Bol bhap urang Cam daok di 35 palei dalam 13 xã, ban sit di 6 huyện, ban dalam tỉnh Ninh Thuận. Dom thun tapa, bruk pachreih bac, pachreih megru dak harei dak rilo. Jaik abih dom palei Cam jeng hu kadung jien pachreih bac di baoh sang, di but jaih saong di bol bhap urang Cam piah daong ka dom anek saih kan kathaot yam tapa kan kandah piah bac  da-a. Meng bruk njauk gauk lac taong abih anek kamuan umo tal thun nao bac jeng hui nao sang bac saong urang hu jien padai brei raong anek bik mbang bac ginup meng tal bac mầm non tal trung học saong đại học, atau bac bruk ngak piah duah hu bruk ngak tani tanat…hu daong salih bharau biak siam ka bruk patao megru di palei.

Huyện Ninh Phước lac bhum palei hu rilo bol bhap Cam saong bruk pachreih bac, pachreih megru glaong di abih dalam tỉnh Ninh Thuận. Dalam huyện hu 300 chi hoi ngan saong 23.530 urang hoi, meblah 15% menuac dalam huyen saong hu labaih 4 tỷ 648 triệu đồng jien quỹ. Piah samar pachreih dom urang kham merat yam tapa kan kandah bac da-a naih joi, gru pato gaok kan kandah saong anek saih, sinh viên mek hu tanut glaong, thun 2015, huyện hu alin brei labaih 1 tỷ đồng jien bac saong jien pok meyaom ka dom adei. Ong Thọ Đẳng, Pho akaok Kapul pachreih bac huyện Ninh Phước, tỉnh Ninh Thuận lac:

“ Yaom lac raidiuk mikva Cam labik ini daok biak rilo kan kandah min abih hatai ka bruk pachreih bac pachreih megru…”

Mai ini duah thau bruk pachreih bac, pachreih megru, kadha bo khol dahlak caik hatai dahlau di abih lac bruk padang kadung jien saong bruk ngak hu kein laba di but pajaih pachreih bac. Hu but pajaih, kadung jien pachreih bac tagok tal jaik sa tỷ đồng. Yau ye but pajaih ong Ba Trung Trinh daok pak xã Phước Nam, huyện Thuận Nam. But pajaih ini pataom tame daong anek kamuan sang kan kathaot nao bac, brei daong dahlau dom anek saih kham merat yam tapa kan kandah bac da-a naih joi. Yaok thun, but pajaih ong Bá Trung Trình daong labih 10 triệu đồng blei tapuk siphau, mbut klam, brei paok jien bac ka anek kamuan nao bac. Gam saong nan, daok brei padang mban tui iek bruk bac da-a, sumu mbeik veik tuk anek kamuan dalam but pajaih mboh yau nao suan jalan. Urak ini, but pajiah ong hu labaih 50 anek kamuan daok bac meng mẫu  giáo tal cao đẳng, 7 urang bac đại học, 4 urang thạc sĩ saong sa urang tiến sĩ. Ong Bá Trung Trình brei thau:

“ Dalam but pajaih daok rilo boaih sang kan kandah yau nan ye khol dahlak brei jak ba mikva rik tame piha daong urang kan jang…”

Yaom lac daok rilo kan kandah, min kham merat kayua harei hadei di anek kamuan drei, dom urang amaik ame bangsa Cam harei melam mbang ien, patak pataom piah raong anek nao bac. Baoh sang takre bac lac halau gha piah padang xã hội bac megru di palei pala. Baoh sang ong Lưu Văn Trận daok di palei Như Bình, xã Phước Thái, huyện Ninh Phước lac sa baoh sang takre bac  di tỉnh Ninh Thuận. Ong Trận hu 7 urang anek  ye hu tal 6 urang anek bac tamat đại học saong duah hu bruk ngak tani tanat. Bruk bui sambai tuk halei jeng hu mboh di angaok mbaok ong kayua  anek bik bac da-a tal labik tal dhua, ong Lưu Văn Trận chreih chrai lac:

“Oh ta-eng sang dahlak bo dalam xã Phước Thái ni rilo rilo mikva bui sambai ka bruk bac da-a di anek bik…”

Gru pato ưu tú Phạm Hồng Cường, Akok Kapul pachreih bac tỉnh Ninh Thuận taong yaom yau ini:

“ Njauk meyaom lac, dom xã bol bhap Cam tỉnh Ninh Thuận hu bruk jak ba pachreih bac pachreih megru biak siam saong pambak praong. Baoh sang takre bac, but pajaih pachreih bac dak harei dak rilo. Tapa nan, meng bruk but pajaih pachreih bac, baoh sang takre bac rik tame biak rilo dalam bruk paglaong jalan sahaneng jeng yau pabak ilamu saong patao pakai rilo urang naih joi mai ngak bruk ka puk palei.”

Urak ini, dom urang jakar bangsa Cam ngak bruk  gah kinh tế, xã hội di tỉnh Ninh Thuận dak harei dak rilo saong ialmu dak harei dak glaong. Dalam tỉnh hu 5 tiến sĩ, 32 thạc sĩ, 385 y, bac sỹ…lac anek kamuan bangsa Cam daok ngak bruk dalam tỉnh. Gah pato megru hu 20% gru pato lac urang bangsa Cam daok pato di sang bac cao đẳng, pato bruk ngak saong dom pakat bac karei. Yaok ribau sinh viên daok bac di dom sang bac cao đẳng, đại học dalam taneh ia./.