Birau ini, angaok mạng xa hoi hu brei thau sa janih ruak birau mboh di uranaih. Tui nan, facebook angan Vân Dung lac: “Likau khan dom urang amaik ka ruak birau di uranaih , lac anek di ayut sahabat drei. Likau khan tal dom urang ngak maik saong jaik si ngak amaik. Meyah mboh uranaih tagok baoh sit sit njauk brei ba tame sang iek ruak saong juai blei nyum jru halei. Rilo urang bhian sahaneng lac pandiak tagok baoh min oh njauk, urak ini daok tamuh jit ruak ini. Jeng patuah jamo tuk anek kumei iew amik lac tagok hagiat mboh karei lo, tuk nan birau dua klau baoh, tuk nan  dahlak  iew phone brei iek ruak di tukvak 5tuk biar harei chip. Birau tame bac si lac meng page mai hu 3 urang ruak yau ini brei tame sang iek ruak chip, kamuan njauk ruak tiểu cầu, oh ka bhian mboh ruak ini, oh thau nyu nguy hiem ha-oh? Min mboh bac si lac brei ba tame iek ruak chip dalam hatung hatian laman lamuac. Iew ame mai ba anek tame mek darah duk iek blaoh cang kết quả tal 10tuk melam tiểu cầu uranaih daok 5000 min, bac si brei cấp cứu tiểu cầu chip, nan oh nyu mbaun ba tal tabiak darah glo kaok, 3 melam anek ndih bet nan lac 3 melam ndih sraiy ia meta. Hadei klau harei tiểu cầu uranaih tagok 128 brei mai sang. Ruak ini biak samar dom amaik brei caik hatai.” 

      Hadei tuk bac hu dom panuac kakei angaok nan, biak rilo urang tame khan brei gauk thau piah pacang caga ruak ini. Meng nan, dom bac si khoa nhi khan lac, ruak ini oh njauk lac ruak birau mboh bo nan lac ruak tabaik darah giảm tiểu cầu di uranaih, mboh meluk saong ruak pandiak tabiak darah saong ruak tagok baoh. Yaom lac oh njauk ruak birau, min ruak nguy hiem trak biak samar.

BN: Pathau BS, rauk tabiak darah giảm tieu cau nan yau habar?

BS: Ruak tabiak darah giảm tiểu cầu meda mboh di taongg abih uranaih min hu parabha jeng 2 kapul karei di gauk: anek kaman saong uranaih praong. Hu rilo kadha ba tal ruak giảm tiểu cầu min pataom tame dua bruk praong yau ini: patagok bruk tayah tiểu cầu dalam darah ngoại vi; trun bruk menek tiểu cầu di tủy talang. 

Ruak bhian tamuh kan si thau hu rilo tanut darah bhong atau bầm jhuk, atau tabiak darah kayua saluak kalik, oh pandiak, kurang darah, barah hạch atau tamuh abih rup hagait karei tra. Dom tanut bhong meda tamuh di rilo labik karei di gauk, bhian oh tamuh tapak gauk di tangin, takai. Dom tanut atau candiah darah kayua ngak gaok, bhian mboh di tangin, takai, mbaok meta.

Dom tanut saluak sit di takoi, rup, tangin takai ba tal tabiak darah. Biak takik mboh ruak tiểu cầu sraiy rilo darah meng tuk camereip yau nduac darak idung, tagei, jalan tung pruac atau me-ik tabiak darah. Hu meng 70 tal 80% dom mbang urang tiểu cầu hu siam veik hadei dom adit tal 3 bilan tuk hu iek ruak, 20% jeng ruak oh thit hu. Tuk tiểu cầu trun ralo njauk brei hu dom jalan pacang caga sraiy darah, abih di nyu lac sraiy darah di phổi, di glo akok mbuan ba tal metai. 

BN : Jalan iek ruak nan yau habar, bac si?

BS: Ngan saong dom uranaih ruak mãn tính, bruk iek ruak biak kan. Dom uraniah ruak nan njauk brei tui iek, plaik njiak ruak trak kayua tabiak darah. Juai pandar jru corticosteroid lieu glaong, pandar livik ba tal uranaih oh praong tagok. Uranaih kumei tal thun mboh harei bilan di nyu bhian dui atah rilo harei, tabiak rilo darah ba tal kurang darah. Iek ruak ini bhian brei pambuak gah huyết học, sản khoa saong nội tiết.

BN : Biak thau dhar phon BS!