Huyện Duy Xuyên, tỉnh Quảng Nam hu mong yau “pasak tơ lụa” palei Quảng. Dalam saman hưng thịnh, pak ini hu labaih 2.000 héc ta taneh pala dâu raong tằm, sản lượng kén yaok thun hu meng 1.300 tal 1.500 tấn. Thun bilan nao tapa kayua ilamo kỹ thuật raong oh ka lagaih, máy móc jamriak klak, lạc hậu, labik pablei  oh tani tanat… jaik abih mikva oh daok mbak carak haong bruk pala dâu raong tằm, palei ngak daok dang anak bruk mbuan si lihik nao. Karja puk palei jeng hu ralo kham merat pasiam veik palei ngak tui jalan ba tabiak dom sarak pachreih đầu tư min bhap bani jeng oh hu mai veik haong bruk ngak meng kan ini. Ong Lê Trung Cường, Phaok akaok UB bhap bani huyện Duy Xuyên, tỉnh Quảng Nam brei thau: Meda padang veik bruk pala dâu raong tằm, daong gah kỹ thuật, pajaih dâu, saong daong ka bruk raong dâu tằm tui jalan bahrau siam jang, oh daok ngak thủ công yau dahlau diah. Saong njauk ngak tabiak hu năng suất, ngak ka bhap bani thau cambaih laih jang ka bruk cakrok patagok dâu tằm urak ini karei haong dahlau diah, gam haong doanh nghiệp pambuak pagam bruk blei tame pandap panda ngak tabiak.

      Meng yaok ribau héc ta taneh pala dâu di dom huyện Duy Xuyên, Đại Lộc, bal sit Điện Bàn, tal urak ini, mblang taneh pala dâu di tỉnh Quảng Nam tok daok 11 héc ta, ngan haong 30 baoh sang ngak bruk ini. Dom baoh sang pala dâu, raong tằm mboh ralo lac piah pablei nhộng. Dom bein dâu hijao salih ka dom janih phun pala karei. Dom palei ngak daneiy angan meng kan urak ini tok daok takik sap daneng menyim lách cách. Piah patagok bruk pala dâu raong tằm, ươm tơ menyim jih dalah, tỉnh Quảng Nam hu tabiak sarak pachreih doanh nghiệp buh jien tame ngak, pambuak gauk ngak, patagok palei ngak pambuak haong du lịch. Ong Lê Thái Vũ, Akaok Công ty Cổ phần Tơ lụa Quảng Nam brei thau: Tỉnh daok jao ka Công ty Cổ phần Tơ lụa Quảng Nam nan lac labik ieu pataom dom chuyên gia gah dâu tằm tơ,  dom urang thiết kế, blei mai dom jamriak bahrau abih piah ka Quảng Nam hu jalan patagok  veik bruk pala dâu raong tằm bo Quảng Nam nan lac sa dalam dom pasak tơ lụa di Việt Nam.

Tui ong Lê Trí Thanh, Phaok akaok UB bhap bani tỉnh Quảng Nam, tỉnh ini daok kuhria tal bruk pataom hamu taneh, jhul pakhang bruk pataom hamu di dom bhum taneh bồi tapen kraong piah ngak jeng labik pala phun dâu prong. Dahlau di abih njauk caik doanh nghiệp ngak pasak di chuỗi giá trị ini. Doanh nghiệp meda duah hu darak pasa, hu sarak pambuak bruk haong bhap bani. Kadha prong tra nan lac ngak habar piah ka bhap bani mek hu kein laba glaong, khang kajap meng bruk pala dâu raong tằm khang kajap jang dut haong dom janih phun pala karei. Doanh nghiệp njauk pambuak hu haong darak pasa, oh lac darak pasa dalam taneh aia bo daok pablei tabiak darak pasa dunya. Karja ye roh duah ba tabiak dom sarak kak kajap jang talei pambuak bruk nao mai di doanh nghiệp haong bhap bani puk palei.

         Tui kuhria mboh di Hiệp hội Dâu tằm tơ Việt Nam, urak ini darak pasa dunya daok kurang 40% tơ lụa piah pandar, ngak. Bruk ini daok peih tabiak sa jalan siam lagaih bahrau ka tơ lụa Quảng Nam langyah hu labik pablei tabiak, sa kadha ba tal siam mekre khang kajap di bruk ươm tơ dệt lụa./.