Tui saai Sắn, hu bruk daong ba di kapul urang nông xã, saai hu mbaok tame dom mbang pasram megru saong hu nao rivang iek bruk pala măng tây hijao di dom baoh sang urang nông daok di ban Phan Rang – Tháp Chàm. Hu mboh di anak meta bruk pala măng tây, sa janih phun barau dalam bhum, pambuak saong bruk pruh ia patak pataom, mboh biak siam lagaih, saong brei kein laba glaong jang baoh tron ndaiy, ameriah, saai Sắn ba tangin tame pala măng tây labaih sa sào taneh. Bloh hadei di nan saai peih praong taneh pala măng tây hijao tal 3 sào, saong daok hu pala 150 phun lahong, 100 phun kanduik piah ngak bờ bao pacang ngin, pacang cuah par. Tal urak ini baoh sang saai Hứa Văn Sắn hu jien mek tame meng 3 sào taneh pala măng tây hijao, lahong, kanduik saong raong 5 drei limo palimek labaih 150 triệu đồng yaok thun. Langiu di nan saai daok daong ka 10 urang ngak di puk palei hu bruk ngak, saong sa-ai daok blei măng tây hijao di mik va dalam bhum piah ngak pandap pablei di dom darak pasar dalam saong langiu tỉnh.  

Saai Hứa Văn Sắn brei thau: meng tuk thau saong pandar hệ thống pruh ia patak pataom piah pala 3 sào măng tây hijao brei jien mek tame ralo, saai mboh hu kein laba di bruk pandar hệ thống pruh ia ba mai nan lac: patak pataom hu pren ngak – ia pruh – jien ngak. Kayua yau nan ye hu ralo mikva urang nông mai rivang iek, bac megru mô hình patagok kinh tế di saai, saai jeng hu tacei pato abih hatai jai.

Meng tari tarieng, kham merat ngak mbang, thau yam tapa kan kandah piah patagok, thau ba dom ilamu kỹ thuật bahrau tame bruk ngak mbang pala drak, duah thau darak pasar, meng kan kathaot, baoh sang saai Sắn hu jien mek tame glaong, yam tagok ngak kaya meda. Kayua yau nan ye dalam rilo thun gam baoh sang saai Hứa Văn Sắn jeng mek hu angan baoh sang urang nông ngak mbang naih joi, baoh sang ilamu. Thun 2015, saai Sắn hu kapul urang nông dom pakat yaih khan lac kreih camin urang nông ngak kinh tế joi saong daok hu yaih khan lac urang nao hu mbaok di nyaom roya pakacah gauk anit ranam taneh ia saong pok meyaom “urang nông hadah krah” pakat negar kapul urang nông Việt Nam mbang ka IV peih tabiak di ban ine HN dalam tukvak anak tal.

Saai Sắn brei thau: “Dom urang nông kan kathaot bangsa Chăm kol dahlak hu kaya meda yau harei ini, lac hu bruk daong ba di dom pakat, dom gah, dalam nan hu kapul urang nông tỉnh./.