Saai Thuận brei thau, hadei di tuk tame tal pasram rong athur glai  kayua Phòng Kinh tế ban sit Trà Vinh peih tabiak di thun 2012, saai palih bruk raong chồn hương. Saai tagok tỉnh Bình Dương blei 2 drei chồn hương pajaih, yaom 6 triệu đồng mai rong iek. Hadei di 2 thun, gam rong gam duah thau, chồn menek hu 10 drei pajaih. Urak ni saai Thuận hu labaih 60 drei chồn, dalam nan hu 30 drei menek. 

Tui ilamu di saai Thuận, chồn hương lac janih takre hacih, brei puh ramik haci hacih var ro yaok harei, khik ka var ro thu, laneing lanoi song bhian pruh ia ngak liar tabung var ro dalam bilan pandiak, kayua chồn oh takre langik pandiak. Meyah var ro hadah rilo ye chồn pandik meta. “ Chồn rong dok khik bản tính hoang dã biak jhak, meyah rong song guak nyu bhian kaik gauk tal metai, yau nan ye brei ngak dom ô var ro sit piah rong yaok drei sa ô” saai Thuận brei thau.

Saiai Thuận daok brei thau lac, pandap mbang ka chồn hu động vật song thực vật. Tuk harei, saai bhian brei mbang boh kayau tasak yau patei, lahong. Melam mai ngak bu ikan, rilaow ka chồn mbang. Chồn anek rong 3-4 bilan lac meda pablei pajaih hu, hadei di 11-12 bilan meda pablei chồn menek.

Saai Thuận kuhria mboh lac, sa drei chồn hương rong dalam 5 bilan abih labaih 300 ribau jien pandap mbang, trak meng 3-4 kg ka sa drei, pablei ka urang mai blei tal sang yaom meng 1 triệu 200 ribau đồng – 1 triệu 500 ribau đồng sa kg. Dok chồn menek , trak meng 2kg meteh tal 3 kg sa drei pablei yaom meng 5 -6 triệu đồng sa gu. Kuhria rah tapa, yaok thun sang saai pablei labaih 15 drei chồn menek song chồn rilaow, laba hu labaih 150 triệu đồng./.