Tal urak ini, daok hu dom baoh sang daok khik veik atau pasiam veik bein saik piah cak rok patagok du lịch. Phun saik Cái Tàu hu jeng pandap du lịch mekre meta di dom dam dara, daok ngan saong dom urang praong thun, ini lac labik piah hadar kanar veik dom bruk meng kan. Kadha vak di urang vak Trần Hiếu brei thau ka bruk nan:    

  Bein saik (dâu) Rừng Nhớ di amuk Bùi Thị Diễm Trang (daok di palei 15, xã Nguyễn Phích, huyện U Minh) tok caik sa papan sit hu angan Bein saik Rừng Nhớ tapen jalan U Minh - Cà Mau piah tuai thau piah vaih tame rivang iek. Amuk Trang khik veik bein saik Cái Tàu 60 phun meng thun 2004 tal urak ini saong ka oh tuk halei joa tuai damuai. Thun halei rilo ye tapa tukvak padeih lễ  30-4 lac pablei abih saik, thun halei takik tuai ye bein saik di amuk jeng meda abih baoh hadei di nan labaih 1 bilan.

Amuk daok pablei harak vé 30 ribau đồng ka yaok urang tame rivang iek. Bein saik oh pruh jru, tui kuhria hu daong ka sang amuk hu jien mek tame 40 - 50 triệu đồng. Tukvak sang amuk Diễm Trang pala saik, rahra U Minh daok salih tapa raong hadang. 4 labik vil val lac ia mbak, min piah cak rok patagok bruk du lịch rahra, sang amuk khang hatai khik veik bein saik Cái Tàu: “Saik nyu tabiak bak baoh, yau di mangaok phun nan. Saik tathak kanjik katam. Hu urang tame rivang iek, blaoh nduac nao duah po bein. Dom urang ini ieu dahlak tabiak bein saik piah langyah brei urang thau, yau habar meng Cà Mau tame mboh ia mbak, raong hadang rilo, bo pak ini jeng daok khik hu bein phun hijao, that, makre. Urang mboh biak karei, saong ieu drei langyah brei thau lac habar ngak hu yau nan. Dahlak khik veik bein saik piah ngak mbang saong cak rok patagok bhum palei di drei”.

Di xã Nguyễn Phích dahlau daih phun saik hu yaok baoh sang, yaok manuac urang pala rah tui kraong Cái Tàu. Janih saik hu rahra pak ini ba meng langiu kaoh pulao mai pala biak rilo nan ye oh thau meng tuk halei nyu kak kajap haong angan di kraong Cái Tàu gheih mekre ini. Tal dom thun 2000, rahra kaoh klaak bein saik Cái Tàu piah ngak dom bruk kinh tế hu kein laba jang. Min, jeng hu dom baoh sang khang hatai khik veik janih meng kan, khik veik phun saik Cái Tàu

 Di labik du lịch sinh thái Ba Liêm (daok di palei 10, xã Nguyễn Phích) daok hu bein saik labaih 200 phun. Bein saik bahrau hu  ong Ba Liêm pasiam veik dom thun ini mai, dalam nan, hu rilo phun saik klak hu khik veik piah pabak ka tuai mai rivang iek. Kayua phun saik Cái Tàu bhian lac labik kan var hu di biak rilo menuac kak kajap haong bhum taneh ini. Ong Ba Liêm khan lac: “Bein di cei pak ini, urang halei mai meda lac piah duah veik dom bruk tuk daok sit. Dahlau daih phun saik kak kajap haong angan Cái Tàu. Urang praong thun tame bein saik lac mboh hadar veik bruk dahlau daih, sang danaok, ong muk, amaik ame di pak ini, hadar veik dom bruk klak pambuak pagam haong phun saik. Daok dom urang di saman mesruh ye hadar kanal bhum taneh gah daih kraong dahlau daih lac bein phun saik. Jabat ngak bruk, labik di cách mạng daok gah nan. Rahra pala saik di pak ini piah pacang, piah daong ba ka dom urang ngak bruk CM, hu biak rilo bruk meng kan piah hadar veik”.

       Dalam xã Nguyễn Phích urak ini daok hu 4 bein saik hu khik veik di angaok mblang taneh biak praong piah cak rok patagok bruk du lịch rahra. Maong mboh dom kein lagaih, yaom glaong meng kan di phun saik, kanja palei jeng sangka saong pachreih ba rahra khik veik, pasiam veik bein saik piah ngak du lịch. Ong Nguyễn Thanh Gil, Phaok akaok UBND xã Nguyễn Phích brei thau: “Bein saik hu tapa rilo rai, bruk pala saong sangka ye mikva hu ilamo. Ngan haong taneh riya di pak ini jeng lagaih, brei baoh siam, parilo. Rahra pak ini kham merat cak rok patagok piah padang  dom labik rivang main, du lich rahra. Meng hatai caong di mikva, xã jeng hu peih ngak dom sarak pambuak gauk, peih dom tal pasram ka mikva. Kol dahlak mboh lac, bein saik Cái Tàu lac sa pandap du lịch praong dalam dom labik du lịch".

       Tui Jabat Ilamo - Brei thau huyện U Minh, meng dahlau di thun 1990, di xã Nguyễn Phích, labik meng palei 1 tal palei 6, meda lac sang halei jeng pala saik. Hu dom baoh sang pala tal yaok ratuh phun, paik hu yaok piluh tấn baoh yaok thun. Baoh saik Cái Tàu nyu praong, lapih kanduh, ia rilo, yamen, matham hasit, tuk tathak baoh hu sambo kanjik katam biak gheih mata. Saik Cái Tàu tabiak bingu di puac bilan Brak saong bian tathak njauk tukvak lễ 30/4 – 1/5 yaok thun. Dom po bein pak ini jeng pambak tame tuk vak ini piah peih bruk brei ka rahra mai rivang, main./.