Bhap bini dalam taneh ia Viet Nam dalam nan hu bhap bini Cam meda lac thei jeng yau hu hatai anit ranam, hadah mbaok meta ka bhum tasik gah ia harei tagok di Taneh ia. Bhap bini Cam daok di ban raya Ho Chi Minh meng rilo thun ini mai hu brei mboh hatung hatai, bruk ngak di drei dalam bruk khik caga quyen ngak po taneh ia, yau padang kadung jien “ Pamaong tal Truong Sa anit ranam”, vak harak payua dom urang lin daok ngak bruk di bhum taphia negar, kaoh pulao, nhắn tin daong ka Truong Sa…Tapa dom bruk ngak hu makna yau nan, nyu pambuak tasik kaoh pulao anit ranam saong angaok thu, klah rabha dom kan kandah saong bhap bini daok di kaoh pulao atah bayah, daong ka dom urang lin kajap tangin pan phao khik caga quyền ngak po Taneh ia.

Kaoh pulao Truong Sa yaom lac daok atah di baoh taneh thu yaok rituh hai ly, di kreh tasik praong ia dalam hijao, riyak patih kok min labik rilo darah nan di Taneh ia tuk halei jeng daok jiak taphia angaok taneh thu kayua hu dom kham merat di rilo urang anit ranam kaoh pulao saong tasik. Yaom lac oh ndih tapui di bhum tasik, sa-ai Siti- Nore-Tơ ndih tapui saong praong tagok di ban raya HCM min kaoh pulao tasik palei negar Viet Nam yau hu dalam rilo darak drei. Yaom lac raidiuk daok kan kandah, min hatai anit ranam praong ka bhum tasik palei negar nyu jeng prein khang pachreih sa-ai ngak dom bruk hu makna pamaong tal dom urang lin daok ngak bruk pak Truong Sa. Sa-ai Siti-Nore-Tơ khan lac: “Hukin rik jien daong ka urang lin daok Trường Sa, yaom lac oh rilo min tapa na brei mboh hatung hatian di drei ngan saong urang daok ngak bruk khik kaoh pulao tasik palei negar hu salamat brei ka drei mbang Tết hu bui sambai”.

Jeng yau sa-ai Siti-Nore-Tơ, ong Haji Ysa Umơ-Hakim ja-ma-ah Muwahidin, quận 9, thành phố Ho Chi Minh klak rabha dom druat druai tuk jak ba dom mikva Islam tame dom bruk ngak pamaong tal Truong Sa. Ong khan yau ini: “Hukin piah hu 5 minit, atau 10 minit, lin meyai veik bruk daok tasik Truong Sa brei ka araih puk drei thau piah klah rabha saong Đang, Karja drei. Hulin jak ba araih drei caik hasit harak jien ndon daong Trường Sa daok drei.”

Dalam tuk jaik tal Tet thak athaih thun 2014, yaok ribau sinh viên dom sang bac đại học, cao đẳng di ban raya HCM chreih chrai ngak thiep, vak harak thu payua tal dom urang lin daok khik bhum taphia negar, kaoh pulao, nhan tin rik jien daong Truong Sa. Ayut Thap Tai Huy, bangsa Cam, saih megru Sang bac Đai hoc Cong nghiep ban raya HCM brei thau hatung hatai di drei tuk hu nhan tin rik jien daong Truong Sa. “Dahlak ein jien mbang panal page piah nhan tin daong Truong Sa. Dahlak mboh bruk nan sa bruk njauk ngak, dahlak daok jak ba ayut saong baoh sang di drei rik tame gac” ini panuac khan di ayut Huy.

          Daok biak ralo kadha druat druai karei tra, dalam tuk Tet mai xuân tal, oh lac taong abih khol drei caik hatai anit pamaong tal kaoh pulao ranam bo dom adei sit bangsa Cam daok di ban raya HCM jeng hu jak gauk vak harak thu payua dom urang lin daok pulao Truong Sa. Dalam harak thư di adei Mohamad Saleh, anek saih bac tal 4, sang bac Tieu học Nguyen Truc, quan 8, payua dom urang lin Truong Sa hu labik vak yau ini: “Dom cei bo ndoi anit ranam! Harei Ini hulin vak thu ini payua tal dom cei. Brei hulin payua panuac rivang dom cei saong dom ayut langiu nan  prein yawa khang kajap ha-oh? Dom riyak langiu tasik paoh tame nyu yau brei hulin thau lac dom cei daok harei melam khik caga brei taneh ia saong manuac sia hu salamat. Hulin oh thau ndem hagait jang lingiu baoh panuac tadhau ayuh dom cei hu prein yawa khang kajap. Hulin caong khin meda hu daong hasit hagait nan ka dom cei, dom ayut daok di pulao Truong Sa.” Adei Mohamad Saleh caong khin yau ini: “ Hulin caong khin harak thư di lin hu nao tal tangin mik bo ndoi, lin kham bac ka naih joi. Lin caong khin hadei ini hu daong hasit ka dom mik bo ndoi daok saong ayut umo yau lin daok Trường Sa”

Daok urak ini, lac hatung hatai di adei Nasakin anek saih bac tal 11A, Trường Pasak pato megru thuong xuyen, quận 8: “Hulin hu caik jien brei ka sahabat daok kaoh pualo Truong Sa, sa adit lin rik 5 ribau đồng. Hulin caong khin sahabat di lin daok kaoh pulao hu labik bac, hu sang piah daok.

Tet thun ini bol lin saong bhap bini daok di dom kaoh pulao Truong sa mboh am dalam hatai jang meng hu bruk klak rabha di bhap bini urang Cam, daong pabak jang prein khang brei ka urang jakar, urang lin di labik kaoh pulao atah bayah yam tapa dom kan kandah khang hatai khik tasik palei negar hu salamat./.

Kadha vak di Bhummi