Pathau mikva saong taong abih gauk!

Dom urang kumei bangsa Thái tuk halei jeng hadah tagok haong blah ao cóm, mbuk atah brai trun.  Bruk gheih siam nan daok hu pabak jang meng blah khan me-om hu sambo mau hadah, ndung bak dalam nan suan yawa di urang kumei Thái. Khan Piêu lac pandap oh kurang hu di urang kumei Thái, meng lavik mai hu tame dalam ariya, dalam kadha daoh saong hu rilo urang thau tal. Tui sap Thái, “piêu” hu makna lac khan me-om akaok di urang kumei.

Piêu hu menyim meng merai kapah, bhian atah meng 1mét meteh tal 1mét 6, praong meng 30 tal 40 cm. Ngan saong urang kumei Thái, siuk oh lac piah me-om akaok tuk langik pandiak, hangin la-ar. Urang daok mbaik khan siuk blak vin rup biak mekre, ngak jeng blah khan. Hu anek sit, urang kumei Thái meda tambak siuk jeng khan bak anek. Oh padeih di nan, piêu daok lac pandap ngak brei siam binai urang kumei Thái. Meng dom jalan jhik, sambo mau, bingu la gheih mekre, nyu ngak brei khan pieu jeng tha dalam dom janih gheih mekre di ilamu Thái.          

Tok hu dom urang kumei Thái mbong me-om tamo tát, sieu pak meta, daok urang kumei Thái juk di Sơn La saong dom tỉnh Tây Bắc ralo meng me-om siuk khan pieu. Piêu hu rilo janih, hu janih jhik pet bingula meng merai rilo sambo mau hadah di dua gah kaok siuk, janih karei tok lac sa blah khan bai nyom sambo mau jao…Tui bhum palei bo hu dom khan pieu karei di gauk. Bruk karei di gauk nan mai meng bingula pet dua gah kaok siuk, atau dom bingula angaok khan pieu:

          Piêu jeng karei di gauk tui yaok bhum palei. Yau ye, bhum Thuận Châu Sơn La urang pet bingula  di pak kieng, bloh pet dhar bingu di urang Thái di 4 kieng. Hu dom bhum palei urang pet sa blah khan sit di kieng khan pieu. Dom baoh nyuk vin taom dar urang pak meng merai, cakak khan bai meraih bhong blaoh urang jhik kapaok veik. Hadei di nan, urang pet gah langiu dom asar sit, lauk veik iew lac “kacing pieu”.

Khan pieu khin mekre mai meng rilo janih. Dalam nan, merai pet tame khan hu makna biak praong. Meyah khan bai ngak pieu lac khan bai hu ngak meng merai kapah ye merai piah pet bhian lac tơ tằm. Pandar merai tơ tằm piah pet ye sambo mau hadah tanyak, ngak brei siam jang, mekre tagok dom bingula angok khan. Piêu lac sa kadha nghe thuat biak mekre kayua palak tangin gheih di urang kumei Thai ngak tabiak. Urang Thái sahaneng lac anek kumei praong tagok brei thau jhik pet, menyim khan bai.  Kayua yau nan ye, meng umo 7 tal 8 thun, urang kumei Thái brei bac menyim khan bai saong pet dom janih bingula. Tal tuk praong tagok nao tok pasang, dom blah đệm, khan bai saong pieu urang kumei nan ngak hu, lac pandap piah taong yaom urang kumei nan tarieng atau alah, gheih tangin ngak bruk atau oh…

Piah hu sa blah khan piêu, bhian abih meng 3 tal 4 adit jhik pet gam gam. Min urang kumei Thái tok ngak tuk lahaiy, nan ye ngak salah sa blah khan pieu bhian abih jaik sa bilan. Tuk pet dom bingula di dua gah kok khan, urang maong tui mẫu, min oh ngak dreih yau nan bo brei ngak karei tui hatai di drei. Yau nan ye, bac jhik pet piêu, ngan saong dom kumei dara Thái, lac sa bruk piah caik akaok sahaneng saong pasram tangin gheih ngak di drei piah caga yam tame raidiuk.

Oh lac mekre iek, piêu daok ndung bak rilo makna dalam raidiuk di urang Thái. Piêu lac pandap piah sanya pagol taom gaok gauk di dom likei dam, kumei dara Thai, lac pandap alin  tuk urang kumei mai sang pasang, jeng meda lac pandap paling yang dalam harei rija, piah me-om mbaok urang tuk plang lahik. Rai urang kumei Thái dahlau deih, meng tuk thau jhik pet, thau menyim ye brei ngak khan piêu, hu yau nan tal tuk tok pasang meng ginup khan piah alin ka gah pasang.

Urang kumei Thái praong tagok brei caga piah khan piêu meng ginup. Dahlau diah, urang kumei Thái tok pasang ye adei sa-ai gah pasang hu hadom urang praong ye brei alin ginup khan pieu ka abih dom urang nan. Anek kumei ye alin khan pieu, daok anek likei ye alin patanh, atau khan bai jhik capha, tui bhum palei. Bhian di nyu, sang hu rilo adei sa-ai ye brei caga 3, 4 pluh khan piêu piah alin. Hadei di nan, urang alin taong abih dom mikva praong thun dalam but pajaih. Urang kumei likau drei la ayut likei di drei ye meda mek khan pieu tambak tagok takuai piah hadar tal ayut likei di drei. Nan lac makna di khan pieu.

Piêu oh lac ngak gheih mekre khan ao ngui cuk meng kan, bo daok brei mboh dom ilamu siam gheih, ndung bak hatung hatian di urang Thái./.