Adat paling yang hajan akaok bilan lac sa dalam dom adat cambat siam mekre di bhap bini urang M’nông daok di Đắk Lắk, piah likau yang hajan brei hajan siam ngin lagaih, brei ka bhap bini M'nông ralo bruk siam mekre. Adat nan brei mboh hatai caong caih menek, phun pala tamuh caduk tabiak bingu, anek menuac khang kajap saong caong khin dak padang puk palei dak harei dak kaya meda, trei sil.

Tuk dom mbang hajan sit, hajan oh hu cakla rah tabiak, bhap bini M’nông oh khin brei dom Giàng khanong, ngak cakla meda ba mai rilo kanjah jhak ka puk palei, nan ye bhap bini peih ngak adat piling yang, likau yang ba brei siam mekre, taphia di nan piah palao klaak dom kanjah jhak dalam thun.

Adat paling hajan akaok bilan hu peih tabiak meng adat paling dalam sang. Dom pandap hu caga piah ngak adat paling dalam sang nan lac: sa drei menuk tano daok diuk, sa panyin lisei, sa panyin diuk, dua panyin ralo pabui, sa akaok pabui, blau menuk, sa phun nêu meng kreim lồ ô glaong jaik 2 m caik di kreh sang, 2 ché alak cần caik duah gah.

Hadei di tuk caga ginup dom pandap, gru ieu yang (bhian lac dom urang praong thun) cuk khan ao bangsa, dang tabiak ngak adat paling hajan akaok bilan. Gru ngak yang cakak tapen dua gah cambuai drei menuk tano daok diuk, mek darah lai haong alak saong likau lac: " Ơ Pô Yang, harei ini dahlak daa dom Giàng mai mbang ralo pabui, mai menyum alak dalam ché, mai maong iek saong ba patuah jamo ka bhap bini dalam palei. Likau Giàng brei ka anek kamuan khang kajap, brei ka bu caik dalam buk tuk halei jeng bak abih, lisei dalam gaok oh me-ih. Luac thun Giàng brei hu siam mekre; oh hu eik lipa kathaot rambah, caong ka padai bak kho, tangei bak bồ, bak sang….". Gam likau, gru ngak yang gam mek blau menuk tut tame panyin alak bloh luk tagok dom pandap pandar dalam sang yau: geng sang, canaih, tagat, jaleing, pabah mbang anak, pabah mbang likuk, kanyal… piah likau yang brei hu khang kajap pren yaka ka anek menuac, brei baoh sang hu sron mbon, plaih dom bala dalam bruk ngak mbang.

Hadei di tuk ngak adat dalam sang, urang ba gauk nao tui gru tabiak langiu mblang, labik hu geng nêu piah ngak yang langiu lingik. Kapul chiêng gam nao vir taom dar phun nêu, gam taong chiêng daa dom Giàng mai hu mbaok, maong iek adat paling yang hajan akaok bilan. Gru ngak yang gam mek blau menuk tut tame panyin alak lai haong drah menuk luk tagok phun nêu, gam puac kadha likau dom Giàng brei adat peih bruk "hái lộc".

Kapul chiêng taong kadha "tame hội" kapul kamei tamia dom ragu tamia meng kan di urang M’nông… Dalam sap ginang chreih chrai, sap preo ieu pachreih tui di abih menuac urang, dom likei dam khang kadang meriak gauk ndik tagok phun nêu hu luk lamek, piah mek patuah dalam gùi sit. Urang halei ndik tagok hu phun nêu saong mek hu lộc meng baoh gùi sit, hu mek lisei dalam gui proi bak vir taom dar caong khin dom drei menuk, drei pabui… hu pandap piah mbang, blaoh caih mebaoh dak harei dak ralo, puk palei tuk halei jeng hu trei sil.

Puac abih di adat paling yang hajan akaok bilan, abih gauk nao tui gru piah patui ngak adat paling dalam sang, likau dom yang brei hajan siam, njam patam pala njauk, phun hijao tamuh caduk tabiak bingu, puk palei dak harei dak kaya meda.

Tamat dom adat, kapul chiêng saong kapul tamia ba gauk me-in dom bản nhạc bui sambai, urang ba gauk menyum alak cần, ndom klao chreih chrai, daoh tamia dom ragu daoh bhap bini, tamia dom ragu meng kan di bangsa M’nông uan raok dom bruk siam mekre, patuah jamo dalam rai diuk./.