Pathau mikva urang nong : meng thau patagok bruk raong pabe rilo, pabe binai bo mikva urang nong di palei Cam xã Khánh Hòa, huyện Châu Phú, tỉnh An Giang hu raiduik laneng lanoi. Dalam kadha „urang ngak hamu caong thau „ harei ini, daa mikva saong grauk yut duah thau ka alamu raong pabe hu kein laba.

Raong pabe patruh kathaot

Mikva urang nong di xã Khánh Hòa, huyện Châu Phú, tỉnh An Giang bhian raong pabe kareik dalam var. Kayua raong pabe kareik dalam var nyu lagaih saong mikva Cam daok pak ini. Sang ông Châu Mach Y Soh, Châu Mach Xa Lê…dahlau thiah kan kathaot, kayua kurang taneh pala drak, oh hu phun jien, oh gheih bruk hagait. Raidiuk pagam pambak tame bruk nao ngak pah ngak pajoa, pablei hàng rong nan ye oh tani tanat.

Meng tuk hu daong jien blei pabe pajaih, hu pasram alamu raong, pasang iek tapol pabe, mikva hu salih barau raidiuk. Ông Amin, sa urang raong pabe lavik thun di palei Mỹ Khánh brei thau, raong pabe oh kan kandah. Pabe takik ruak kik saong pandap mbang jeng hu rilo dalam palei. Pabe nyu mbang tạp, meda mbang hu labaih 100 janih hareik, hala kayau karei di gauk yau ye njam puan, hala panat, hala phun gòn…yaok drei pabe praong mbang jaik 7 kg pandap mbang sa harei, pabe sit jaik 5 kg/sa harei. Ngak var ka pabe jeng mbuan jang. Kayua pabe randap daok tui tapol, takre libik thu lahei.

Bhian di nyu, pabe menek dua mbang dalam thun, meng tuk khin tano tal tuk pabe menek dalam jaik 5 bilan min. Tui pajaih pabe saong tui bruk mbang menyum, pasang iek bo pabe menek meng 1 – 4 drei. Hadei di tuk menek labaih sa bilan ye meda phối giống ka pabe binai. Pabe anek pajaih raong meng 4 tal 5 bilan pablei ka urang caong raong, hu yaom meng 3 – 4 triệu đồng /sa drei. Yau nan ye pabe binai pablei anek pajaih bhian hu jien mek tame glaong jang duk saong pabe rilo.

Urak ini, pabe rilo pablei biak nduac saong hu yaom, urang blei meng ban raya Hồ Chí Minh mai tal sang blei jaik 2 tấn pabe rilo sa bilan. Tui ông Amin, yaom pabe rilo meng 100.000 đồng – 120.000 đồng/sa kg. Urang raong pabe hadei di tuk kaoh tabiak jien buh tame jeng daok hu laba biak ralo. Sang ông Đôsah raong pabe rilo saong pabe binai jeng hu labaih jien padai. Bahrau ini ông Đôsah peih bruk raong pabe palimek hu kein laba biak ralo. Raong pabe palimek ba jien mek ralo jang, kayua takik tukvak pasang iek, qua vòng phun jien drah samal. Urang raong, tuk blei pabe pilih ruah drei pabe meng 15 kg ba mai raong meng 5- 6 bilan ba pablei tabiak darak pasal. Dom sang raong pabe brei thau, meyah raong 10 drei pabe palimek, hadei di 4 bilan pablei hu laba jaik 20 triệu đồng, rilo jang pala 10 công padai./. 

Thúy Linh