Pathau mikva saong taong abih gauk! Jeng yau ragu sli, lượn di urang tày, Nùng saong sình ca di urang Cao Lan, Soọng Cô di urang Sán Dìu  lac sa ragu ragam bhap bini bingi pang saong panuac daoh nao mai di dam dara. Hu khik veik meng rilo rai rah, urang Sán Dìu biak takre daoh kayua Soọng Cô nyu mai meng rai diuk yaok harei, brei thau hatung hatian, hatai caong khin di urang ngak. Soọng Cô nan lac “suan yava” ilamu di urang Sán Dìu. 

Tui “dalikan baoh kadoh” ndom ka asal di bangsa Sán dìu, khan lac meng kan langik haluk daok jaik gauk, hu sa palei kaya meda rilo menuac daok tapen baoh kraong mekre. Bloh hu sa harei po kanong, brei ia kraong tagok glaong ngak metai abih. Dalam palei hu dua adei saai samar takai rui tame baoh kadoh thu, ndong tagok tui ia nan ye daok diuk hu.  

Tuk ia trun, kayua dalam bhum oh daok thei, dua adei saai tok gauk, ndih tapui ralo anek ngak ka urang Sán Sìu hồi sinh veik. Yaom lac palei hu ralo menuac min jeng lac anek kamuan ralo drah haong gauk, oh tok gauk hu njauk tapa palei karei piah duah diuk, duah pasang. Piah ngak ka urang di palei daih mbaoh megei hatai, urang mek sap daoh piah brei thau hatai di drei. Daoh Soọng Cô tabiak rai meng nan saong daok khik veik tal harei ini.

Soọng Cô nan lac sa janih daoh ví đối đáp pambuak saong ilamu bhap bini di urang Sán Dìu. Daoh Soọng Cô ralo meng lac daoh dam dara saong dom panuac daoh ru, urang daoh dom panuac daoh ndom ka bruk anit ranam gauk, pok meyaom bruk mekre di lingik tasik, pok meyaom bruk thủy chung diuk pasang, dar phor di ong muk, amaik ame, patao pakai anek menuac diuk rai siam mekre, thau akaok thau iku… tuk sap daoh pok tagok pang mboh biak bingi, tuk trun tuk tagok ngak li-an hatai anek menuac, dom panuac daoh bình dị nan hu ngak jeng pandap mbang tinh thần, yaom lac hu tuk trun tuk tagok tui thun bilan min nyu daok hu pren diuk khang saong daok kandong veik dalam hatung hatian di urang Sán Dìu.

Soọng Cô meda daoh di labik halei jeng hu, urang meda daoh sa melam, ralo melam, daoh dalam sang, tapen craoh, tuk nao ngak puh, daoh dalam ndam likhah, dalam tuk ru anek atau dalam tuk nao mein dalam palei saong daoh tadhau yuh thun barau, daoh dalam dom rija roya di urang Sán Dìu.

Dom melam daoh di dom likei kamei Sán Dìu bhian rah tabiak dalam sang, tapen craoh, atau di mblang taneh praong anak palei. Meyah daoh dalam sang, camereip di abih tuai brei likau po sang piah hu daoh dam dara. Tuk po sang brei daoh, dom likei kamei kham merat ba abih ilamu di drei tabiak daoh saong meng nan lac sa melam daoh dam dara.

Daoh dam dara oh lac jalan brei mboh bruk naih gheih di dom gu likei kamei bo tapa nan nyu daok brei thau hatai caong, hatai sahneng di dom urang daok duah thau gauk. Meng dom melam daoh ini bo oh thau hadom likei kamei anit ranam gauk.

Dalam daoh dam dara, hu dom panuac daoh brei thau hatai uan tal gauk di likei kamei daok khin gauk, yau ye: uan saai lo saai lei/ uan melam oh ndih, uan harei oh mbang/ uan saai lisei oh khin huak/ dua gah tangin ao pasah njok yau hajan.

Tui hatai sahneng di urang Sán Dìu ye ndam likhah meda kurang  pabui, kurang alak min oh kurang hu ragu daoh Soọng Cô, kayua nan lac dom adat cambat brei hu dalam ndam likhah di urang. Soọng Cô, dalam ndam likhah bhian kayua dom gu likei kamei daoh javap calei gauk, gah likei brei dua urang likei daoh, gah kamei jeng brei dua urang daoh. Daoh luac harei luac melam mbiah tal tuk salah likhah.

Tapa thun bilan, meng ralo makna, lagu daoh Soọng Cô daok lahik nao, saong urang thau daoh Soọng Cô oh daok ralo. Dom kadha daoh kayua hu pato veik tapa cambuai tui tukvak tal urak ini oh daok khik hu. Kayua yau nan ye, bruk khik ramik saong patagok lagu daoh Soọng Cô oh lac hu makna khik ramik ilamu hadah krah di urang Sán Dìu bo daok piah “suan yava” ilamu di urang Sán Dìu mbang tame dalam rai diuk ilamu di bhap bini./.