Ruak aylah saong jalan iek ruak ini

Aylah metah nan bruk oh siam, nyu meda mai meng kurang sahaneng kuhria jeng yau oh hu jalan diukrai njauk, oh hu labik pambak tame jalan sahaneng,  takik piah mong iek bac megru, takre pandia rup huac di glaih glan, kan kandah, oh thau khan merat…Langiu di nan, prein yawa oh hu khang kajap ba tal ruak alah metah, manuac drei aylah dreih yau gilai pajeng trak kan si nduac samar hu.  

BN: Pathau bac si, ruak aylah yau habar nan?

BS: Dom bruk meda thau lac ruak aylah: Ngak bruk suai trak damah; Atau bhian paguol saong plaik njiak dom bruk bo drei njauk ngak salah dalam harei nan; Bhian haduh hatai oh ngak hagait, “ha pambah cang baoh baya laik”. Oh ngak, ba tabiak hadom hadom kadha piah pacang ka bruk oh ngak. Tuk halei jeng iek tukvak nan daok atah oh thau ramik tukvak piah ngak ka salah bruk trah samar di abih.

BN:Tuk thau lac ruak yau ngaok nan khol drei brei ngak hagait?

BS: Brei iek rauk aylah chip, ngak tui yau ini: 

-         Dahlau di abih brei salih birau jalan sahaneng  jeng yau jalan diukrai: kham marat ngak ka raidiuk drei siam mekre, glo akaok drei hadah krah, nan yau gru piah jhul kadhun likuh ruak aylah, yam tapa kan kandah, bac megru meng bruk ngak hu piah pachreih rup drei jayah ruak aylah.

-          Pakhang pabak, pasram patia jalan sahaneng: mesruh metak dalam rup drei, palahik bruk huac kanda, melau melit, duah jalan pachreih meng bruk ngak, lavik lavik ruak aylah meda lahik nao.

-         Parabha tuk vak ngak bruk, padeih padei saong ngak njauk tui tukvak ba tabiak: ngan saong raidiuk hu ginup pandap pandar, sami samar, chreih chrai bui sambai, ruak aylah oh hu labik daok.

-         Ndem pataom veik, ruak aylah oh meda huac min kan plaik njiak nyu, min mbuan ngak lahik, drei brei abih hatai kham merat atah klak ruak aylah. Ruak aylah njauk brei ngak palahik chip, juai caik suai lavik, caik dak suai dak kan si ngak lahik truh.

Jalan ngak palahik yau ini:

Parabha bruk jeng rilo bruk sit piah ngak, yau nan piah mbuan ngak salah saong pakhang kajap hatai jia tame bruk daok ngak. Caik tukvak piah ngak dom bruk oh njauk hatai atau oh takre nyu: piah pasram jalan diukrai, pasiam veik jalan bruk ngak suai damuai di khol drei.

          Tame ngak bruk chip: khan ao drei papah ye? Kadha bac da-a drei ngak baloh paje ? Sap pagap kadha bac ka harei page ye…Njauk brei ngak samar dom bruk, juai caik suai lavik. 

          Brei ngak dahlau dom bruk bo drei takre. Yau ye: drei oh takre ngak bai tap min takre bac tapuk, tư liệu ye brei ngak dahlau, piah pachreih jalan sahaneng di drei. Brei ba tabiak tukvak ngak salah bruk, ngak yau nan drei urang padrah drei ngak njauk tukvak, klak di suai ngak.

          Kham ngak: ba abih perin yawa saong ilamu di drei tame ngak, dalam tuk ngak juai kanda, khin duah jalan ngak birau meda mboh hu dom  naih gheih dalam rup drei.

 BN: Biak thau dhar phol bac si!