Ong Thông Đinh Phụng daok di palei Craoh Tan thôn Lâm Thuận, xã Hàm Phú, huyện Hàm Thuận Bắc, tỉnh Bình Thuận brei thau, dom thun tapa hu bruk sangka buh jien tame padang ngak cơ sở hạ tầng di Karja, jalan mbak nao mai dalam palei, aia hacih, điện piah pandar, mbaok meta palei Cam mboh hadah hadai jang. Palei hu sang ilamo, hu mblang caoh blaong, taong blaong duh ka hatai caong gah ilamu, daoh tamia, pasram, pahat rup: “raidiuk di rahra pak ini dahlau deih biak kan kandah lo…”
Palei Craoh Tan urak ini hu labaih 262 baoh sang, labaih 1.282 urang. Rai diuk di mikva pagam pambak tame jien mek hu meng ngak padai, yaok thun 3 vụ, gam haong phun thanh long. Meng tari tareng dalam bruk ngak mbang pala drak, raong glang bo rai diuk rilo bhap bani Cam dalam palei cak rok patagok hu mboh di meta, hu dom sang blei hu radaih 4 baoh. Dahlau diah, sang kathaot di palei Craoh Tan labaih 20%, tal harei ini, tok daok 6,18% (16 baoh sang) dut haong baoh sang kathaot dalam xã.
Jeng yau mikva Cam di palei Craoh Tan, xã Hàm Phú, mikva Cam di palei Yang Mau, xã Hàm Trí jeng thau cak rok patagok pren khang ka taneh riya, halau aia di dom binek kavei meng danao Sông Quao, ribaong Châu Tá-812 nan ye rai diuk di mikva oh padeih patagok. Taphia di nan, mikva daok khang hatai buh jien tame ngak mbang, pandar mac moc jamriak dalam bruk ngak nong, meng ngak taneh tal yuak mek. Ong Thông Lai daok di palei Yang Mau, xã Hàm Trí bui sambai brei thau, bilan Đông Xuân 2022 -2023 bahrau tapa, mikva mek hu rilo padai brah saong daok pablei hu yaom nan ye thei jeng bui sambai: “Nang suat ngak padai jeng hu, yaom pablei jeng glaong…”
Ong Huỳnh Thanh Hải, akaok UBND xã Hàm Trí, huyện Hàm Thuận Bắc, tỉnh Bình Thuận brei thau, kuhria tal harei ini, puk palei hu daong palagaih ka labaih 70% baoh sang urang Cam di palei Yang Mau mesre phun jien piah cak rok patagok bruk ngak mbang pala drak, ngan haong yaom jien labaih 9 dalam 13 tỷ đồng di xã: “Mikva rilo meng ngak padai, khaol dahlak meda salih ka mikva ngak pajaih padai bahrau yau: OM 5451, ML48 harat atau OM 18… tui yaok bhum taneh bo drei ba pajaih bahrau ka nyu laghaih. Kadha njauk ndom nan lac drei ngak yau habar piah ka mikva salih tapa ngak pajaih padai bahrau, mek hu năng suất saong patagok jien mek tame. Palei Yang Mau hu tổ pambuak bruk piah ngak padai, anak tal khaol dahlak meda pasiam veik jalan ngak ini, kayua mikva pala drak pataom di 1 mblang hamu prong lac N3, nan ye tuk mikva ngak sa mbang, trun pajaih 1 mbang haong gauk ye drei ngak bruk ini, piah daong ka mikva cak rok patagpk khang kajap jang.”
Oh lac hu jien mek tame meng phun padai, dalam dom thun jaik di ini, mikva urang Cam labik ini daok hu jien mek tame tani tanat yaok bilan meng bruk nao ngak công nhân ka dom sang mac, xí nghiệp di dom labik ngak kong Phan Thiết, Hàm Kiệm... Ong Thông Minh Đồng, Akaok palei Yang Mau, xã Hàm Trí brei thau, dalam palei urak ini hu 693 baoh sang ngan haong labaih 3.018 urang. Urak ini dalam palei tok daok 36 baoh sang kathaot saong 41 baoh sang jaik kathaot. Hu yau nan, sa binah jeng mai meng bruk urang ngak dalam palei nao ngak công nhân, duah hu jien mek tame. Ong Thông Minh Đồng khan lac: “thun ini mikva biak chreih chrai, ngak padai hu, mikva thei jeng tari tareng ngak mbang, sangka siam ka phun padai…”
Tuk bruk mbang angui hu siam tagok, mikva urang Cam sangka jang tal bruk bac da-a di anek bhik. Ong Thông Minh Hoàng, Phaok akaok UBND xã Hàm Phú, huyện Hàm Thuận Bắc, tỉnh Bình Thuận brei thau: “urak ini mikva saneng mboh biak cambaih laih ka bruk ini…”
Meng bruk sangka di Đảng saong Karja gam haong bruk kham merat yam tagok di bhap bani, caong khin lac dalam tukvak anak tal, jien mek tame di mikva urang Cam huyện Hàm Thuận Bắc, tỉnh Bình Thuận meda hu glaong jang, rai diuk meda hu ginup, meda jang./.
Viết bình luận