Mai veik palei Kret Krot, xã Hra, mboh di anak meta bruk siam mekre, salamat. Anek naih ba gauk jo me-in, urang praong jar var haong bruk paik cà phê, buac bei plom. Tapa nan, takik thei sahneng lac, palei ini dahlau deih hu mbang ngin jhak yuk tapa, ngak ka rilo urang likei klaak diuk nao tui tà đạo, oh khin ngak mbang hagait. Ong Đinh Mak, sa urang đảng dalam palei Kret Krot lac:

 “Dahlau deih, anek kamuan dalam palei Kret Krot kol dahlak tui Tà đạo Hà Mòn, lac hu bingi sahanang min oh biak yau nan. Thau lac suan jalan, oh hu hagaitt”

Raidiuk di jaik 140 sang gam saong 860 urang, taong abih jeng lac urang bangsa Ba Ba daok di Kret Krot hu siam mekre veik, saong meda lac hu hadah hadai jang hadei di dom thun njauk Tà đạo Hà Mòn me-om pacang. Dom urang dahlau jia saong nao tui Tà đạo Hà Mòn, klaak sang danaok, klaak hamu puh, urak ini hu thau ka drei. Sa-ai Vung, umo 38 thun, bangsa Ba Na, bhian hu mbaok tame pathau khan, patagok Tà đạo Hà Mòn di palei Kret Krot, brei thau:

“Meng thun 2012, dahlak hu thau Tà đạo Hà Mòn oh hu biak. Urang pathau khan ye drei oh pang tra. Dahlak saong mikva dalam palei klaak Tà đạo, kuhria bruk ngak mbang, pala drak.”

 Piah palahik Tà đạo Hà Mòn, dom gah chức năng, ba akaok nan lac Bộ chỉ huy quân sự tỉnh Gia Lai saong huyện Mang Yang taduan bruk nao tal 3 palei nan lac Bơ Chăk, Kdung 1 saong Kret Krot piah gam mbang, gam daok, gam ngak hamu, ngak puh haong mikva. Tapa nan jak ba, pathau khan brei mikva thau hu bruk njauk, bruk suan. Tal harei ini, abih 3 palei hu mai veik njauk angan lac xứ đạo bình yên, Tà đạo hu tah klaak, lihik abih. Đại tá Dương Thái – Chính trị viên phó Bộ chỉ huy quân sự tỉnh Gia Lai brei thau:

  "Urak ini tapon nyom bol pan phao kraong di tỉnh hu mbaok di palei 46 urang. Adei sa-ai mbang, daok haong bhap bini ye bhap bini biak jia, rilo sang biak anit bộ đội, urang ba ploi, ba baoh dak haong dom janih karei bo urang pala hu mai brei ka bộ đội. Saong bộ đội jeng biak jum pataom haong bhap bini, mbang, daok haong bhap bini, biak anit ranam gauk”.

Uan tabuan kayua Tà đạo Hà Mòn hu tah klaak, lihik abih, puk palei hu siam mekre veik, dom palei Bơ Chăk, Kdung 1 saong Kret Krot ba gauk peih bruk tah klaak Tà đạo yau sa kadha praong di palei. Harei peih bruk tah klaak tà đạo nan, hu mbaok dom urang dang akaok Tỉnh ủy, HĐ bhap bini, UB bhap bini, tapon nyom bol pan phao kraong tỉnh saong rilo mikva labik ini hu pataom iek veik bruk đấu tranh bền bỉ; brei mboh bruk sa hatung hatian di bol bala saong bhap bini Gia Lai. Panuac sanya di mikva labik ini lac jum pataom gauk, lac pamaong tal dom kadha siam mekre. Taha Đinh Đớt, palei Kret Krot, xã Hra chreih chrai lac:

 “Harei ini lac harei biak bui sambai di palei Kret Krot. Tà đạo Hà Mòn hu tah klaak, kol drei urak ini daok padang palei bahrau, menuac bahrau, kol drei jum pataom gauk dak padang puk palei, ngak kinh tế, pala tangei, pala bei plom, pala cà phê.”

Bơ Chăk, Kdung 1, Kret Krot saong rilo puk palei hu siam mekre veik hadei di mbang njauk ribuk Tà đạo Hà Mòn. Min yau dom puk palei karei di Tây nguyên, mikva labik ini daok kham merat dak padang puk palei khang gah kinh tế, meda gah ilamu saong dak padang bruk jum pataom khang kajap, ngak tayah bruk kanjah jhak, caong neh rabha di kol khamang../.