Yaom lac njauk pablei tapol pabo yaom lap, sa-ai Hứa Minh Sì, daok di palei  Như Ngọc, xã Phước Thái, huyện Ninh Phước, tỉnh Ninh Thuận, jeng kham merat raong  4 urang anek mbang bac tal labik tal dhua. “Drei ngak piah hu jien raong anek mbang bac. Drei oh hu bac paje nan ye drei kham merat raong anek mbang bac. Harei ini abih biak ralo jien padai. Urang halei patak pataom ye yaok bilan 3 triệu sa urang. Dut haong palei pala nan lac yaom jien biak prong. Njauk ngak harei ngak melam meng hu jien. Bac piah hu mbaok tame xã hội, hu bruk ngak tani tanat meng hu mbaok tame xã hội. Hadei ini thau jalan ngak mbang.”

     Ralo labik, hatai caong khin di anek naih lac bruk ba caik jalan saneng di amaik ame tame kaol nyu, pandar kaol nyu ngak tui. Pak Phước Thái, mikva urang Cam hu jalan mong karei. Hatai caong, hatai takre salih bahrau rai diuk mai meng akaok sahneng di  anek naih, amaik ame tok lac urang tacei ba, ngak brei ka hatai caong takre nan par atah. Ini jeng lac jalan pato pakai anek bhik di sang ong Ất Minh Tọ, daok di palei Hoài Ni, xã Phước Thái: "Dahlak hu 7 urang anek, 6 urang bac đại học. Urang bac kế toán, urang ngak bác sĩ, urang luật sư, urang kỹ sư kinh tế, urang bac sư phạm. Sang dahlak hu ilamu bac da-a, bac abih tal 9 dahlak thau lac urang halei jeng hu hatai caong takre, atau hu năng khiếu hagait nan, dahlak brei ka anek ruah. Urak ini anek takre hagait, năng khiếu di anek lac hagait, brei ka kol nyu tui hatai caong khin di nyu.”

     Ong Ất Minh Tọ taong yaom glaong bruk ngak di kapul pachreih bac, pachreih megru di talei but pajaih drei, jeng yau dalam xã Phước Thái: “Bruk bac daa pak ini dahlau diah yếu ralo, 1 xã ini nao bac pakat 3 oh samu 1 palei diah. Hadei di tuk pak ini sahneng lac padang kadung jien piah pachreih bac, khaol dahlak tự hào lac bruk pachreih bac pak ini  hu dahlau karja, meng tuk hu bruk halei ye mboh cak rok patagok. Urak ini dahlak mboh anek saih sinh viên biak ralo, urang thành đạt jeng biak ralo.”

     Tui ong Lưu Văn Thủy, Akaok UBND xã Phước Thái, dahlau diah, urang Cam pak ini tok thau ngak hamu. Meng tuk hu bruk pachreih bac dalam xã cakrok patagok, anek kamuan mbang bac jeng manuac jeng urang, sami samar jang, salih bahrau jalan saneng, peih tabiak ralo jalan ngak mbang pablei salih yau pablei salih  vật tư nông nghiệp, pasiam veik mac moc, cơ khí… Ralo urang bac tamat blaoh hu ba ilamo mai duh ka puk palei, patagok bruk ngak, dịch vụ: "Dahlau diah, urang Cam saneng lac tok tame ngak bruk Karja meng iew lac hu bruk ngak, meng iew lac thành đạt. Urak ini jalan saneng karei paje, dak padang bruk ngak ka drei tui hatai saneng di drei. Saong mbiah tal urak ini, sa dalam dom  pren khang rik daong biak prong ngan haong puk palei khaol dahlak nan lac dom adei bac tamat bloh, hu bruk ngak tani tanat. Nyu hu kein laba biak ralo, ka sa lac hu jien mek tame, dua tra lac akaok saneng hu peih tabiak. Dom adei nao bac ginup abih dom gah, langiu di bruk duah jien tame ka sang drei ye daok hu jalan saneng, jalan ngak, hu ilamu glaong ye dalam sang khang hatai buh jien tame ngak mbang.”

     “Nao tabiak gah langiu”, megru hu ilamu bahrau, rai rah dam dara di Phước Thái urak ini hu ralo salih bahrau dalam hatai saneng jeng yau bruk palih ruah bruk ngak./.