Piah palahik eik lipa kathaot rambah ka dom baoh sang oh hu hagait ngak mbang, oh hu bruk ngak mbang nan lac kadha kan saong dak kan jang ngan haong dom baoh sang oh hu hagait ngak mbang saong lac baoh sang urang jaoh jo. Min meng Dự án raong limo menek - Mô hình daong bruk ngak mbang ka urang jaoh jo bo Kapul daong ka urang jaoh jo saong ranaih metui medhal Việt Nam peih ngak pak tỉnh Trà Vinh yaom lac dự án sit min nyu langyah hu  bruk kan ini.

Thun 1970 mesruh metak rah tabiak khang, tuk umo bahrau 23 thun dalam sa mbang nao ngak pah, amuk Thạch Thị Xung daok di ấp Nhứt, xã Tân Hùng, huyện Tiểu Cần juak njauk baoh mìn ngak ka amuk lahik nao sa gah takai. Meng nan bruk nao mai jeng yau ngak bruk biak kan kandah. Rai diuk dak kan kandah jang tuk hu pasang hu anek, bloh pasang metai kayua ruak khang. Sa drei amuk raong urang anek njauk ruak baoh hatai dalam tuk sang kurang anak, kurang likuk. Sahneng lac oih tabiak truh hu kan kathaot, thun 2010 amuk Xung hu  Dự án daong bruk ngak mbang ka urang jaoh jo di Kapul daong ka urang jaoh jo saong uranaih Việt Nam daong 5 triệu đồng. Yaom jien ini amuk blei hu sa drei limo binai saong meng nan tal ini yaok thun sang amuk duah hu meng 10 tal 15 triệu đồng meng bruk pablei limo anek. Meng nan rai diuk hu siam jang saong tapa truh kathaot. Meng yaom jien patak pataom hu, amuk pasiam veik baoh sang taik tahak di drei hu Karja daong ngak meng 8 thun dahlau, yaom jien daok veik amuk blei pabui raong saong cak rok tapol limo. Amuk Thạch Thị Xung lac: “Baoh sang ini akaok mereip karja daong ngak, hadei ini hu daong brei drei limo gam haong jien patak pataom hu meng nao ngak pah, hu takik ngak takik, hu ralo ngak ralo, siam ye oh siam min  nyu khang kajap lô, urak ini kuhria mbang yaok harei min. Meng hu drei limo nan ye glaih glar yau halei jeng raong nyu, oh hu hamu taneh hagait piah ngak”.

Dreh yau amuk Thạch Thị Xung, sa-ai Trần Văn Đờn, umo 39 thun daok di ấp Chợ, xã Tân Hùng sang hu tal 5 urang bo oh hu taneh piah ngak, dalam tuk takai jaoh jo meng sit. Anak brukl kan kandah di baoh sang, atah di ini 3 thun, tuk bruk raong limo menek di Kapul daong ka urang jaoh jo saong uranaih metui Việt Nam peih ngak di puk palei, sa-ai khang hatai pataom mbaok tame saong mek hu siam mekre yau hatai caong khin, meng nan rai diuk hu tani tanat. Urak ini yaom lac oh ka tabiak truh kathaot min meng bruk daong njauk tuk, njauk manuac urang gam haong hatai kham merat yam tagok di drei, oh lavik tra baoh sang sa-ai Trần Văn Đờn meda tabiak truh kathaot. “Sang jeng kan kandah, oh hu jien ndo bo hu karja daong yau nan mboh biak uan tabuan, meyah oh hu daong ye jien halei piah blei. Dahlau deih karja ieu mesraiy jien piah blei pabui raong min oh khin, cang thei pah hagait ngak nan. Raong limo lac suai lavik, patak pataom yau buh óng, raong tal urak ini kuhria tabiak jeng hu ralo triệu paje”.

Tui Ban khik iek dự án, dalam 19 baoh sang urang jaoh jo hu daong 20 drei limo mbang I, tui yaom jien abih tih lac 100 triệu đồng, tapa 3 thun urak ini tapon limo tagok hu 50 drei. Tui nan, hu bloh 9 baoh sang tapa truh kathaot, dom baoh sang daok veik jeng hu rai diuk siam mekre jang. Meng bruk ngak hu yau ini, Dự án daok peih ngak mbang II ka 11 baoh sang ngan haong 12 drei saong tal harei ini tapon limo patagok hu 15 drei. Yau nan abih tih tapon limo di 2 mbang nan lac 65 drei, yaom labaih 1,6 tỷ đồng. Yau nan, Dự án oh lac daong ka urang jaoh jo pasiam rai diuk, tah klak mặc cảm bo daok ngak brei salih bahrau hatai saneng di bol bhap rahra. Saong daok palagaih ka Đảng bộ xã Tân Hùng peih ngak siam jang bruk patruh eik patrun kathaot piah hu pok brei angan lac xã palei pala bahrau. Ong Kiều Quốc Việt, phaok akaok UB bhap bani xã Tân Hùng, akaok Ban khik iek dự án khan lac: “Njauk ndom lac dự án ba mai biak rilo siam mekre, kayua urang jaoh jo nan lac urang thiệt thòi dalam xã hội, urang mboh drei yau naong trak ka xã hội bo tuk dự án daong ka urang ye urang mboh biak uan tabuan. Kayua mboh lac drei hu iek samu yau dom urang karei. Dalam tuk palih ruah baoh sang khaol dahlak ruah biak catang, lac sang jaoh jo min meda raong limo hu, thau kham merat ngak mbang. Meyah palih ruah oh njauk phun jien lahik, kein laba oh hu. Kayua nan ye ini lac kadha bo khaol dahlak njauk kuhria tal”.

Yaom lac phun jien bo dự án daong oh ka ralo, min tuk dom baoh sang hu daong thau pandar phun jien njauk bruk saong thau kham merat ngak mbang ye ini lac jalan ngak mbang siam piah ka dom baoh sangg nan yam tapa truh kathaot saong hu iek glang siam jang ka urang jaoh jo saong uranaih metui dalam baoh sang. Dự án oh lac daong langyah bruk an sinh xã hội ka puk palei bo daok hu makna biak siam, daong ka urang jaoh jo hu jalan yam tagok, khắc phục kan kandah kathaot rambah meng dalam hatai saneng, tah klaak dom mặc cảm saong khang hatai yam tagok ba drei tame haong cộng đồng./.