Bruk gam gam  tram rup dalam ia kli, oh ginup ia hacih piah rao rup pabhap di dom bhum ia sua nan nyu palagaih ka dom janih ruak langiu klik tamuh tabiak, bhian mboh di abih nan lac ruak ia mbang takai, patui di nan lac dom janih ruak laka katal, chàm, laka klik hu laneh.

Ruak ia mbang takai:

Ia mbang takai nan lac angan mikva bhian ieu piah tacei ruak bimao di takai. Ruak ini jeng hu iek lac ruak kayua bruk ngak di dom urang ngak bruk bhian gaok ia, ngak bruk di labik ia pasah…Makna  ba tal ruak nan lac dom bimao sit yau rak merai. Ruak meda brei mboh meng bruk tapaok kakah, pandung baoh ia atau laka labik plah takai. Di ala plak takai, di kandol takai saong vil val plak takai meda hu pandung baoh ia atau hu tal klik kapal sambo nâu meriah, angaok mbaok hu kakah sit racinh. Ruak ngak brei katal, kan daok. Meyah njauk bội nhiễm, urang ruak meda pandiak, tagok klangcang saong pandik. Tuk ini plak takai nyu brah tagok saong hu laneh. Jalan iek ruak: tuk hu laneh, pandik, urang ruak brei menyum jru kháng sinh, luk dom janih ia jru hu sambo yau ia jru sambo hijao Methylen, sambo ngu Gentian, sambo meriah Fuschin piah pametai anek ruak saong ngak brei thu laneh.

Dalam tuk cang ia trun, urang ruak meda luk dom janih jru pacang bimao, hadei di nan nao iek ruak piah hu gru iek ruak brei jru lagaih saong janih ruak di drei. Dom jru pacang bimao yau Antimycose, BSI, ASA, cồn kiến cò hu luk harei dua mbang, nyu lap jien, mbuan duah min ngak brei harao pandung saong ngak jhuk sambo labik klik hu  pasiam ruak nan.

Ruak katal

Makna ba tal ruak nan lac anek lakaih. Ruak pambak kayua taom gaok tapak meng menuac saong menuac atau tapa bruk pandar pandap saong gauk. Ruak hu luac thun min ralo jang di bilan ia sua, tuk dom baoh sang nao nyaik ia sua tame daok tạm dalam dom sang ton, oh hacih saat saong ruak ini nyu hu jalan tamuh tabiak. Ruak brei mboh tapa bruk tagok dom baoh ia, sambo patih vik di labik klik meda yau plah baoh tangin, plak tangin, takuai tangin, ala tian, di pha. Ngan saong uranaih , bhian mboh dom tanut gam baoh ia di pa-ak saong bìu (baoh plốt). Ruak biak katal, abih di nyu nan lac tuk melam. Bruk iek ruak ralo meng pandar jru luk pametai lakaih. Khin iek thit ruak ini, brei pahacih saat khan ao saong luk jru njauk. Luk jru bak rup meng takuai trun hadei di tuk menei ia saat, luk jru angaok rup pabhap mbiah tal biar harei hadei meng menei ia saong luk veik.

Hu ralo janih jru daong pametai lakiah. Lap jien saong lagaih ka bruk iek ruak bhap bini nan lac jru D.E.P. (diethyl phtalate). Urang ruak meda menyum pabak jru ndih, pacang katal di tuk melam, meyah njauk bội nhiễm (laka hu laneh) ye brei menyum pabak jru kháng sinh.

 Ruak bimao takai nan lac ruak bhian mboh dalam bilan ia sua bo makna praong nan lac kayua bhian gaok ia. Piah pacang cakak, mikva njauk khik brei kandol takai nyu thu meng bruk juak takhaok (meyah ia dauk biar), luk tapung talc tame plah takai,  nao meng giay gilai piah klah gaok ia (meyah ia ndik glaong). Bruk khik hacih saat rup pabhap meda ngak brei patrun patakik dom ruak nhiễm trùng saong kí sinh trùng di kalik yau katal, laka, ia mbang takai, lakaih./.