Pathau mikva saong taong abih gauk! Meng labaih pluh thun dahlau, dalam xã Nhị Trường, huyện Cầu Ngang bahrau hu labaih dua pluh baoh sang ngak pien. Pien tok di pablei brei tuai dalam tỉnh. Urak ini darak pasar hu peih praong jang, tuai damuai di grap labik dalam bhum taneran kraong Cửu Long saong ban raya HCM thau tal pien Ba So, tui nan bruk ngak pien jeng dak harei dak patagok. Tal urak ini, palei ngak meng kan ini hu jaik sa rituh baoh sang ngak pien tui bilan saong 50 baoh sang ngak luac thun, pataom di palei Ba So saong palei Tụa. Kadha vak di Sa Oanh – urang vak di rayo sap ndom VN daok di bhum taneran kraong Cửu Long brei thau ka palei ngak pien Ba So, xã Nhị Trường, huyện Cầu Ngang – sa dalam dua palei ngak pien praong abih di tỉnh Trà Vinh.

Kadha camereip hu mboh tuk nao tal palei ngak pien Ba So nan lac bruk jar var di dom baoh sang ngak pien. Urang salih gauk ngak piah dil jao pandap. Amuk Trương Thị Di – urang hu 3 rai ngak pien brei thau: ngak pien oh kan ralo, min brei thau ngak pien meng bingi. Yaok harei sang amuk ngak meng 2 tal 3 giạ duik (samu 40 tal 60kg), nyu tabiak hu jaik 4 giạ pien (samu 80 kg pien).  Meng hu bruk ngak pien ini bo sang hu 3 urang di amuk hu rai diuk siam jang. 

“Dahlak ngak bruk ini meng umo 17, 18 thun ngak miat tal harei ini. Yaok harei ngak meng 2 giạ meteh tal 3 giạ duik, tuk pablei laik ye ngak meng 3 tal 4 giạ sa harei. Dahlau deih tok  ngak ralo tuk tame Ok om bok, daok urak ini ngak luac thun, tuk halei jeng hu urang mai blei, urang blei ba nao pablei veik di Sóc Trăng, Vĩnh Long, ban raya HCM… hu pien nan lac hu jien, oh huac pablei oh laik”

Bruk ngak pien biak glaih glar, medeih lavik melam, tagok meng saboh, abih ralo pren yava meng hu pien pahe bingi. Yaok harei yaok kapul 4 urang ngak bruk meng 8 tal 9 mong meng tabiak hu 3 tal 4 giạ pien. Ngan saong yaom darak meng 360 tal 380 ribau đồng sa giạ pien yau urak ini, kaoh blaoh phun jien tok di daok labaih 150 ribau đồng ka sa urang. Yaom lac glaih glar min kayua pablei laik saong lac bruk ngak meng kan di ong, muk, amaik, ame caik veik, nan ye urak ini palei ngak Ba So hu yaok pluh baoh sang hu meng 3 tal 4 rai tui bruk ngak pien. Ong Thạch Miêl, umo 59 thun, urang hu jaik 30 thun ngak  bruk ini, lac:

“Yaok harei meng 12 tuk melam ngak mbiah tal 8 tuk mesup. Drei ngak sớm piah jala pandiak nao rivang padai, yuak hareik brei ka limo mbang, hu bruk ngak gam gam oh cang nao ngak labik halei atah. Ngak dom pluh thun ye nyu jeng bhian randap, oh mboh glaih glar, ngak miat tal tuk huak lisei. Gaok tuk padeih dua klau harei daok mboh glaih glar dalam rup”.

Piah hu pien bingi, lamin brei ngak meng duik yuak akaok bilan. Kayua yau nan ye, tuk bruk ngak pien hu peih praong, duik dak harei dak takik nao, dalam tuk taneh pala ndiuk rilo meng daok di bhum ia mbak, tapen tasik di Trà Vinh hu mikva dalam palei salih tapa raong hadang, ngak ka duik oh ginup piah ngak pien. Kan kandah mblo tabiak jak gheih, oh daok cang tame ndiuk hu mbiah bo urak ini mikva daok thau khik mepiah saong xử lý duik piah ngak hu pien dalam dom bilan nghịch mùa. Meng jaln ngak ini bo dom palei ngak di Trà Vinh jeng ngak hu pien luac thun. Min pien pahe bingi di abih jeng lac bilan Ok om bok . Piah daong ka palei ngak hu ginup ndiuk piah ngak pien saong pein dak harei dak hu ralo urang thau tal, karja palei daok peih bruk quy hoạch bhum pala duik saong jak ba dom baoh sang ngak pien hu mbaok tame tổ pambuak bruk saong ngak harak tut angan padang angan pablei salih “pien Ba So”. Ong Thạch Ngọc Nghĩ, Phó UB bhap bini xã Nhị Trường daok brei thau lac:

“Palei ngak pien Ba So daok patagok biak siam min kayua oh ka hu angan pablei salih, oh ka yaih khan khang, kayua yau nan ye tỉnh saong puk palei daok hu sarak padang ngak ka pahu angan pablei salih piah ka ralo urang thau tal pien di drei. Urak ini mikva ralo meng ngak tui hatai nan ye jalan ngak anak tal kol dahlak brei padang tổ, patui di nan padangangan pablei salih gam saong bruk chuyển giao KHKT, sangka ralo jang gac tal chế độ sarak ngan saong palei ngak”.

Meng labik lac pandap pok paling thau dhar phon ia bulan tui adat cambat tanarakun di mikva bangsa Khmer, pien urak ini daok hu iek lac đặc sản di Trà Vinh. Meng bruk sangka, daong ba gah sarak, kỹ thuật saong darak pasar piah pablei pandap di karja palei, jia lac oh lavik tra pien Trà Vinh dak harei dak hu ralo urang thau tal, saong tuk nan oh lac khik ramik hu sa palei ngak bo dom urang pambuak saong bruk ngak ini jeng hu rai diuk siam mekre jang./.