pulao Phú Quý hu điện luac harei melam, yaom điện pandar samu haong yaom điện di baoh taneh, rik daong patagok kinh tế - xã hội puk palei. Meng kein lagaih lac daok di labik tasik taong ikan praong, huyện pulao Phú Quý hu pataom tame patagok kinh tế tasik. Tal urak ini, dalam huyện hu 1.400 ghe gilai taong ikan, dalam nan hu 440 sruh công suất meng 90 CV tagok bhian nao taong mek ikan di kreh tasik atah.

Puac thun 2015, dalam huyện hu ngak salah blaoh 19/19 tiêu chí ba tabiak. Ong Nguyễn Văn Linh, Phaok Akaok Ủy ban bhap bani huyện pulao Phú Quý lac:“Hu bruk pachreih tui di mikva, bhap bani dalam huyện pulao meng 3 xã, dom xã hu kham merat peih ngak dom tiêu chí. Di thun 2014, xã Tam Thanh hu ngak salah blaoh. Thun 2015, dua xã daok veik jeng hu ngak salah blaoh, nan lac dua xã Long Hải saong Ngũ Phụng.”

Jalan ngak prong tuk padang ngak palei pala bahrau nan lac paglaong raidiuk di bhap bani. Tal urak ini, jien mek tame kuhria rah tapa tui yaok urang di huyện pulao Phú Quý hu labaih 28 triệu đồng, tagok 4,8 triệu đồng dut haong tukvak bahrau peih ngak danak dak padang ngak palei pala bahrau. Huyện tok daok  58 baoh sang kathaot.

Meng bruk kham merat nan, Thủ tướng Raja-ei hu công nhận pulao Phú Quý  lac huyện mek hu chuẩn palei pala bahrau./.