Dom thun tapa, bhap bini xã bhum ceik Xuân Trạch, huyện Bố Trạch, tỉnh Quảng Bình hu patagok khang bruk raong dar ko mek ia. Dar ko hu ba jien tame biak rilo, rik daong patrun kan kathaot khang kajap ka bhap bini di labik ini. Kadha vak di urang vak Tuyết Lê daok di bhum kreih negar brei thau ka bruk nan. Daa mikva saong taong abih gauk tui pang”  

Bruk raong dar ko mek ia di ong Dư Xuân Cảnh daok di palei 9, xã bhum ceik Xuân Trạch, huyện Bố Trạch, tỉnh Quảng Bình hu ba mai rilo bui sambai ka baoh sang ong meng rilo thun ini mai. Ong Cảnh brei thau: raong dar ko phun jien buh tame takik, pandap mbang ka dar ko hu meng lingik tasik. Labaih 7 thun raong dar ko mek ia, meng dom tapol dar ko tuk camereip, tal urak ini baoh sang ong hu labaih 50 tapol dar ko. Ong Dư Xuân Cảnh brei thau: tui yaom pablei sa lit ia dar ko meng 300 tal 400 ribau đồng, yaok thun baoh sang ong laba hu 100 triệu đồng:

 “Phun jien buh tabiak tuk camereip ka sa sruh dar ko meng 600 tal 700 ribau đồng, dalam tuk raong ye drei peih praong tapon tabiak. Dahalau daih, baoh sang daok dalam angan baoh sang kan kathaot, meng raong dar ko kinh tế hu patagok, hu jien brei anek nao mbang bac, rai diuk ginup meda jang dahlau. Peih praong bruk raong dar ko ka dom baoh sang karei, daong ka urang patagok kinh tế”

Tui ong Cao Thế Vĩnh, Phó akaok UB bhap bini xã Xuân Trạch, hu tuk dalam xã hu labaih 100 baoh sang raong dar ko mek ia. Bruk raong dar ko hu ba jien tame tani tanat, daong ka mikva yam tagok truh kan kathaot khang kajap. Ong Cao Thế Vĩnh, phaok akaok UB bhap bini xã bhum ceik Xuân Trạch, huyện Bố Trạch, tỉnh Quảng Bình brei thau:

 “Dom baoh sang hu daong meneing phun jien piah raong dar ko patagok biak siam. Raong dar ko biak kan, yaom lac laba biak glaong. Ini lac sa dalam dom jalan ngak bo Đảng ủy, UB xã sangka. Yaom lac piah khik kajap bruk raong min lac sa kan kandah bo dalam tukvak anak tal xã jeng duah jalan pachreih ba tacei pato mikva patagok bruk ngak ini”.

Urak ini, dalam tỉnh Quảng Bình hu yaok rituh baoh sang raong dar ko mek ia, ralo meng daok di dom huyện Minh Hóa, Tuyên Hóa saong Bố Trạch. Piah daong ka bhap bini patagok bruk raong dar ko, yaok thun, dom pakat kapul urang nông dalam tỉnh hu tín chấp saong gilang pariak sarak karja, daong ka yaok rituh baoh sang mesraiy phun jien peih praong bruk ngak ini; taphia di nan, pambuak saong dom gah chức năng peih tal pasram megru ilamu raong dar ko ka mikva. Ong Hoàng Văn Mịn, Phó Giám đốc Sở ngak nông saong patagok palei pala tỉnh Quảng Bình brei thau:

 “Langiu sarak di tỉnh hu pablak saong dự án phân cấp patrun kan kathaot pasram megru, daong padang thương hiệu saong daong doanh nghiệp piah blei ia dar ko di urang nông. Raong dar ko phun jien buh tame takik min hu laba biak glaong. Kayua yau nan ye hu daong ka dom baoh sang kan kathaot tabiak truh kan kathaot khang kajap”.

Yaom lac hu ralo kein lagaih ka bruk raong dar ko mek ia min bruk raong dar ko di mikva daok lac bruk tự phát. Ia dar ko Quảng Bình oh ka hu yaih khan rilo angaok darak pasar. Kayua yau nan ye, tỉnh Quảng Bình gam saong urang nông njauk padang thương hiệu dar ko Quảng Bình hu angan je ngan saong urang blei pandar./.