Ruak pandiak tabiak darah

Ruak pandiak tabiak darah lac ruak truyền nhiễm cấp tính, meda tamuh jeng jit kayua vi rút dengue. Ruak njom mbak kayua jamaok vằn kaik urang ruak nyaom vi rút hadei nan pambak ruak ka urang siam tapa jalan duic. Dua janih jamaok vằn pambak ruak hu angan lac Aedes aegypti saong Aedes albopictus. Di Việt Nam, ruak rah tabiak yaok thun min bhian patuh tabiak jeng jit praong di bilan hajan, abih di nyu nan lac dalam dom bilan 7, 8, 9, 10. Ini lac ruak truyền nhiễm cấp tính saong meda rah tabiak di yaok urang, yaok umo thun, min uranaih meng 3 tal 10 thun mbuan si gaok ruak di abih.

Ruak bhian hu dom kadha yau ini :

- Ngan saong uranaih: uranaih bhian pandiak glaong, pandiak đột ngột, pandiak meng 38 – 39 độ C, min oh patuk, oh haok ia dung. Tuk brei ka uranaih menyum jru pandiak tok hu tác dụng  dalam dom tuk.

 - Hu dấu hiệu tabiak darah, mboh dom tanut bhong angaok mbaok, angaok kalik.

 -Nduac darah dung

-Ta glong

-Nao ruak tian tabiak darah

-Meda pandik hatian, pandik khang, pandik di labik ala talang lasuk gah hanuk

-Ngan saong uranaih praong jang jeng mboh pandiak min pandiak takik, pandik akaok, pandik meta, pandik talang, lagah lagui rup pabhap saong jeng hu dấu hiệu tabiak darah.

-Jalan Iek ruak:

Kayua oh ka hu jru iek ruak đặc hiệu saong oh ka hu vắc xin caga ruak, yau nan ye ruak pandiak tabiak darah bhian tamuh jeng jit praong ngak ka rilo urang njauk ruak gam sa tukvak ngak ka bruk iek ruak gaok kan kandah, ba tal metai, abih di nyu nan lac uranaih.

Tuk pandiak, uraniah mbuan si lahik ia saong ngak ka nyu glah glan, mbang takik, menyum takik ngak brei uranaih dak kurang ia jang, yau nan ye, kol drei njauk caik hatai brei ka uranaih menyum ia rilo. Ia brei ka uranaih ala 5 thun menyum meng meteh lít tal sa lít meteh dalam sa harei, uranaih angaok 5 thun meng jaik  2 lít tal 2 lit meteh sa harei. Dom janih ia bo uranaih takre jeng pandar hu ye : ia kruac, ia la u, ia chanh, ia suối, ia pandiak caik la ar. Njauk salih dom janih ia karei di gauk piah uranaih oh mboh chán.

-Jui brei ka uranaih menyum dom janih ia hu sambo màu bhong, nâu, jhuk atau hu ga yau ia xá xị, ia baoh kayau sambo màu sậm, ia củ dền, tam kai kayua kan si thau nduac darah di bao tử hu sambo màu nâu bhong saong ia baoh kayau tuk uranaih taglong.

-Brei ka uranaih mbang mbrang, mbuan tiêu yau lisaiy nyan, bu, súp. Plaih mbang dom pandap mbang rilo limek, uranaih mboh trak hatung kan si tiêu. Oh mbang darah pabui, darah ada kayua uranaih naoruak tian khak hu sambo màu jhuk, mbuan sahaneg lac tabiak darah tiêu hoá.

-Jalan caga ruak siam di abih lac bhapbini gam gam pametai jamaok, lăng quăng/bọ gậy; yah klak labik menek di jamaok, pametai lăng quăng/bọ gậy meng bruk gam sir dom dụng cụ; palao ikan tame dom dụng cụ padang ia praong. Langiu di nan, dom amaik ame njauk caik hatai tal bruk caga jamaok kaik uranaih, cuk ao capha atah, ndih dalam kamo (mùng) melam jeng yau harei./.