Ong Cao Ngôi prong tagok dalam sa boh sang ngak nong, luac thun ngak hamu, ngak puh, min rai duik jeng dok kan kandah. “Tapa duah thau, hulin mboh sang drei hu taneh pala drak, min tok pala tangei, pala bei blom ye jien duah hu oh hadom. Hulin khang hatai salih tapa pala tabau, cà phê song dom janih phun mbang boh hu yaom KT glong, pambuak saong rong glang piah patagok KT suai lavik”, ong Ngôi khan lac yau nan. Min, meyah khang hatai saoh ye oh ka ginup, kayua ong dok kurang phun jien, kurang ilamu pala drak, rong glang. Hu bruk dong ba di Kapul urang nong ban sit Tô Hạp, ong khang hatai mesraiy 15 triệu đồng meng gilang pariak sarak karja piah blei pajaih, khak drak pala tabau pablak haong tangei. Tui ong Ngôi, piah ka phun tabau ba mai kein laba glong brei pala njauk bilan, pruh ia song buh khak ginup saong njauk tuk. Hu thau, 5 sào tabau di sang ong bhian brei năng suất, chất lượng biak glong, yaok thun duah hu labaih 20 triệu đồng/sào, kaoh abih phun jien ong dok liba hu labaih 60 triệu đồng.

Jien duah hu yaok thun meng phun tabau, cà phê song dom janih phun mbang boh hu  dong ka ong hu phun jien peih prong bruk pala drak, rong glang. Thun 2014-2015, ong pala pabak 6 sào cà phê, 2 sào keo… Taphia di nan, ong pala hareik rong limo menek, ong dok ngak var ro piah rong pabui, menuk, pala njam hajao, dong pasiam rai duik song patak patom jien pandar cai yaok harei. Jalan ngak mbang KT di urang nong Cao Ngôi hu ba mai kein liba glong, dong ka sang ong hu rai duik tani tanat. Ong Cao Văn Tính, Bí thư Đảng ủy ban sit Tô Hạp ndom lac yau nan. Meng dom bruk ngak hu dalam ngak mbang pala drak, ong Cao Ngôi lac sa dalam dom kreik camin hadah dalam bruk bac megru song ngak tui Wa di Kapul urang ngak nông huyện Khánh Sơn./.